வீணை விற்பன்னர் ராஜேஷ் வைத்யாவின் "இது ஒரு நிலாக்காலம்" இசைமழையில் நான்

வீணை வாத்திய வாசிப்பில் துறைபோந்த ஒரு வாத்திய விற்பன்னர், திரையிசைப் பிரியராகவும், அதுவும் குறிப்பாக இசைஞானி இளையராஜாவின் ரசிகராகவும் அமைந்து விட்டால், அவர் படைக்கும் நிகழ்ச்சி எப்பேர்ப்பட்ட பரவசத்தைக் கொடுக்குமோ அதைத்தான் கடந்த பெப்ரவரி 28 ஆம் திகதி சனிக்கிழமை திரு ராஜேஷ் வைத்யாவின் இசை நிகழ்ச்சி வாயிலாகக் கிட்டியது. 

“இது ஒரு நிலாக்காலம்” என்ற கவித்துவமான தலைப்போடு வீணைக்கலைஞர் திரு ராஜேஷ் வைத்யா இந்த நிகழ்ச்சியைப் படைக்கவிருக்கின்றார் அந்த ஒற்றைத் தலைப்பே இந்த நிகழ்ச்சி மீதான எதிர்ப்பார்ப்பைக் கிளப்பிவிட்டது. “சுப்ரதீபம்” என்ற சிட்னியின் உள்ளூர் இசைக்கலைஞர்களோடு ஒன்றிணைந்து படைக்கவிருக்கும் நிகழ்ச்சி பெப்ரவரி 28 ஆம் திகதி மாலை 6 மணிக்கு Redgum Function Centre, Wentworthville இல் நடக்கவிருக்கிறது என்றதுமே கொஞ்சம் அவ நம்பிக்கையோடுதான் போனேன். கையில் ஒரு புத்தகமும் எடுத்துச் செல்லுவோமா என்று கூட நினைத்தேன். ஏனென்றால் ஆறு மணி என்றால் ஏழு மணிக்கு நிகழ்ச்சியை நடத்துவது தானே நமது பாரம்பரியம்? ஆனாலும் என் நினைப்பை ஏமாற்றி விட்டிருந்தது அரங்கத்தில் கூடியிருந்த மக்கள் குழாம், ஐந்தரை மணிக்கே வந்து முகாமிட்டிருக்கிறார்கள். நிகழ்ச்சி பத்து நிமிடமே தாமதத்தில் ஆரம்பித்தது. இளையோர்களின் சுருக் நறுக் அறிமுகத்தோடு இதோ நிகழ்ச்சி ஆரம்பித்து விட்டது.

வெளிர் நீல மேக மூட்டம் பரவியது போல அலங்கார இருக்கை, மேலே உருண்டு திரண்ட மின் குமிழ் நிலாவாகவும் காட்சியளிக்க, அந்த இருக்கையில் ராஜேஷ் வைத்யா சரஸ்வதி போல மையம் கொண்டு அமைந்திருக்க, இரு மருங்கும் அணி செய்த சுப்ரதீபம் வாத்தியக் கலைஞர்கள் தேவர்கள் போலவும் கற்பனை செய்து கொண்டேன். அதே கற்பனா வெளியில் இருந்து கொண்டே முழு நிகழ்ச்சியையும் கேட்க என்னைத் தயார்படுத்திக் கொண்டேன். ராஜேஷ் வைத்யாவின் இசை நிகழ்ச்சி அனுபவம் எனக்கு இது தான் முதல் தடவையன்று  பதினைந்து வருடங்களுக்கு முன்னர் நான் மெல்பர்னில் இருந்த காலத்தில் சிட்னி வழியாக மெல்பர்னிற்கும் வந்து இசை நிகழ்ச்சி படைத்திருக்கிறார். பின்னர் அவுஸ்திரேலியத் தமிழ் ஒலிபரப்புக் கூட்டுத்தாபனத்தின் கலை ஒலி மாலை நிகழ்ச்சியிலும், சிட்னி கம்பன் கழக ஆண்டு விழா மேடைகளிலும் கலந்து சிறப்பித்திருக்கிறார். ஆனால் மூன்றரை மணி நேர நிகழ்ச்சியில் ராஜேஷ் வைத்யாவின் சாகித்யத்தை முழு அளவில் பயன்படுத்திப் புண்ணியம் தேடிக் கொண்ட கச்சேரியாக இந்த நிகழ்ச்சி அமைந்து விட்டது.

ராஜேஷ் வைத்யாவின் வீணை நிதானமெடுத்து அவையடக்கம் வழங்குமாற் போல மெல்லிய சங்கதியோடு கிளம்பி மெல்ல வாக டிஸ்கவரி சானலில் காணும் காட்சி போல அது அழகான மெட்டாக விரியும் பூவாக “ஜனனி ஜனனி ஜகம் நீ அகம் நீ” பாடலோடு முழுமையாகத் தன்னை வெளிப்படுத்தி நிதானிக்கிறது. ஆரம்பத்தில் இருந்து அவ்வப்போது குரலால் நிவி விட்டு அழகு பார்க்கிறது ராஜேஷ் வைத்யாவோடு கூட வந்த தமிழகக் கலைஞர் திரு.சுப்ரமணியம் அவர்களின் வழியாக. தொடர்ந்து ஶ்ரீ ராகவேந்திரா பாடல் வழியாகவும் இந்தக் குரலிசையும் அவ்வப்போது பொருத்தமான இடங்களில் கலந்தது வெகு சிறப்பு.
ராஜேஷ் வைத்யாவுக்குச் சரணாகதித் தத்துவம் நன்றாகப் புலப்பட்டிருக்கிறது. தன்னுடைய மகாராஜாத்தனமான மீசையை மீறி வெளிப்பட்டும் அப்பாவித்தனமான சிரிப்போடு “சரி நாம இனி நிகழ்ச்சிக்குப் போகலாமா” என்று அவையோரிடமே அனுமதி கேட்கிறார். 
“என்ன கைதட்டலைக் காணோம், லைட்டைப் போடுங்க நான் நிகழ்ச்சிக்கு வந்தவங்களைப் பார்க்கணும், நீங்க எப்படி ரசிக்கிறீங்க எனக்குத் தெரியணுமே” என்று சொல்லவும் வெளிச்சச் சிரிப்பில் இயல்பாகிறது அரங்கம். இப்படியாக நிகழ்ச்சிக்கு வந்திருக்கும் ரசிகர்களைத் தன்னோடு இணைத்து விட்டுக் கச்சேரியைத் தட்டிவிட்டார் தேசிங்கு ராஜனின் புரவியாட்டம்  தொய்வில்லாதது தொடர்ந்தது கச்சேரி. இதுதான் ஒரு தேர்ந்த கலைஞன் தன் ரசிகர்களைக் கட்டுக்குள் கொண்டு வரும் வித்தை. இந்த வித்தையைக் கையாண்டதன் அருமை நிகழ்ச்சியின் நிறைவு வரை வெளிப்பட்டது.

“பூவில் தோன்றும் வாசம் அது தான் ராகமோ” என்ற இடத்தில் இருந்து ஆரம்பித்து “புத்தம் புதுக்காலை பொன்னிற வேளை” யாகத் தன்னை வெளிப்படுத்திய போது எஸ்.ஜானகியின் குரல் ராஜேஷ் வைத்யாவின் விரல்களை ஊடறுத்து வீணையின் நரம்பு வழியாகப் பாய்ந்தது போல ஒரு உணர்வு. எஸ்.ஜானகியின் அதே மென்மையை வீணை நாதம் பிரதிபண்ணிக் காட்டியது. இதே போல “இது ஒரு நிலாக்காலம்” (டிக் டிக் டிக் படத்தில் இருந்து) என்ற பாடலில் துள்ளாட்டம், தள்ளாட்டம் எல்லாம் கலந்து கிறங்கடித்த எஸ்.ஜானகியின் இன்னொரு பரிமாணத்தையும் அச்சொட்டாகக் காட்டிய விதத்தில் தான் ராஜேஷ் வைத்யாவின் தனித்துவம் வெளிப்படுகின்றது. ஒரு தேர்ந்த வாத்தியக் கலைஞர் பாடல்களை எடுத்துக் கையாளும் போது பாடலின் அடி நாதமாக விளங்கும் ரிதத்தில் மட்டும் தான் பெரும்பாலும் கவனத்தை எடுத்து அதை வெளிக்கொணருவார். ஆனால் ராஜேஷ் வைத்யாவின் வீணை அப்படியல்ல அது எஸ்.ஜானகி என்றால் எஸ்.ஜானகி என்ன மாதிரி வேறு பட்டுப் பாடுகின்றார் என்பதைக் கூட ஏற்ற இறக்கத்தோடும் வேகமாகவே, நிதானமாகவோ அல்லது பாடல் வரிகளில் எங்கெங்கே அழுத்தம் கொடுத்துப் போக வேண்டும் என்பதையும் உணர்ந்த ஒரு நடிப்பு வாத்தியக் கருவியாக நின்று இயங்குகின்றது. இதுதன் அவரின் தனி முத்திரை.

“காற்றில் வரும் கீதமே என் கண்ணனை அறிவாயா” என்ற கூட்டணிப் பாடலாகவும் “என் இனிய பொன் நிலாவே” என்ற தனிப்பாடலாகவும் “ஆகாய வெண்ணிலாவே” என்ற ஜோடிப் பாடலாகவும் வித விதமான ஆடையலங்காரம் பூண்டு அழகாக அபிநயம் பிடித்து ஆடுகிறது ராஜேஷ் வைத்யாவின் வீணை. 

விஸ்வநாதன்- ராமமூர்த்தி, எம்.எஸ்.விஸ்வநாதன், ஏ.ஆர்.ரஹ்மான், வித்யாசாகர், டி.இமான் வரை அவ்வப்போது தொட்டிருந்தாலும் தான் இளையராஜா காலத்தவன், இளையராஜாவின் இசை எவ்வளவு தூரம் தன்னை ஆட்கொண்டிருக்கிறது என்பதை உணர வைத்தது அவர் ராஜாவின் பாடல்களை நேசத்தோடு எடுத்து வாசித்த போது.மெல்லிய தன் அக்மார்க் சிரிப்போடு பாடலை உரக்கப் பாடியும் ரசித்து வாசிக்கிறார். அதற்கு அடுத்ததாக வித்யாசாகரின் ஒன்றிரண்டு பாடல்களை வீணையில் மீட்டிய போதும் இதற்கு அடுத்த நிலையில் இருந்தது போலப் பட்டது.

“பாதி ஜீவன் கொண்டு தேகம் வாழ்ந்து வந்ததோ? ஆ மீதி ஜீவன் என்னைப் பார்த்த போது வந்ததோ?” என்று சரணத்தில் இருந்து தொடங்கும் “மலரே மெளனமா” பாடலை அப்படியே கால இயந்திரத்தால் காவிக் கொண்டு போய் “நெஞ்சிருக்கும் வரை” காலத்தில் போய் நிறுத்துகிறார் “முத்துக்களோ கண்கள் தித்திப்பதோ கன்னம்” பாடலோடு. “சந்தித்த வேளையில் சிந்திக்க வேளையில் தந்துவிட்டேன் என்னை” என்று கேட்டுக் கொண்டிருந்த ரசிகர்கள்  உரக்கப் பாடாததுதான் குறை. அவ்வளவுக்கு அந்த இசைக் கலவை உருக்கியது.

