பாடல் தந்த சுகம் : துள்ளித் துள்ளிப் போகும் பெண்ணே

சினிமா உலகில் அதிக வெளிச்சம் படாத இயக்குநர் சின்னத்திரையில் சாதித்துக் காட்டுவது உண்டு. இவ்வகையான இயக்குநர்களில் முன்னோடி என்று  சுந்தர் கே.விஜயனைக் குறிப்பிடலாம். இவரின் தந்தை புகழ்பெற்ற இயக்குநர் கே.விஜயன். தயாரிப்பாளர் நடிகர் கே.பாலாஜியின் திரைப்படங்கள் பெரும்பாலும் கே.விஜயனின் இயக்கத்திலேயே இருப்பதுண்டு. தந்தை வழியில் தனயன் சுந்தர் கே.விஜயனும் “ரேவதி” என்ற திரைப்படத்தின் மூலமாக அறிமுகமானார். 
சுந்தர் கே.விஜயன் இசைஞானி இளையராஜாவோடு இணைந்த படம் “என் அருகில் நீ இருந்தால்” அந்தப் படத்தின் பாடல்களைக் காட்சிகளைத் தவிர்த்து இசையை மட்டும் கேட்டுப் பாருங்கள். அருமையான இசைப் பெட்டகம் அது.
ரேவதி என்ற திரைப்படத்தைத் தொடர்ந்து சுந்தர் கே.விஜயன் இயக்கத்தில் வெளிவந்த படம் “வெளிச்சம்”. இந்தப் படத்துக்கு இசை வழங்கிய மனோஜ் கியான் இரட்டையர்கள் அப்போது ஊமை விழிகள் திரைப்படத்தின் வாயிலாகப் பரவலாக அறிமுகமாகியிருந்தார்கள். இளையராஜா காலத்தில் சந்திரபோஸ் இற்கு அடுத்து அதிகம் அறியப்பட்ட இசையமைப்பளார்களாக எண்பதுகளின் இறுதியில் மனோஜ் கியான் இரட்டையர்களின் பங்களிப்பு சிறப்பானது. குறிப்பாக இவர்கள் இசையமைத்த “வெளிச்சம்” திரைப்படம் மற்றைய படங்களைப் போலப் பரவலாக அறியப்படாத படம் என்றாலும் என் பார்வையில் இந்தப் படத்துக்கு இவர்கள் தந்த இசை மற்றைய படங்களை விடத் தனித்துவமாக நிற்கும். குறிப்பாக இரண்டு பாடல்களில் ஒன்று “ஓ மை டியர் ஐ லவ் யூ” பாடலை டாக்டர் கல்யாண், ஜெயச்சந்திரன், வாணி ஜெயராம் குரல்களில் கேட்டுப்பாருங்கள் ஒரு பாடலில்  இரண்டு விதமான தளங்களில் பயணப்படும் முக்கோணக் காதலை அழகாகக் கொடுத்திருக்கும். http://songs.shakthi.fm/ta/Velicham_www.shakthi.fm/shakthi.FM%20%20-%20%20My%20Dear.mp3
வெளிச்சம் படத்தில் வரும் “துள்ளித் துள்ளிப் போகும் பெண்ணே” பாடலை கே.ஜே.ஜேசுதாஸ் பாடியிருப்பார். அந்தக்காலத்துச் சென்னை வானொலி நிலைய நேயர் விருப்பம் வாயிலாக எனக்கு அறிமுகமான பாடலிது. கே.ஜே.ஜேசுதாஸ் பாடிய பாடல்களில் இளையராஜாவுக்குக் கொடுத்தது மட்டுமன்றி ரவீந்திரன் (உதாரணம் ஏழிசை கீதமே, பாடி அழைத்தேன்), சந்திரபோஸ் (சந்தோஷம் காணாத வாழ்வுண்டா) வரிசையில் மனோஜ் கியானுக்காகப் பாடிய பாடல்களைத் தேடிக் கேட்பதே சுகம். மற்ற இசையமைப்பாளர்களின் இசையில் கே.ஜே.ஜேசுதாஸ் இன் குரலுக்குக் கிடைத்த இன்னொரு பரிமாணம் துலங்கும்.
துள்ளித் துள்ளிப் போகும் பெண்ணே பாடலில் இழைத்திருக்கும் மெல்லிசையும், வைரமுத்துவின் அழகிய வரிகளும், ஜேசுதாஸ் இன் குரலும் சேர்ந்து கிட்டிய இந்த அழகிய பாடலை இரவு நேரத்தில் கேட்கும் போது அது தரும் சுகமே தனி.
பாடலை YouTube channel இல் காண 
http://www.youtube.com/watch?v=GyJlJXiS8u4&sns=em

பாடல் தந்த சுகம்: விழிகள் மீனோ மொழிகள் தேனோ

“இளையராஜாங்கிற ராட்சஷன் இந்தக் கல்யாணி ராகத்தை எவ்வளவு அற்புதமா, வித விதமாப் பயன்படுத்தியிருக்கார்” என்று எஸ்.பி.பாலசுப்ரமணியம் அவர்கள் முன்பொரு சூப்பர் சிங்கர் மேடையில் “விழிகள் மீனோ மொழிகள் தேனோ” பாடலை ஒரு போட்டியாளர் பாடி முடித்ததும் சொல்லியிருந்தார்.

ஒரு வருடம் கழித்து மீண்டும் சூப்பர் சிங்கர் மேடை, இது சின்னஞ் சிறாருக்கானது அங்கேயும் இதே பாடல் வந்திருக்கிறது நேற்று. சூப்பர் சிங்கர் ஜூனியர் மேடையில் பிரபலமான குழந்தை ஸ்பூர்த்தி பாடிய விதம் மீண்டும் சிறப்பு விருந்தினராக வந்த எஸ்.பி.பாலசுப்ரமணியம் அவர்களைப் பனிக்கச் செய்திருக்கின்றது. ஸ்பூர்த்தி இந்தப் பாடலை ஆரம்பத்தில் எடுத்த விதம் மாறுதலாக இருந்தாலும் பின்னர் பாடலின் ஜீவனோடு பயணித்து முக்கியமாக அந்த ஆலாபனைகளில் சிறப்பாகப் பாடியிருந்தார்.

“விழிகள் மீனோ மொழிகள் தேனோ” ராகங்கள் மாறுவதில்லை என்ற திரைப்படத்திற்காக பாடலாசிரியர் வைரமுத்