“தாய்க்கு நீ மகனில்லை தம்பிக்கு அண்ணனில்லை ஊர்பழி ஏற்றாயடா நானும் உன் பழி கொண்டேனடா நானும் உன் பழி கொண்டேனடா” என்று “உள்ளத்தில் நல்ல உள்ளம்” (கர்ணன்) பாடலால் உருக்கியவர் அப்படியே “எனது விரல் கண்ணை கெடுப்பதுவோ அழுது அறியாத என் கண்கள்
ஆறு குளமாக மாறுவதோ” என்று “விடுகதையா இந்த வாழ்க்கை” (முத்து) பாடலோடு சேர்த்து மெல்லிசை மன்னர்கள் விஸ்வ நாதன் ராமமூர்த்தி கூட்டணியோடு ஏ.ஆர்.ரஹ்மானை இணைத்துப் பிணைத்துப் பழமைக்கும் புதுமைக்கும் பாலம் அமைக்கிறார். 

ஊரில் இருந்த காலத்தில் பாண் (ரொட்டி) ஐ வாங்கி நடுப்பகுதியைத் தின்பதற்கு முன்னர் அதன் மொறு மொறுப்பான கரைப் பகுதியைக் கடித்து சுவை பார்த்து முழுமையாகத் தின்று தீர்ப்பதைப் போல ராஜேஷ் வைத்யாவின் வீணையில் பாவிக்கப்படாத பாகம் அந்த வீணையின் தாங்கியான அடிப்பாகம் மட்டும் தான் போல. வீணையின் நரம்புகளைத் தாண்டி அதனைப் பிணைத்திருக்கும் மரப்படுக்கையிலும் தட்டியெழுப்பும் ஓசையும் அந்தந்தப் பாடல்களுக்குச் சுவை கொடுக்கின்றது.

ஏ.ஆர்.ரஹ்மானின் பாடல்களைச் சேர்த்து ஒரு கலவை என்று சொல்லி விட்டு “என் காதலே என் காதலே”, “அஞ்சலி அஞ்சலி”, “தொடத் தொட மலர்ந்ததென்ன”, “உயிரே உயிரே”, “சொன்னாலும் கேட்பதில்லை கன்னி மனது” , “தமிழா தமிழா” என்று கலந்த அந்தப் பாடல் கோப்பில் 
Kal Ho Naa Ho என்ற ஹிந்திப் படத்தில் வந்த “Kal Ho Naa Ho” பாடலும் கலந்தது ஆனால் அது ஷங்கர் – எசான் – லாய் என்ற இசையமைப்பாளர்களின் பாடலாச்சே. 

“தகிட ததிமி தந்தானா” பாடலோடு மீண்டும் ராஜா யுகத்துக்குப் போகிறது கச்சேரி, இடைவேளைக்கு முன்னதாக “இது ஒரு நிலாக்காலம்” பாடலின் துள்ளிசையோடு மீண்டும் வரத் தூண்டில் போடுகிறது.

இடைவேளைப் பின்னர் மீண்டும் கலவையான இசையோடு வாத்தியக்காரகள் அணி வகுக்க அப்படியே “சேலை மூடும் இளம் சோலை மாலை சூடும் மண மாலை” என்று “பனி விழும் மலர்வனம்” பாடலாகக் குளிர் “விற்றது” ராஜேஷ் வைத்யாவின் அந்த வீணை.

“உன் சமையலயறையில் நான் உப்பா சக்கரையா” என்று வித்யாசாகராகவும் “வண்ணம் கொண்ட வெண்ணிலவே” என்று எஸ்.பி.பாலசுப்ரமணியமாகவும் “முன்பே வா என் அன்பே வா” என்று ஏ.ஆர்.ரஹ்மானாகவும் பயணித்த வீணை சூழ் இசை மழை ஒரு கட்டத்தில் “துன்பம் நேர்கையில் நீ யாழெடுத்து இன்பம் சேர்க்க மாட்டாயா” பாடலோடு பழமை என்றும் இனிமை என்று தொடர்ந்து “அத்தான் என்னத்தான் அவர் என்னைத் தான் எப்படிச் சொல்வேனடி” என்று காதில் கிசுகிசுக்கிறது ராஜேஷ் வைத்யா முகத்தில் பாவமன்னிப்பு படத்தின் சாவித்திரியின் அபிநயம். “சிந்து நதியின் மிசை நிலவினிலே”, “காற்றினிலே வரும் கீதம்” , “உன்னிடம் மயங்குகிறேன்” என்று கிறங்க வைத்த அந்த இசை மழை  திடீரென்று “நெஞ்சுக்குள்ளே உம்ம முடிஞ்சிருக்கேன்” என்று ஏ.ஆர்.ரஹ்மானின் இசைப்புயல் அடித்துக் கடலில் கலந்தது ஒட்டவில்லை. அந்தப் பழைய பாடல் சுற்றைச் சேதாரமில்லாமல் வைத்திருந்திருக்கலாம்.
“ரா ரா சரசுக்கு ரா ரா” (சந்திரமுகி) , “ஐயய்யோ ஆனந்தமே” (கும்கி) பாடல்களும் உள்ளேன் ஐயா என்றன.

தன் பெரியப்பா ஜி.ராமநாதன் இசையில் வந்த பாட்டு என்று பெருமை பூக்கச் சொல்லியவாறே “உலவும் தென்றல் காற்றினிலே” (மந்திரி குமாரி) பாடலை ராஜேஷ் வைத்யா வாசிக்க இவரின் பெரியப்பா ஜி.ராமநாதன் வானத்தில் இருந்து கேட்டு ஆனந்தக் கண்ணீர் சொரிந்திருப்பார் அவ்வளவு தூரம் தன்னுடைய இசை மரபின் வேரைக் காட்டி விட்டுப் பதியம் போட்டது அந்த இசை.

“இனி உங்க நேரம் உங்களுக்குப் பிடிச்ச பாட்டுகளா சொல்லுங்க நான் வாசிக்கிறேன்” என்று ராஜேஷ் வைத்யா சொல்ல அரங்கத்தின் ஒவ்வொரு திசைகளிலிருந்தும் சத்தமாகவும், சன்னமாகவும் ரசிகர்கள் தமக்குப் பிடித்த பாடல்களைச் சொல்லிக் கொண்டிருந்தார்கள். நான் இசை நிகழ்ச்சி மேடையில் இருந்து இரண்டாம் வரிசையில் மிக நெருக்கமாக இருந்தாலும் வாய் திறக்காமல் காத்துக் கொண்டிருந்தேன். கொடுப்புக்குள் சிரித்துக் கொண்டிருந்தேன் என்றும் சொல்லலாம். அதை நியாயம் பண்ணும் விதமாக ராஜேஷ் வைத்யா தொடங்கினார் இப்படியாக
“எவரும் சொல்லாமலே பூக்களும் வாசம் வீசுது

உறவும் இல்லாமலே இரு மனம் எதோ பேசுது
எவரும் சொல்லாமலே குயிலெல்லாம் தேனா பாடுது
எதுவும் இல்லாமலே மனசெல்லாம் இனிப்பா இனிக்குது”

அதே தான், “தென்றல் வந்து தீண்டும் வந்து என்ன வண்ணமோ” எஸ்.ஜானகியோடு இளையராஜா பாடும் அவதாரம் படப் பாடல் தான். என்னுடைய முறுவலுக்குக் காரணம் கற்பித்தது. ஒரு இளையராஜாவின் தீவிர ரசிகன் மேடையில் வாசித்துக் கொண்டிருக்க, அரங்கத்தில் அமர்ந்து கேட்டுக் கொண்டிருக்கும் தீவிர ரசிகனுக்கும் இடையிலான டெலிபதி அது. 

“கண்ணிரண்டில் நூறு வெண்ணிலாக்கள் தோன்றும் ஆனாலும் அனல் பாயும் நாடியெங்கும் ஏதோ நாதவெள்ளம் ஓடும் ஆனாலும் என்ன தாகம்”  என்று போன “என்னுள்ளே என்னுள்ளே பல மின்னல் எழும் நேரம்” பாடலை ராஜேஷ் வைத்யா இசைத்த கணம் எனக்குப் பக்கத்தில் என்னுடைய உணர்வோடு ஒரு ராஜா ரசிகன் இருந்திருந்தால் கட்டிப் பிடித்து அழுதிருப்பேன். அற்ப ஆயுளில் முடிந்து போன பாடகி சொர்ணலதாவே ஜீவன் கொண்டு பாடியது போல உணர்ந்த தருணம்.
“நானுனை நீங்க மாட்டேன் நீங்கினால் தூங்க மாட்டேன் சேர்ந்ததே நம் ஜீவனே” தளபதி படத்தில் தம் காதல் முறிவுறும் வேளை ரஜினி, ஷோபனா சந்திக்கும் காட்சியோடு இழைத்த பின்னணி இசைத் தூக்கிக் கொண்டு வந்து சிட்னியில் வைத்துக் கையளித்தது போல அதே இடத்தில் தொடங்கி “சுந்தரி கண்ணால் ஒரு சேதி” என்று தன் முகவரியைக் காட்டிய ராஜேஷ் வைத்யாவின் வீணை ஒரு தேன் குடமோ?
பேச்சுக் கச்சேரி, மலர்மாலை, பொன்னாடை போர்த்தல் போன்ற சம்பிரதாயங்கள் இன்றி நிகழ்ச்சி அதீத தன்னடக்கத்துடன் நடந்ததாலோ என்னவோ “சுப்ரதீபம்” இசைக்குழுவைப் பற்றிய தகுந்த அறிமுகம் கொடுக்காமல் இருந்து விட்டார்கள். சக வாத்தியக்காரர்களும் கொஞ்சம் தனி வாசிப்பை அதிகப்படுத்தியிருக்கலாம்.
பாடல் தேர்வில் அதி சிரத்தையாக இருந்தவர்களுக்கு ஒரு சபாஷ் போட வேண்டும். ரஹ்மான் சுற்றில் வந்த அந்த ஹிந்திப் பாடல் (வேறு இசையமைப்பாளர்), ராஜா சுற்றில் வந்த “தில்லு முல்லு” (எம்.எஸ்.விஸ்வநாதன் இசை) போன்ற குறுணித் தவறைக் கடந்து விடலாம்.
“நெஞ்சுக்குள் பெய்திடும் மாமழை” பாடலிலும் இன்னொரு பாடலும் கோளாறு பண்ணி மீதி மூன்றரை மணி நேரக் கச்சேரியில் சமர்த்துப் பிள்ளையாக இருந்தது அல்நூரின் திறம்பட்ட ஒலி ஒருங்கமைப்பு.
நிகழ்ச்சி நடக்கும் போது பக்கத்தில் இருப்பவரோடு குசு குசுப்பது உங்கள் இஷ்டம் ஆனால் ஒரு வரிசை தள்ளி இருப்போருக்கும் கேட்கும் வண்ணம் சத்தமாக உரையாடுவது மகா பாவம் அல்லவா. செல்போன் அழைப்புச் சத்தங்கள் இல்லாதது ஆறுதல்.

“இந்த ஷீட்ல இளையராஜா இசையமைத்த  முப்பது தொடங்கி நாற்பது பாடல்கள் இருக்கு இளையராஜாவால் தான் இது மாதிரி அமைக்க முடியும்னு காட்டுற பாடல்கள் அதை நாம தொடர்ச்சியாக வாசிக்கப் போகிறோம்” என்று சொல்லி விட்டு
“அந்தி மழை பொழிகிறது” பாடலில் ஆரம்பித்து  “பாட்டுத் தலைவன் பாடினால் பாட்டுத்தான்”, தேவதை இளம் தேவி”, “முதன் முதலாக காதல் டூயட்”, “சங்கீத மேகம் தேன் சிந்தும் நேரம்”, “பழமுதிர் சோலை  எனக்காகத் தான்”, “ராமனின் மோகனம் ஜானகி மந்திரம்” “நானே நானா”,  புது மாப்பிள்ளைக்கு நல்ல யோகமடா,  “பாடவா உன் பாடலை”, “புதுச்சேரி கச்சேரி”, “ஒரு காதல் என்பது”,  “சின்னப் புறா ஒன்று”  “தூங்காத விழிகள் இரண்டு” என்று தரையில் இருந்து  கிளம்பி வானத்தின் மீதேறி நிதானமாகப் பயணிக்கும் புஷ்பக விமானத்தில் ஏற்றிக் கொண்டு போய் “காதல் கவிதைகள் படித்திடும் நேரம்” பாடலோடு நிறைத்து நின்றார் ராஜேஷ், தேனுண்ட களிப்பில் சுழன்றடிக்கும் வண்டு போன்ற நிலை காது வழியே நெஞ்சில் நிறைந்த அந்த இசையோட்டம். 1000 படங்களைக் கண்ட இசைஞானி இளையராஜாவை இந்த ஆண்டு தமிழகம் கொண்டாடவிருக்கும் வேளை சிட்னியில் இருந்து மானசீகமாகக் கொண்டாடிய தருணம் இது.

ராஜேஷ் வைத்யாவின் வீணை வெறும் வாத்தியமன்று நம் எல்லோரது உணர்வுகளை மீட்டிப் பார்க்கும் உயிரோட்டமுள்ள நரம்புகளைப் பிணைத்த கருவி, அதன் மேல் அளையும் அவரின் விரல்களில் சரஸ்வதி தேவியின் அருட்கடாட்சம் நிரம்பியிருக்கிறது. 

பாடல் தந்த சுகம் : ஒரு மைனா மைனாக்குருவி

இந்தமாதிரிப் பாட்டெல்லாம் ரஜினிகாந்துக்கு உரியது என்று படத்தைப் பற்றிய ஜாதகம் தெரியாதவர்களே சொல்லிவிடக் கூடிய அளவு பொருத்தம் நிறைந்த பாட்டு. பாடலைக் கேட்கும் போது ரஜினிகாந்த் இன் நளினமான அசைவுடன் கூடிய நடனமே துணைக்கு வந்து கொள்ளும். எனக்கெல்லாம் இந்தப் பாட்டெல்லாம் ஒரு உற்சாக பானம் போல.

நடிகர் ரஜினிகாந்த் இற்கு ஆரம்பகாலத்தில் மலேசியா வாசுதேவன், தொடர்ந்து எஸ்.பி.பாலசுப்ரமணியம் பின்னர் மனோ என்று குரல் கொடுத்த போது மூவருமே பங்கமில்லாமல் அச்சொட்டாக ரஜினிகாந்த் ஆக மாற வேண்டிய உழைப்பு இருந்தது. ரஜினிக்கேயான குரலின் நளினங்களைக் காட்டி அதை மெய்ப்பிக்க வேண்டியிருந்தது. ரஜினிகாந்த் இற்கு முன்னால் இருந்த எம்.ஜி.ஆர் யுகத்தில் கூட டி.எம்.செளந்தரராஜனைத் தாண்டி யாரும் உச்ச குரலாக மாறமுடியவில்லை.
நல்ல பாடகர்கள் என்பது எக்காலத்திலும் இருந்தார்கள் என்பது தனியான விஷயம்.
“ஒரு மைனா மைனாக்குருவி” பாடலைப் பாடுவதற்காக ஒலிப்பதிவுக்கூடத்துக்குள் பாடல் பதிவாகும் போதுதான் இது ரஜினிகாந்த் இன் உழைப்பாளி படத்துக்காக எடுக்கிறோம் என்று சொன்னார்கள் என்று ஒருமுறை குறிப்பிட்டார் பாடகி சித்ரா. அப்போதே ட்ராக் சிஸ்டம் எனப்படும் பாடகர் தனித்தனியாகப் பாடிப் பின்னர் ஒட்டும் தொழில்நுட்பம் வந்து விட்டாலும் இந்தப் பாடல் மனோ, சித்ரா சம காலத்தில் பாடி ஒலிப்பதிவு செய்தது.
கவிஞர் வாலி படத்தின் முழுப் பாடல்களையும் எழுதியிருக்கிறார். ஏனோ இரண்டு பறவைகளை ஒரே படத்தில் இழுத்து விட்டிருக்கிறார். ஒன்று “ஒரு கோலக்கிளி ஜோடி தன்னை” இன்னொன்று இந்த “மைனா மைனாக்குருவி” . காலையில் வேலைக்கு வரும் போது திரும்பத் திரும்ப இதையே கேட்டுக் கொண்டு வந்து பொச்சம் தீராமல் அலுவலகத்துக்கு வெளியில் நின்றும் ஒரு முறை கேட்டுவிட்டு வேலைக்குப் போனேன். வேலை நேரத்தில் பாடல் கேட்பதில்லை. எப்பவாவது அரிதாகத் தான் அது நடக்கும்.
“ஒரு மைனா மைனாக்குருவி” பாடலுக்கு ஒன்று விட்ட சித்தி மகளாக “வெண்ணிலவு கொதிப்பதென்ன” (சின்ன மாப்ளே) http://youtu.be/e_jSgAfrYuA படப்பாட்டைச் சொல்லலாம். அந்தப் பாட்டு மனோ, சொர்ணலதா பாடியது. முன்னர் ஒருமுறை சொன்னது போல ஒவ்வொரு பருவத்திலும் ராஜா இம்மாதிரி ஒத்த வடிவங்களில் அமையும் பாடல்களைக் கொடுப்பது வழக்கம்.
“ஒரு மைனா மைனாக்குருவி” பாடலெல்லாம் மெல்லிசை மேடைக் கச்சேரி வைப்பவர்களுக்கே தாரை வார்த்தது மாதிரி இசைக்கட்டோடு இருக்கும்.  மிக இலகுவாக மேடைக்கச்சேரியில் வாசிக்கக் கூடிய பாட்டு. மனோ (மேனாட்டுப் பெண்களிடம்) , சித்ரா (ஏதேதோ எண்ணம் கொண்டு) பாடும் போது இரட்டைப்படையாக அவர்களின் குரல் ஒலிக்கும் உத்தி முன்னர் ராஜாதி ராஜா படத்தில் வரும் “வா வா மஞ்சள் மலரே” பாடலிலும் பயன்பட்டுச் சிறப்பாக அமைந்திருக்கும்.
இப்போதெல்லாம் ஒவ்வொரு படம் வரும் போதெல்லாம் புதுசு புதுசா தினுசு தினுசா சண்டை, வழக்கு, போராட்டம் எல்லாம் இல்லாத காலம் அப்போது இதற்கெல்லாம் ஆதியும் அந்தமுமாக ரஜினிகாந்த் இற்கும் விநியோகஸ்தர் சங்கத்துக்கும் இடையில் புட்டுக் கொள்ளவே  விஜயா வாஹினி பல்லாண்டுகளுக்குப் பின்னர் எடுக்க வந்தபோது உழைப்பாளியின் பூஜையில் இருந்து படம் வெளிவரும் வரை உண்மையான பிரசவ வேதனை தான். அப்போது விநியோகஸ்தர் சங்கத் தலைவராக இருந்த சிந்தாமணி முருகேசன் பரவலாகத் தன் பெயரைத் தக்கவைத்ததோடு சரி. படம் வெளி வந்து ரஜினிகாந்த் – பி.வாசு கூட்டணியில் வசூலை அள்ளிய இன்னொரு படமாக அமைந்தது.
நடிகை ரூபிணி மேரி அதாலத் என்ற ஹிந்திப் படத்தில் நடித்த காலத்திலேயே ரஜினிகாந்த் உடன் நடித்த பெருமை. ஆனால் அந்தப் படத்தில் அவர் ஜோடி இல்லை. பின்னாளில் மனிதன் படத்தில் ஜோடி சேர்ந்து கொண்டார். ரூபிணிக்குப் பட வாய்ப்புகள் ஓய்ந்து காணாமல் போன நிலையில் உழைப்பாளி படத்தில் “ஒரு மைனா மைனாக்குருவி” பாடலில் மூன்றில் ஒரு குமரியாக ஆடினார். போனவாரம் 80ஸ் நட்சத்திரங்களின் சந்திப்பு நிகழ்ச்சியில் பார்த்த போது அதே ரூபிணி அப்படியே இருக்கிறார் என்பதோடு நிறுத்திக் கொண்டு “ஒரு மைனா மைனாக்குருவி மனசாரப் பாடுது” பாடலைக் கேட்போம் ???

"வீசும் தென்றல் காற்றினைப் போல்" – மலர்ந்தும் மலராதது

வீசும் தென்றல் காற்றினைப் போல் என் இதயத்தில் நீ நுழைந்தாய் – ஏ.ஆர்.ரஹ்மானின் மலர்ந்தும் மலராத பாடல்

நேற்று YouTube இல் 90 களின் இறுதியில் வந்த பாடல்களை ஒவ்வொன்றாகக் கேட்டுக் கொண்டு வந்தேன். அப்போது உல்லாசம் படத்தில் வந்த “வீசும் காற்றுக்குப் பூவைத் தெரியாதா” பாடலைக் கேட்டு முடித்ததும் YouTube தானாகவே ஒரு பாடலைப் பரிந்துரைத்தது. அந்தப் பாடல் தான் “வீசும் தென்றல் காற்றினைப் போல்”. இந்தப் பாடலை எங்கோ கேட்ட மாதிரி இருக்கே என்று மனசைக் கேட்கும் அளவு சுத்தமாக மறந்து விட்ட பாட்டு, கிட்டத்தட்ட 14 வருடங்களுக்குப் பின்னர் மீண்டும் கேட்கிறேன். 
தொண்ணூறுகளில் ஏ.ஆர்.ரஹ்மான் அலை 
அடித்துக் கொண்டிருந்த போது அடுத்து இவர் எதைக் கொடுப்பார் என்று கன்னம் வைத்துக் கொண்டிருந்த நேரம். மலையாளத்தில் இருந்து வந்த அசோகா, தெலுங்கில் இருந்து வந்த சூப்பர் போலீஸ், மனிதா என்று தமிழ் மாற்றுப்பட்ட பாடல்களையும் விட்டு வைக்கவில்லை. அப்போது தான் “மோனலிசா” என்ற படப் பாடல்கள் வந்திருந்தன. ரஹ்மான் படமும் மோனலிசா ஓவியமும் பொதிந்த விபரங்கள் தவிர வேறு எதுவும் அப்போது மட்டுமல்ல இப்போதும் தெரியாத ரகசியமாக வந்த பாடல் பொதி இது.
சம காலத்தில் ரஹ்மான் இசையில் வந்த  doli saja ke rakhna (காதலுக்கு மரியாதை ஹிந்திப் பதிப்பு) பாடல்கள் “ஊஞ்சல்” என்ற இசைத் தொகுப்பாக வந்திருந்தது. அதுவும் பெயரளவில் மட்டுமே வந்த  திரைப்படமாக்கப்படாத தமிழாக்கப் பாடல்கள். பின்னர் இது ஜோடி திரைப்படத்துக்காக வேறு பாடகர்கள் பாடித் திரை வடிவம் கண்டது.
Daud ஹிந்திப் படமும் ஓட்டம் என்ற பெயரில் தமிழில் பாடல்களாக ஒரு வருட இடைவெளியில் வந்தது.
மோனலிசா படத்தின் பாடல்கள் 1998 காலப்பகுதியில் வெளியானது. இந்தப் பாடல்கள் அனைத்துமே பழநி பாரதி அவர்களால் எழுதப்பட்டிருக்கிறது. எனக்கு இந்த “வீசும் தென்றல் காற்றினைப் போல்” பாடலைப் பரிந்துரைத்த YouTube இல் அப்போது கேட்டுக் கொண்டிருந்த “வீசும் காற்றுக்கு பூவைத் தெரியாதா” பாடலும் பழநி பாரதியால் எழுதப்பட்டது ஆச்சரியமான இன்னொரு ஒற்றுமை. இந்தப் பாடலை அப்போது வகை தொகையில்லாமல் கேட்டிருக்கிறேன். இப்போது திருவிழாவில் தொலைந்த குழந்தை மீசை முளைத்த விடலைப்பையனாக அடையாளம் காணமுடியாத அளவுக்கு  என் முன்னால் நிற்பது போல பிரமை 🙂
உன்னி கிருஷ்ணன், ஸ்வர்ணலதா பாடிய அட்டகாசமான பாடல் இது.
இந்தப் பாடலின் நதிமூலத்தை ஆராய்ந்தால் முதலில் ஹிந்தியில் வெளியான “Kabi Naa Kabi” படத்திற்காகத் தான் இந்தப் பாடல்கள் முதலில் பதிவாகித் திரை வடிவம் கண்டன. குறிப்பாக இந்த “வீசும் தென்றல் காற்றினைப் போல்” பாடலின் மூலப் பாடலான “Tu Hi Tu” பாடலை சித்ராவும் மலையாளப் பாடகர் ஶ்ரீகுமாரும் பாடியிருப்பார்கள். இதுவரை கேட்காதவர்கள் கேட்டுப் பாருங்கள். https://m.youtube.com/watch?v=6Y_8-Wg0qIA 
பாடகர்கள் ஏதோ வீராணம் குழாய்க்குள் இருந்து பாடுவது போல அமுங்கிப் போய் இருக்கும் ஹிந்தி வடிவம். வழக்கமாக பாடல்களின் மூல வடிவத்தைக் கேட்கும் போது இனிமையாக சுகமாகவும் இருக்கும். அதை மொழி மாற்றும் போது பாடகர் தேர்வில் சறுக்கல் இருக்கும். குறிப்பாக அக்னி நட்சத்திரம் பாடல்களை தெலுங்கில் வாணி ஜெயராம் பாடியதைக் கேட்டால் தெரியும். 
இங்கோ தலைகீழ் ஹிந்தியில் எடுபடாதது போல இருக்கும் பாட்டு தமிழில் உன்னிகிருஷ்ணன், ஸ்வர்ணலதா பாடும் போது ஏதோ தமிழுக்காகவே
தாரை வார்க்கப்பட்ட மெட்டுப் போல பாடல் வரிகளும், பாடும் திறனும் வெளிப்படுகின்றது. கிட்டத்தட்ட இதே பாணியில் ஏ.ஆர். ரஹ்மான் பல்லாண்டுகளுப்பின் கொடுத்த இன்னொரு பாட்டு “அழகிய தமிழ்மகன்” படத்தில் வரும் “கேளாமல் கையிலே வந்தாயே காதலே” பாடல் இருக்கும்.
“வீசும் தென்றல் காற்றினைப் போல்” பாடலை இன்னொரு பாடலில் கண்டுகொண்டோமே என்று முடியைப் பிய்த்துக் கொள்ளாதீர். வழக்கம் போல தேனிசைத்தென்றல் தேவாவின் பெருங்கருணையால்  ” நெஞ்சினிலே” படத்தில் வரும் “மனசே மனசே கலக்கமென்ன” https://m.youtube.com/watch?v=YVqvSMDXsFk பாடலின் ரிதம் ஒரே காலேஜ்ல ஒண்ணாப் படிச்சவங்க என்று சொல்லும். அண்ண்ணன்ன் அண்ண்ணன்ன் ?

மனதில் என்ன நினைவுகளோ

எப்போதாவது அரிதாக என்
நாட்டுக்குப் போகும் வாய்ப்புக் கிடைத்தால் கொழும்பில் இறங்கிய அடுத்த
நிமிடமே யாழ்ப்பாணம் நோக்கிப் பறந்து விடும் மனசு.
இணுவிலில்
இருந்து கே.கே.எஸ் றோட்டால் எதிர்க்காற்று முகத்தில் அப்ப சைக்கிள்
வலித்து யாழ்ப்பாணம் ரவுண் நோக்கிப் போய்க் கொண்டிருப்பேன். தாவடிச் சந்தி,
கொக்குவில் சந்தி, பூ நாறி மரத்தடி எல்லாவற்றையும் குசலம் விசாரிக்குமாற்
போல நின்று நிதானித்து விட்டு நாச்சிமார் கோயிலடியிலும், சிவன்
கோயிலடியிலும் சைக்கிளை ஸ்ராண்டில் போட்டு விட்டு றோட்டுக்கு அப்பால்
இருக்கும் கோபுரத்தைக் கிழித்து எரியும் விளக்கொளியில் தொலைவில் இருக்கும்
கர்ப்பக்கிருகத்தில் இருக்கும் மூல மூர்த்தியை வழிபட்டுவிட்டு தொடரும்
பயணம்.
இடையில் வரும் மனோகரா தியேட்டர் தரிசனம்.
சுப்பரமணியா
புத்தகசாலை, வரதரின் ஆனந்தா அச்சகம், டொமினிக் ஜீவாவின் மல்லிகை
காரியாலயம் இவையெல்லாம் இருந்த இடங்களையும் எட்டிப் பார்த்துப் பெரு மூச்சு
கிளம்பும்.
அப்படியே வீரசிங்கம் மண்டபம், கோட்டை
முனியப்பர், 1974 ஆம் ஆண்டு தமிழாராய்ச்சி மாநாட்டில் கொல்லப்பட்டவர்களின்
நினைவுத் தூபி, உருக்குலைந்து கிடக்கும் றீகல் தியேட்டர் (இப்ப அதுவும்
இல்லை) , துரையப்பா ஸ்டேடியம், யாழ் பொது நூலகம், சுப்ரமணியம் பார்க்,
பண்ணைப் பாலம், சென்றல் கொலிச் எல்லாம் எட்டிப் பார்த்து அப்படியே வளைந்து
போய் முன்னர் மூத்திரச் சந்தாக இருந்த குச்சொழுங்கையால் ஹரன் தியேட்டர்
இருந்த பக்கத்தை எட்டிப் பார்த்து விட்டு  சாந்தி தியேட்டருக்கு (இப்ப
நாதன்ஸ்) ஓடும் சைக்கிள். அங்கே வெறும் தியேட்டரைக் கொஞ்ச நேரம் பார்த்து
விட்டு முன்னால் தேங்கிய குப்பைக் குவியலின் துர் நாற்றம் நாசியில் அடிக்க
அப்படியே பஸ் ஸ்ராண்டடிக்குப் போய் சைக்கிளில் இருந்து கீழே இறங்கி
உருட்டிக் கொண்டே யாழ் போதனா வைத்தியசாலையை ஒரு எட்டு அப்படியே
பூபாலசிங்கம் புத்தகசாலையில் புத்தகங்களைப் புரட்டிப் பார்த்து விட்டு,
ராணி தியேட்டர் இருந்த இடத்தில் இயங்கி இப்போது பூட்டியிருக்கும் சைக்கிள்
பாதுகாப்பு நிலையத்தை ஏறிட்டு விட்டு நவீன சந்தைக் கட்டடத்துக்குள்
நுழைந்து ஷண் றெக்கோர்டிங் பார் இருந்த பக்கமெல்லாம் பார்த்து விட்டு
வெளியே வந்து சைக்கிளை மீண்டும் வலித்து கன்னாதிட்டி றோட்டில் இருக்கும்
லிங்கன் கூல்பாரில் ஒரு சர்பத் இரண்டு மட்டன் றோல்ஸ் சாப்பிட்டு விட்டு
அப்படியே லிடோ தியேட்டர் இருந்த இடத்தில் வந்திருக்கும் கட்டட வளாகத்தையும்
ஏறிட்டு விட்டு வின்சர் தியேட்டருக்கு முன்னால் மெளன அஞ்சலி
செலுத்துமாற்போல கொஞ்ச நேரம் நிற்பேன். அந்த இடம் சந்தைப்படுத்தல்
திணைக்களத்தின் களஞ்சிய அறையாக வாழ்விழந்து நிற்கும். பக்கத்தில் இருக்கும்
ராஜா தியேட்டரில் என்ன படம் ஓடுது என்று பார்த்து விட்டு ஸ்ரான்லி
றோட்டால் நியூ விக்டேர்ஸ் இருந்த பக்கம் போய் பின்னர் வெட்டிக் கொண்டு
வந்து வெலிங்டன் தியேட்டர் இருந்த காணியையும் ஏறிட்டுப் பார்த்து விட்டு
ஈபிடிபி கட்சியால் சுற்றி வளைக்கப்பட்டு கைதியாய் நிற்கும் உடைந்த ஶ்ரீதர்
தியேட்டரையும் ஊமையாகப் பார்த்து, றயில்வே கடவைக்கு அப்பால் இருந்த விக்னா டியூட்டரி பக்கம் பார்த்து விட்டு ஆரிய குளச் சந்தியால் நல்லூரை நோக்கிச் சைக்கிள் போகும். இதுதான் என்
ஒவ்வொரு யாழ்ப்பாணப் பயணத்தில் தவறாது நிகழ்ச்சி நிரலில் இருக்கும்
விடயம்.
யாழ்ப்பாணத்தில் எண்பதுகள் காலகட்டத்தில்
தமது இளமையைக் கழித்தவர்கள் புண்ணியம் செய்தவர்கள். முந்திய பந்திகளில்
நான் தரிசித்த இடங்கள் உயிர்பெற்று விளங்கிய காலங்கள் அவை. 
எண்பதுகளின் இறுதிக் கால்பகுதியோடு வசந்தங்கள் எல்லாம் தேய்ந்து போய்விட்டன.
எனது கொடுப்பினையோ என்னவோ,
எண்பதுகளிலும் தொண்ணூறுகளின் அரைவாசியையும் யாழ் மண்ணில் கழித்ததால் இந்த
அனுபவத்தை நினைவு தெரியாத சிறுவயதில் இருந்தே சுவைத்திருக்கிறேன். அதனால்
தான் இருபது வருடங்களைத் தொடும் என் புலம்பெயர் வாழ்க்கையிலும் உதறித் தள்ள
முடியாத பந்தம் இந்த இடங்களில் எல்லாம். இவையெல்லாம் இருந்த இடம் தெரியாமல் உருக்குலைந்தோ அல்லது இருந்தாலும் பழைய நினைவுகளைத் தொலைத்த அம்னீசியா கண்ட நோயாளியாகவோ….
“தனிமை இருளில் உருகும் நெஞ்சம் துணையை விரும்புமே 
துணையை விரும்பி இணையும் பொழுது
அமைதி அரும்புமே”

“மனதில் என்ன நினைவுகளோ இளமைக் கனவோ இதுவோ அதுவோ இனிய ரகசியமோ”

“அந்தப் பாடல் பஞ்சு அருணாசலம் வரிகளில் பூந்தளிர் படத்துக்காக எஸ்.பி.பாலசுப்ரமணியம், எஸ்.பி.சைலஜா குரல்களில் இளையராஜா இசையமைக்க ஒலித்தது, நீங்கள் கேட்டுக் கொண்டிருப்பது இலங்கை ஒலிபரப்புக் கூட்டுத்தானம் வழங்கும் வர்த்தக சேவை” எங்கே ஒரு தேத்தண்ணிக் கடையில் இருந்து கிளம்பும் பாடல் அந்த எண்பதுகளில் ஒரு வசந்த காலத்துக் கீதமாக.
சைக்கிளில் பரரலாக போய்க் கொண்டு கதை பேசிக் கொண்டிருக்கும் காதலர்கள் போல.

“மனதில் என்ன நினைவுகளோ இளமைக் கனவோ இதுவோ அதுவோ இனிய ரகசியமோ”
இந்தப் பாடல் மட்டும் தான் இந்த இடங்களையெல்லாம் உயிர்த்தெழ வைத்து  மனதில் அசைபோட வைக்கிறது எங்கோ பல்லாயிரம் மைல்களுக்கு அப்பால்.
 இன்று காலையில் இருந்து கேட்டுக் கொண்டிருக்கிறேன்.  
 
என்னைப் போலவே இன்னொருத்தர் இந்த நேரம் யாழ்ப்பாணம் ரவுண் பக்கம் இந்த இடங்களில் அலைந்து கொண்டிருப்பார், தேடிக் கொண்டிருப்பார் அந்த வசந்த காலங்களை.
 
 http://soundcloud.com/kanapraba/manadhil-enna
 
 
 

SHamitabh – ஷமிதாப் – shAMITABH

சினிமாவை ஆத்மார்த்தமாக
நேசிப்பவனின் இலட்சிய இருப்பு,  தன் 
அடையாளத்தைத் தொலைத்தவரின் ஆதங்கம்
இதை அடித்தளமாக வைத்து Shamitabh படத்தின் மூலக்கரு அமைந்திருக்கின்றது. 

இந்தப் பதிவில் தலைப்பில் இருக்கும் SHamitabh VS shAMITABH தான் காட்சிகளை நகர்த்தும் பகடைக் காய்களாய். ஆனால் வழக்கம் போல கதாநாயகனுக்கும், வில்லனுக்கும் நடக்கும் ஈகோ யுத்தம், நாலு சண்டை என்ற ரீதியில் அமைந்த மாமூல் மசாலாவும் அல்ல.  இயன்றவரை இயல்பாகவே திரைக்கதையோட்டத்தை அமைத்திருப்பதால் முழுமையான வணிக சினிமாவாக இந்தப் படத்தைச் சொல்ல முடியாது.

அமிதாப் பச்சான் என்ற மிகப் பெரும் நடிகருக்கெல்லாம் இந்த மாதிரிக் கதாபாத்திரம் ஊதித்தள்ளக்கூடியது. ஆனால் இந்தப் படமும் இவர் ஏற்று நடித்த பாத்திரமும் அமிதாப் இன் திரையுலக வாழ்வில் தவிர்க்க முடியாத அளவுக்கு படம் முழுக்க நிரம்பியிருக்கிறார். அமிதாப் ஐ விட்டு எந்த நடிகரையும் பொருத்திப் பார்க்க முடியாத அளவுக்குச் சிறப்புச் சேர்த்திருக்கிறார். கிட்டத்தட்ட அவரின் நிஜ வாழ்க்கையின் ஒரு பகுதிதான் படமாகியிருக்கிறது.

 தனுஷ் இற்கு ஷமிதாப் இன்னொரு மிகச்சிறந்த வாய்ப்பு, சிறுவயதில் இருந்தே சினிமா சினிமா என்று அலைந்து, ஏங்கி அந்த வாய்ப்பைப் பற்றிப் பிடிக்க எத்தனிப்பதிலும், புகழின் உச்சியில் இருக்கும் போது தன் சினிமா வாழ்க்கை தொலையப் போகின்றதே என்று துடிக்கும் போதும் சரி, மிகை நடிப்பில்லாது வாழ்ந்து காட்டியிருக்கிறார். படம் முழுக்க இவரின் அங்க அசைவுகள் தான் பிரதானம். 

தமிழ் சினிமா நாயகர்களில் கமல்ஹாசன் உயர்ந்தவர்கள் படத்தில் வாய் பேச முடியாத பாத்திரத்தில் முழுமையாக நடித்திருந்தார். கே.பாக்யராஜ் கூட ஒரு கை ஓசை படத்தின் இறுதிக்காட்சி வரை வாய் பேச முடியாதவராக நடித்திருப்பார்.  தனுஷிற்கு இந்தப் படம் வாயிலாக இப்படியானதொரு வாய்ப்புக் கிட்டியிருக்கிறது. இந்த ஆண்டின் சிறந்த நடிகர் போட்டியில் அமிதாப் அல்லது தனுஷ் இந்தப் படத்தில் வந்தது போலவே போட்டி போடப் போகும் கூத்தும் நடக்கப் போகுதோ என்னமோ என்று சொல்லுமளவுக்கு அமைந்திருக்கிறது.

தனுஷ் இன் உடல் மொழிக்கு அமிதாப் இன் குரலைப் பொருத்தும் முதல் காட்சியில் அமையும் நடிப்புப் பயிற்சி கல கல கலக்கல்.
ஆரம்பத்தில் தனுஷ் இன் உருவத்தோடு அமிதாப் குரலைப் பொருத்திக் கேட்கும் போது ஏற்படும் நெருடலை அமிதாப் வழியாகவே கிண்டலாக “உன்னுடைய உடம்பின் எடையை விட என் குரலின் எடை அதிகம்” என்று பகிர்ந்து சமரசம் கொள்ள வைக்கிறார் இயக்குநர்.

களத்தூர் கண்ணம்மா கமலின் அக்கா மாதிரியே அக்க்ஷரா, உதவி இயக்குநராக  இது நாள் வரை இருந்தவர் இப்போது நாயகி ஆன முதல் வாய்ப்பிலேயே உதவி இயக்குநர் பாத்திரத்தில் நடித்திருப்பதும் புதுமை. 

 பொம்மலாட்டம் புகழ் ருக்மணி ஒரு சில காட்சிகளில் வரும் போது இழுத்து வாருங்கள் தமிழ் சினிமாவுக்கு என்று சொல்லுமளவுக்கு அழகுப் பதுமையாக இருக்கிறார்.
நாடோடிகள் அபிநயா ஒரு காட்சியில் எட்டிப் பார்க்கிறார்.

ஆரம்பத்தில் படத்தின் எழுத்தோட்டத்தோடு தாவும் மேற்கத்தேய இசை ஒரு பெரும் இசைக்கச்சேரியைக் கேட்கும் ஆவலோடு எம்மைத் தயார்படுத்துகின்றது.
தனுஷ் இன் சிறுவயதுக் காட்சியில் கிராமத்தில் நடித்துக் காட்டும் போது இயங்கும் ஒற்றை வயலின் அப்படியே ஒரு கூட்டம் வயலின் ஆவர்த்தனத்தைத் துணைக்கழைத்துப் பெருக்கெடுக்கும் போது மீண்டும் இளையராஜாவே வந்து இந்திய சினிமாவுக்குப் பின்னணி இசையின் தாற்பர்யத்தைப் பாடமெடுக்கும் காட்சியாகவே அமைந்து சிறப்பு சேர்க்கிறது.
அது போல் தனுஷ் வாய்ப்புத் தேடும் போதும் அமையும் பின்னணி இசையும் குறிப்பிட்டுச் சொல்ல வேண்டியது.

படத்தின் மிகப் பெரிய ஏமாற்றம் வழக்கம் போல இசைஞானி இளையராஜாவின் இசையில் கிடைத்த ஆறு முத்தான பாடல்களில் இரண்டை மட்டுமே பயன்படுத்திவிட்டு மீதியைக் கடாசிய போது வந்த எரிச்சல் இன்னமும் அடங்கவில்லை. 

Ishq E Fillum நம்மூர் “ஜாதி மத பேதமின்றி (சினிமா சினிமா) மாதிரியான பாடல் முழுமையாக இருக்கிறது. பிட்லி பாடலும் இடையில் சிறு பொத்தல் போட்டுத் தொடர்கிறது. ஸ்டீரியோஃபோனிக் பாடல் அரை நிமிடமே படமாக்கப்பட்டு மண்ணை வாரி வீச வைக்கிறது. “தப்பட்” பாடல் ஒரு நிமிடம் ஒலித்து போங்காட்டம் ஆடுகிறது.
தெரியாமல் தான் கேட்கிறேன். சினிமாவை முழுமையாகக் களமாக அமைத்த படத்தில் இந்த மாதிரி லட்டு மாதிரி ஆறு பாடல்கள் கிட்டியிருக்கிறதே அவற்றை மோசம் செய்யாமல் பயன்படுத்த வேண்டும் என்ற மானசீக எண்ணம் கூட இல்லாமல் என்னத்தைப் படம் எடுக்கிறது? 
இனி டிவிடிக்காகக் காத்திருந்து அதிலாவது வெட்டுப்படாத முழுப்படமும் கொடுக்கிறார்களா என்று தேடவேண்டும். அதுவே இடைவேளைக்குப் பின் படத்தை ஒன்றிப் பார்க்க முடியாமல் செய்துவிடுகின்றது.

ராஜாவின் பாடல்களை மோசம் செய்த பெரும் குறையோடு அமிதாப், தனுஷ் ஆகியோரின் உழைப்புக்காக ஷமிதாப் படத்தைப் பாத்து விடுங்கள்.

ஷமிதாப் பாடல்கள் – கொண்டாடித் தீரா இசை வெள்ளம்

ஷமிதாப் (Shamitabh) பாடல்கள்
கொண்டாடித் தீரா இசை வெள்ளம்

சிட்னியில் வாரத்துக்கு இரண்டு ஹிந்திப் படங்களாவது தியேட்டரில் வந்து விடும் என்றாலும் ஒரு சில படங்களை மட்டுமே பார்ப்பதற்காக தியேட்டர் வாசலை மிதித்திருக்கிறேன். 

ஆனால் இளையராஜாவின் இசையை அகன்ற திரையரங்கில் காட்சிவடிவத்தோடு பார்த்தும், கேட்டும் கொண்டாட வேண்டும் என்று ஆசைப்பட்டுப் பார்த்த ஹிந்திப் படங்கள் 
சீனி கம் (2007)
http://www.radiospathy.com/2007/05/cheeni-kum.html
பா (2009)
http://www.radiospathy.com/2009/12/paa.html
இப்போது ஷமிதாப் படமும் சேர்ந்திருக்கிறது. வெள்ளிக்கிழமை தான் படம் வரும் என்றார்கள் ஆனால் தியேட்டரின் வலைபக்க வாசலிலேயே காத்துக் கிடந்த எனக்கு வியாழனே சிறப்புக் காட்சி இருப்பதாகக் காண்பித்தது. இன்றிரவு படம் பார்க்கும் வாய்ப்புக் கிட்டினால் சிறப்புப் பதிவு வரும்.
ஷமிதாப் பாடல்கள் iTunes இல் வெளியாகியிருந்தாலும் இசைத்தட்டில் வாங்கிக் கேட்டு இன்புறுவோம் என்று வழிமேல் விழி வைத்துக் காத்திருந்தது தான் மிச்சம். படம் வருவதற்கு ஒரு வார இடைவெளி தான் இருந்தது. இதற்கு மேலும் பொறுத்துக் கொள்ள முடியாது iTunes வழியாகவே தரவிறக்கிக் கேட்க ஆரம்பித்தேன்.
ஒவ்வொன்றாகப் பாடல்களைக் கேட்க ஆரம்பித்த போதும் புதுமை புதுமை புதுமை 
என்று காட்டிக் கொண்டே போனது ஆறு பாடல்களின் இசைக் கோவையும்.
அன்னக்கிளி காலத்தில் இருந்து நான்கு தசாப்தங்களாக இளையராஜாவின் இசையைப் பிரித்துப் பார்த்தால் ஒவ்வொரு காலகட்டமும் புதுப் புது இசையமைப்பாளரை அவரிடமிருந்து காட்டுகின்றதே. ராஜாவின் 90 களிலும் 2000 களிலும் கொண்டாட மறந்த பாடல்களை இப்போது கேட்டால் காலம் தவறிக் கொண்டாடுது மனம்.
“ஷமிதாப்” பாடல்களைக் கேட்டால் 71 வயசுக்காரர் கொடுத்தது என்று நம்ப முடியவில்லை.
“சத்தியமா சொல்றேன் ஷமிதாப் பாடல்களை ஒவ்வொரு நாளும் கேட்க உடம்பெல்லாம் உருக் கொள்ளுது”
என்று ட்விட்டரில் பகிர்ந்திருந்தேன்.
ஷமிதாப் பாடல்களில் எது நன்றாக இருக்கிறது என்பது ஒவ்வொரு நாளும் கேட்கும் போதும் மாற்றம் கண்டிருக்கிறது. ஒரு நாளைக்கு “ஷா ஷா ஷா” என்றிருந்தது. அடுத்த நாளோ “ஸ்டீரியோஃபோனிக் சன்னாட்டா” என்று முன்னுக்குத் தள்ளுகிறது.
“ஸ்டீரியோஃபோனிக்” பாடல் வரிகள் தான் வணிக விளம்பரம் போல முரண்டு பிடிக்கின்றது. இந்தப் பாடலின் நதி மூலப் பாட்டு “ஆசையைக் காத்துல தூது விட்டு” சமீப ஆண்டுகளில் தெலுங்கில் “குண்டல்லோ கோதாரி” (தமிழில் மறந்தேன் மன்னித்தேன்) படத்திற்காக மீள் இசையாக வந்தது. இப்போது ஹிந்திக்குப் போயிருக்கிறது. ஹிந்தி வடிவத்தில் மெட்டு மட்டுமே அவ்வப்போது காட்டிக் கொடுக்கிறது. ஆனால் பாட்டு வடிவமே முழுமையான பிரிட்டிஷ் மகாராணி விருந்து. ஆயிரம் படங்களின் பாடல்களையும் திரும்ப இசையமைக்கக் கொடுத்தால் இன்னும் ஆயிரம் இசைத் தொகுப்புகளைப் புது வடிவில் கொடுக்க நம்ம ஆளால் முடியும். ராஜாவின் இசையை சீரழிக்கும் ரீமிக்ஸ் வெறியர்களுக்குப் பாடமெடுக்கும்.
“லைப்ஃபோய்” பாடலின் இடையிசை கலக்கல் துள்ளிசை.
“ப்ரியா” படத்தின் பாடல்களை வாக்மேனில் கேட்ட போது ஒரு காதில் ஒரு 
வித இசை இன்னொரு காதில் இந்தா இன்னொரு இசை என்று ஸ்டீரியோவைக் காட்டிய சுகத்தை “தப்பட்” பாடல் இப்போது கொடுக்கின்றது. எழுதிக் கொண்டிருக்கும் போது “தப்பட்” பாடல் தான் முன்னுக்கு நிற்கிறது.
“பா” படத்தைத் தொடந்து இந்தப் படத்திலும் “பிட்லி” பாடல் மூலம் அமிதாப் குரல் கொடுத்திருக்கிறார். இப்போதைக்கு இசையை மட்டும் அனுபவிக்கிறேன். காட்சி வடிவத்தோடு காணும் போது இன்னும் நெருக்கமாகும் போல.
சில்சிலா படத்தில் அமிதாப் பாடிய இந்தப் பாடல் எனக்கு மிகவும் பிடித்த ஒன்று http://youtu.be/Jf92MOkrbEw
இந்த இசைத் தொகுப்பில் பாடகர்களின் தேர்வு குறிப்பிட்டுச் சொல்ல வேண்டிய அளவு சிறப்பு வாய்ந்தது.
ஆயிரம் படங்களைத் தொட்ட இளையராஜாவுக்கு “ஷமிதாப்” மேற்கத்தேய இசைக்கும், “தாரை தப்பட்டை” நமது கிராமிய இசைக்குமாக இரு வேறுபட்ட இசைப் படையல்களைக் கொடுக்கும் பொறுப்பைக் கொடுத்திருக்கிறது.
 “ஷமிதாப்” இல் சாதித்து விட்டார்.
“தாரை தப்பட்டை” தரும் அடுத்த கொண்டாட்டத்துக்குக் காத்திருப்போம்.

பாடல் தந்த சுகம் : ஜிங்கிடி ஜிங்கிடி ஒனக்கு

முன்பெல்லாம் சினிமா விவசாயியே தன் பயிரை அறுவடை செய்து சந்தைப்படுத்தக்கூடிய சூழல் இருந்தது.  இன்று அந்த நிலை இல்லை என்ற கசப்பான நிதர்சனத்தை அண்மையில் கமல்ஹாசன் தன் குமுதம் கேள்வி பதில் பகுதியில் சொல்லியிருந்தார்.

அப்படியானதொரு காலகட்டம் எண்பதுகளின் தமிழ் சினிமா. எந்தவொரு துறையின் சரிவோ அல்லது அழிவோ அதன் உச்சத்தை நீண்ட வருடங்கள் எட்டிவிட்டுத் தான் சராலென்று விழுந்து விடும். அப்படியானதொரு காலகட்டம் தமிழ்சினிமாவின் எண்பதுகள்.
குரு சிஷ்யன் படத்தை ரஜினிகாந்த் இன் கால்ஷீட் நெருக்கடியில் அவரிடம் கொடுத்த உறுதிமொழியின் பிரகாரம் வெறும் 28 நாட்களே எடுத்து இயக்கி முடித்த படம் என்று குறிப்பிட்டிருக்கிறார் இயக்குநர் எஸ்.பி.முத்துராமன். நினைத்துப் பார்க்க முடியுமா இப்படியொரு சாதனையை? 
அதுவும் ரஜினிகாந்த், பிரபு ஆகிய உச்ச நட்சத்திரங்களை வைத்து அவரவர் ரசிகர்களையும் திருப்திப்படுத்துவது என்பது இலேசுப்பட்ட காரியமல்ல.
இவ்வாறான தன் சுவாரஸ்யமான பட அனுபவங்களை ஏவிஎம் தந்த எஸ்பிஎம் என்ற நூலில் பதிந்து வைத்திருக்கிறார் எஸ்.பி.முத்துராமன். இந்த நூலாசிரியர் ராணி மைந்தனுடன் நான் எடுத்த பேட்டியை இங்கு கேட்கலாம்.
28 நாட்களில் எடுத்த படம் 175 நாட்கள் ஓடிய வெற்றிச் சித்திரமானது.
குரு சிஷ்யன் படத்தின் வரவால் இன்னும் சில கவனிக்கத்தக்க நிகழ்வுகளும் தமிழ் சினிமாவில் அமைந்தன.
தெலுங்கு சினிமாவில் இருந்து தமிழுக்கு “கெளதமி” என்ற நவ நாகரிக மங்கை கிட்டினார். மேற்கத்தேய நடை உடையிலும் கிராமியத்தனமான பாவாடைத் தாவணியிலும் கலக்கிய மிகச்சில நாயகிகளில் கெளதமி தவிர்க்க முடியாதவர். உதாரணமாக இதே படத்தில் சீதாவின் நாகரிகத் தோற்றம் எடுபடாமல் இருக்கும். குரு சிஷ்யன் படத்தில் கெளதமியின் நடிப்பு தமிழுக்கு அந்நியமில்லாத பாங்கில் இருக்கும்.
ஒரு பக்கம் ரஜினி, கமல் என்று ஜோடி கட்டி ஸ்டைலான பாத்திரப் படைப்புகளும் இன்னொரு பக்கம் ராமராஜனுடன் கிராமியத் தனமான பாத்திரங்களிலும் கலக்கியவர். ஆனாலும் கெளதமியை முதலில் அதிகம் வெளிச்சத்துக்குக் கொண்டு வந்தவை 
ராமராஜனுடன் அவர் நடித்த படங்களே.
பாடகி ஸ்வர்ணலதா முந்திய ஆண்டு எம்.எஸ்.விஸ்வநாதன் இசையில் “சின்னஞ் சிறு கிளியே கண்ணம்மா” என்ற பாரதியார் பாடலை கே.ஜே.ஜேசுதாசுடன் பாடித் தமிழுக்கு முதல் வரவு வைத்தார்.
தொடர்ந்து 1988 இல் குரு சிஷ்யன் படத்தில் இடம்பிடித்த “உத்தம புத்திரி நானு” என்ற பாடல் மூலம் இளையராஜாவின் இசை சாம்ராஜ்யத்தில் அவர் கொடுத்த வெற்றி முத்திரைகளைச் சொல்லவா வேண்டும்?  
குரு சிஷ்யன் படத்தின் ஏனைய பாடல்களை வாலி எழுத “ஜிங்கிடி ஜிங்கிடி உனக்கு” பாடலை மட்டும் இளையராஜா எழுதியிருந்தார். தயாரிப்பாளர் பிரபல பாடலாசிரியர் பஞ்சு அருணாசலமாக இருந்தும் அவர் பாட்டெழுதாதது புதுமை.
இரண்டு ஜோடிப்பாடல்களில் ஒன்றான
“வா வா வஞ்சி இள மானே”
எஸ்.பி.பாலசுப்ரமணியம் & சித்ரா 
குரல்களில் இன்னொரு “இரு விழியின் வழியே நீயா வந்து போனது” ரக துள்ளிசைக் காதல் பாடல்.
இந்தப் படத்தின் பாடல்களில் வந்த புதுசில் பள்ளிக்காலத்துக் காதல்களைச் சீண்டிப் பார்க்க “கண்டு பிடிச்சேன் கண்டு பிடிச்சேன்” பாடல் கை கொடுத்ததைப் பலர் இப்போது ஞாபகப்படுத்த முடியும் 🙂
எஸ்.பி.பாலசுப்ரமணியத்தின் தனித்துவமான சிரிப்புடன் கூடிய பாடலைக் கேட்கும் போதெல்லாம் ஏதோ பழக்கப்பட்ட பாடலைப் பாடிக் கொள்வது போல இவரின் பாணி இருக்கும்.

“”ஜிங்கிடி ஜிங்கிடி உனக்கு இங்கு என்னடி உன் மனக்கணக்கு”  பாடலை 
வாலியோ அல்லது கங்கை அமரனோ இல்லாது போனால் பஞ்சு அருணாசலமோ கூட எழுதியிருக்கலாம் என்று தான் பலர் நினைக்குமளவுக்கு பாடலின் மெட்டுடன் போட்டி போடும் ஜாலியான ஊடல் பொருந்திய வரிகள். ஆச்சரியமாக இந்தப் பாடலை இளையராஜா தேர்ந்தெடுத்து ஏன் எழுதினார் என்பது கண்டுபிடித்துத் திருப்தி காண வேண்டிய இசை ரகசியம்.
எண்பதுகளில் கலக்கிய மனோ, சித்ரா ஜோடிக் குரல்களின் இன்னொரு சூப்பர் ஹிட் பாடல். 
இந்தப் பாடலின் இரண்டாம் சரணத்துக்கு முந்திய இடையிசையில் 2.44 நிமிடத்தில் தொடங்கும் வயலினும் தொடர்ந்து வாசிக்கும் புல்லாங்குழலும் கூட இந்தக் காதலர்களின் ஊடலின் பிரதிபலிப்பாக இருக்குமாற் போலத் தென்படும் அற்புதமான இசைக் கோவை.
“கண்டு பிடிச்சேன் கண்டு பிடிச்சேன்” பாடலும் “ஜிங்கிடி ஜிங்கிடி ஒனக்கு” பாடலும் கிட்டத்தட்ட ஒரே தொனியில் இருக்குமாற் போல வரும் உணர்வு எனக்கு மட்டும் தானா?
“இல்லை தவறவர்க்கு ஆயினும் ஊடுதல்
வல்ல(து) அவர் அளிக்கு மாறு” –  திருக்குறள் 1321
அதாவது காதலரிடத்துத் தவறெதுவும் இல்லையெனினும் ஊடல் மூலமாக அவர் மீதான காதல் இன்னும் பெருக வல்லது என்ற விளக்கத்தைக் கொண்டது மேற்சொன்ன குறள்.
இனி இந்தப் பாடல் காட்சியைக் குறித்த குறளோடு ஒப்பிட்டுப் பாருங்கள். கச்சிதமான பொருள் விளக்கம் மனக்கண்ணில் விரியும்.
http://www.youtube.com/watch?v=wpTK2RLR9cM&sns=em

பாடல் தந்த சுகம் : சந்திரிகையும் சந்திரனும் பேரில் வேறு தானடி

சில இயக்குநர்களின் ராசி அவர்கள் எந்த இசையமைப்பாளர்களுடன் இணைந்து பணிபுரிந்தாலும் அந்தக் கூட்ட்டணி வெற்றிகரமான பாடல்களைக் கொடுத்துவிடும். இயக்குநர் ஶ்ரீதர், பாலசந்தர், பாரதிராஜா, பாக்யராஜ் போன்றோர் இவ்வகையினர். இவர்களுக்குள் இருக்கும் இசை ஞானமும் காட்சிகளுக்கேற்ப எப்படியான பாடலை இசையமைப்பாளரிடமிருந்து தருவிக்க முடியும் என்ற சாமர்த்தியமும் கைவரப் பெற்றவர்கள் இவர்கள்.

இன்னோர் வகையினர் என்னதான் உச்ச இசையமைப்பாளருடன் இணைந்து பணி புரிந்தாலும் அவர்களின் ராசியோ என்னமோ பாடல்கள் அதிகம் கவனிக்கப்படாது கடந்து விடும். அந்த வகையில் இயக்குநர் விசுவின் படங்களில் பெரும்பாலானவை சங்கர் – கணேஷ் இரட்டையர்களின் இசையில் கவனிக்கத்தக்க பாடல்களோடு அமைந்திருந்தாலும், இளையராஜாவோடு இயக்குநர் விசு இணைந்த கெட்டி மேளம் படம் வந்த சுவடே பலருக்குத் தெரிந்திருக்காது. 
அதே வரிசையில் இயக்குநர் வி.சேகர் அவர்களையும் சேர்த்து விடலாம். கிட்டத்தட்ட விசுவின் அடுத்த சுற்றாக இவருடைய படங்களைப் பொருத்திப் பார்க்கும் அளவுக்கு ஏராளமான குடும்பச் சித்திரங்களை உருவாக்கியவர் வி.சேகர்.
“நீங்களும் ஹீரோ தான்” என்ற மாறுபட்ட கதையோடு களம் இறங்கியவருக்கு அடுத்து இயக்கிய “நான் புடிச்ச மாப்பிள்ளை” படத்தின் வெற்றி கை கொடுத்தது. சந்திரபோஸ் இசையில் அந்தப் படத்தில் வந்த “தீபாவளி தீபாவளி தான்” கவனிக்கத்தக்க பாடலாக அனைந்திருந்தது.
இயக்குநர் வி.சேகருக்கு பாடல்களை விட நகைச்சுவை தான் பட ஓட்டத்துக்குக் கை கொடுத்தது. ஆரம்பத்தில் ஜனகராஜ் பின்னர் கவுண்டமணி என்று தொடர்ந்து வடிவேலு, விவேக் என்று நகைச்சுவை நாயகர்களை குணச்சித்திர பாத்திரங்களில் நடிக்க வைத்து வெற்றி பெற்றார். “பொண்டாட்டி சொன்னா கேட்டுக்கணும்” வி.சேகரின் இயக்குநர் வாழ்க்கையில் பெரு வெற்றியைக் கொடுத்த படம்.
இயக்குநர் வி.சேகர் இசைஞானி இளையராஜாவோடு இணைந்த மூன்று படங்களில் “ஒண்ணா இருக்க கத்துக்கணும்”, “பொறந்த வீடா புகுந்த வீடா” இரண்டும் இவரின் தனித்துவமான குடும்பப்படங்கள். இவற்றிலிருந்து மாறுபட்டு முழுமையான காதல் கதையாக இவர் இயக்கிய “பார்வதி என்னைப் பாரடி” தொண்ணூறுகளின் ஆரம்பத்தில் கவனிக்கத்தக்க நாயகனாக வலம் வந்த சரவணன் நடிப்பில் வெளிவந்தது.
“பார்வதி என்னைப் பாரடி” படத்தில் அனைத்துப் பாடல்களும் அட்டகாசம் ரகம். அப்போது சென்னை வானொலியின் வழியாக எனக்கு அறிமுகமான பாடல்கள் வரிசையில் இந்தப் படத்தின் பாடல்களும் சேர்ந்து கொண்டன. 
குறிப்பாக “சின்னப் பூங்கொடி சிந்தும் பைங்கிளி” பாடல்
அப்போது வயசுக்கோளாறுக்கு உரு ஏத்திய பாடல். அப்போது மின்சாரம் இல்லாத காலத்தில் நண்பர்களோடு பங்கு போட்டு 300 ரூபாவுக்கு மண்ணெண்ணை வாங்கி தண்ணீர் இறைக்கும் ஊசிலி மெஷினை ஜெனரேட்டர் ஆக்கிப் பார்த்த படங்களில் இந்தப் படத்தைப் பார்த்து நொந்த நினைவு மறக்க முடியாது.
“மச்சான் அருமையான காதல் கதையடா”என்று கதையளந்து படத்தைப் போட மற்றவர்களையும் சம்மதிக்க வைத்து, பின்னர் படம் ஓடும் போது ஒவ்வொருத்தர் கண்ணும் விஜயகாந்தின் கொவ்வைப் பழக் கண் ஆகாதது தான் மிச்சம் 🙂
எங்களுக்கே இப்படியென்றால் படம் எடுத்த வி.சேகருக்கு எப்படியிருக்கும்? அதன் பிறகு அவர் முழு நீளக் காதல் கதைகளைத் தொடவே இல்லை.
பார்வதி என்னைப் பாரடி படத்துக்கு முன்னர் வி.சேகர் & இளையராஜா கூட்டணியில் வெளிவந்த படம் தான் “பொறந்த வீடா புகுந்த வீடா”.
அப்போதைய தனது ஆஸ்தான நாயகி பானுப்பிரியா மற்றும் சிவக்குமார் நடித்திருந்தனர்.
அந்தப் படத்தின் பாடல்களில் எனக்குப் பெரு விருப்பமான பாடலாக அமைந்தது “சந்திரிகையும் சந்திரனும் வேறு வேறு தானடி”. அப்போது கொழும்பில் இயங்கிய எஃப் எம் 99 என்ற பண்பலை வானொலி தான் இந்தப் பாடலை ஊரெல்லாம் கேட்க வைத்துப் பிரபல்யம் அடைய வைத்தது.
கவிஞர் வாலியின் வரிகளுக்கு மனோ மூன்று விதமாகத் தன் குரல்களை மாற்றிச் சேஷ்டை பண்ணினாலும் (!) கூட இணைந்த சித்ரா, குழுவினரும் பாடலின் இசையும் மெய்மறக்கச் செய்து இசையில் கலக்க வைக்கும்.

பாடல் தந்த சுகம் : மகராஜனோடு ராணி வந்து சேரும்

இன்று காலை வேலைக்குப் பயணித்துக் கொண்டிருக்கும் போது என் காதில் அமர்ந்து பயணித்துக் கொண்டிருந்தது இந்தப் பாடல். 

யாழ்ப்பாணத்தில் இருந்து நிரந்தரமாகப் பிரிகின்றோம் என்று தெரியாமல் அப்போது கொழும்புக்கு மேற்படிப்பின் நிமித்தம் வந்தவேளை இந்தப் பாடலும் அப்போது வெளிவந்த காரணத்தால், எப்போது இதைக் கேட்கும்போதெல்லாம் வெள்ளவத்தை நித்தியகல்யாணி நகை மாளிகையின் மேல் அடுக்கு மாடியில் நண்பர்களோடு குடியிருந்ததை நினைப்பூட்டும். 
ராஜாவின் பாடல்கள் ஏதோதோ சினிமாவின் காட்சிக்களனுக்குப் பயன்படும் நோக்கில் இசையமைத்திருந்தாலும் குறித்த பாடல்களுக்கு நம் பசுமையான நினைவுகளைத் தட்டியெழுப்பும் வல்லமை உண்டு.
சதிலீலாவதி திரைப்படம் கமல்ஹாசனும் பாலுமகேந்திராவும் நீண்ட வருஷங்களுக்குப் பின் இணையக் காரணமான படம். ராஜ்கமல் என்ற கமல்ஹாசனின் சொந்தப் பட நிறுவனமே தயாரித்திருந்தது. வசனத்தை கிரேஸி மோகன் எழுதியிருந்தார். அப்போது ஒரு சஞ்சிகை பேட்டியில் கிரேஸி மோகனின் துணுக்குத் தோரணம் என்ற விமர்சனத்தை  பாலுமகேந்திரா மிகவும் எரிச்சலோடு எதிர்கொண்டார்.
இந்தப் படம் கன்னடத்தில் மீளவும் நாயகன் ரமேஷ் அர்விந்த் இயக்க, கமல்ஹாசன் தமிழில் கோவை வட்டார வழக்கில் பேசி நடித்தது போலவே கன்னடத்தின் ஹூப்ளி வட்டார வழக்கில் பேசி நடித்தார். ராமா பாமா ஷியாமா என்பது கன்னட வடிவத்தின் தலைப்பு.
சதிலீலாவதி படத்தின் அனைத்துப் பாடல்களையும் வாலி எழுதியிருந்தார். 
“மகராஜனோடு ராணி வந்து சேரும் இந்த ராஜயோகம் காலம் தோறும் வாழும்” இந்தப் பாடல் வந்த காலகட்டத்தில் இளையராஜாவின் இசை அதுவரை பயணித்த இசை வடிவத்திலிருந்து மாற்றம் கண்டது. இளையராஜாவின் ஆரம்பகாலம், எண்பதுகள், தொண்ணூறுகள் என்று பிரிக்கும் போது அவரின் இசை வடிவம் ஒவ்வொரு தளங்களிலும் மாறியிருப்பதை அவரின் தீவிர ரசிகர்கள் உன்னிப்பாக அவதானித்திருப்பர். என்னைப் பொறுத்தவரை இந்த “ராஜனோடு ராணி வந்து சேரும்” பாடல் இருபது வருடங்களுக்கு முன்பே தன்னுடைய அடுத்த தலைமுறையான யுவன் ஷங்கர் ராஜா காலத்துக்கு முன்னோடியாக அமைந்ததாகவே எண்ணிக் கொள்வேன்.
தான் கொண்ட கலையைத் தீவிரமாக நேசிக்கும் கலைஞன் என்பவன் தான் வெற்றி பெற்ற அம்சத்தில் இருந்து விலகி, காலத்துக்குக் காலம் புதுமையான படைப்புகளைக் கொடுக்கவேண்டும் என்ற முனைப்போடு இருப்பான். ஜனரஞ்சக ரீதியான வெற்றி தோல்வி என்பது இரண்டாம் பட்சம் தான்.
“எப்படி ஹிட் பாடல்களை அமைக்கிறீர்கள்?” என்ற கேள்விக்கு
“பாடல்களை ஹிட் ஆக்கிவது நீங்க தானே” என்று சொன்ன ராஜாவின் பதில் தான் இதை முன்மொழியும்.
இந்தப் பாடலின் உருவாக்கம் குறித்து அப்போது உதவி இயக்குநராக இருந்த சுகா ஒரு பதிவு எழுதியிருந்தார். அதில் வாத்தியக்கலைஞர் விஜி இம்மானுவேல் இந்தப் பாடலுக்குக் கையாண்ட சாகித்தியத்தையும் சிலாகித்திருப்பார்.
பாடகர் உன்னிகிருஷ்ணனுக்கும் இதுதான் 
இளையராஜாவின் இசையில் முதல் பாடல் என்று நினைவு.
“கங்கைக்கொரு வங்கக் கடல் போல் வந்தான் அவன் வந்தான்” சித்ரா பாடும் போது வங்கக் கடலாய் நெஞ்சில்  கிளர்ந்து எழும் அந்த நினைவுகளைப் புதுப்பித்துக் கொண்டே பயணிக்கிறது பாட்டு.

பாடல் தந்த சுகம் : கதை கேளு கதை கேளு நிஜமான கதை கேளு

பாடல் தந்த சுகம் : கதை கேளு கதை கேளு நிஜமான கதை கேளு.

ஒரு படத்தின் எழுத்தோட்டத்தில் வரும் முகப்புப் பாடல் என்ற வகையில் இந்தப் பாடல் போல ஒப்பீட்டளவில் வேறொன்றும் அதிகம் ஈர்த்ததில்லை. இம்மட்டுக்கும் இந்தப் பாடல் உயர்ந்த கவித்திறன் கொண்ட காதல் ரசம் பொழியும் பாடல் அன்று. 
வெறும் வசனங்களின் கோப்பாகப் பிணைந்த வரிகளும் அவற்றைத் தன் வாத்தியக் கருவிகளில் சுமந்து பயணிக்கும் மாட்டு வண்டிச் சவாரிக்கு ஒப்பானது இந்தப் பாடல்.
மைக்கேல் மதன காமராஜன் படத்தின் முகப்புப் பாடலாக அமையும் இந்தப் பாடலின் வரிகளை படத்தின் தயாரிப்பாளரான பஞ்சு அருணாசலம் எழுத, பாடி இசையமைத்தவர் இசைஞானி இளையராஜா. இந்தப் பாடல் காட்சியின் ஆரம்பத்தில் படச்சுருள் பெட்டியோடு சந்து படம் காட்டும் மனிதராக நடித்திருப்பவர் இப் படத்தின் இயக்குநர் சிங்கிதம் சீனிவாசராவ். 
பாடலைக் கேட்கும் போது ஒரு கதாசிரியர், ராஜாவின் ஒலிப்பதிவுக் கூடத்தின் மெத்தையில் அமர்ந்து படக்கதையின் ஓட்டத்தை ஆரம்பிப்பது போல இருக்கும். 
பொதுவாக இப்படியான சம்பவச் சுருக்கங்களின் முன்னோட்டத்தை (flashback) எழுத்தோட்டத்துக்கு முந்திய காட்சிகளாகவோ அன்றி நிழல் படங்களின் தொகுப்புகளாகவோ அமைத்துக் கொடுப்பது தான் வழக்கம். ஆனால் பாருங்கள் காட்சி வடிவம் நிகழ்காலத்திலிருந்து இறந்த காலத்துக் கதையோட்டத்துக்குப் போகும் போது அந்தக் காலத்து வேகப் பட நகர்வும், கருப்பு வெள்ளை ஒளிப்பதிவுமாக அமைக்கப்பட்டிருக்கும். மூன்று நிமிடம் 51 விநாடிகள் அமைந்த இந்த முன் கதைச் சுருக்கத்துக்கு எத்தனை மினக்கெடல்? அதுதான் கமல்ஹாசனின் தொழில் ஈடுபாடு. இல்லாவிட்டால் 25 வருடங்கள் கழித்து இந்தப் புதுமையான உத்தியைப் பற்றிப் பேசிக் கொண்டிருப்போமா? இல்லாவிட்டால் இதற்குப் பின் இதே போல கன கச்சிதமான பாடலோடு கூடிய முன் கதைச் சுருக்கமும் காட்சி வடிவமும் அமைந்த பாடலைக் கடந்த 25 வருடங்களில் பார்த்திருப்போமா? எனக்கு நினைவில்லை,
ஒரு படத்தின் ஆரம்பப் பாடலை இளையராஜா பாடினால் படம் வசூலை வாரி இறைக்கும் என்பது எண்பதுகளில் சாதித்துக் காட்டிய நம்பிக்கை. “அட கத கேளு கதை கேளு கருவாயன் கதை கேளு” என்று இதே ஆரம்ப அடிகளோடு கரிமேடு கருவாயன் படப் பாடலும், “காட்டு வழி போற பொண்ணே கவலைப்படாதே” என்ற மலையூர் மம்பட்டியான் படப்பாடலும் அந்தந்தப் படங்களின் நாயகனின் குணவியல்பைக் காட்டும் பாடல்களுக்கு உதாரணமாகின்றன.
“மானினமே” என்று முள்ளும் மலரும் படத்திலும், “ஜாக்கிரத ஜாக்கிரத தாய்க்குலமே ஜாக்கிரத”என்று சின்ன வீடு படப்பாடலும் அந்தந்தப் படங்களின் தன்மையைச் சுட்டுவனவாகவும், “அம்மன் கோயில் கிழக்காலே” (சகல கலா வல்லவன்) பொதுவான முகப்புப் பாடல்களாகவும், அப்பனென்றும் அம்மையென்றும் (குணா) போன்ற பாடல்கள் அந்தப் படத்தின் கதைக்களனையும், “குயில் பாட்டு ஓ வந்ததென்ன (என் ராசாவின் மனசிலே) போன்ற உதாரணங்கள் அந்தந்தப் படங்களில் இடம்பிடித்த பிரபலமான பாடல்களின் இன்னொரு வடிவமாகவும் என்று இளையராஜா இந்த முகப்புப் பாடல்களைக் கையாண்டார். இது பற்றி நீண்ட பட்டியல் போடுமளவுக்குப் பாடல்கள் உண்டு. 
இவை தவிர இளையராஜா ஒரு படத்தின் முகப்பு இசைக்குக் கொடுக்கும் மினக்கெடல் சொல்லித் தெரிவதில்லை.
இந்தப் பதிவை எழுதிக் கொண்டிருக்கும் போது “கதை கேளு கதை கேளு” பாடல் துள்ளிக் குதிப்பது போலக் காதில் அசரீரியாகக் கேட்பது போலப் பிரமை. அந்தளவுக்கு மனதில் ஆக்கிரமிப்பை உண்டு பண்ணும் இசையும், கட்டுக்கோப்பான நறுக்கென்ற, அலுப்படிக்காத வரிகளினூடே கதை சொல்லலுமாகப் பயணிக்கும் பாட்டு இது.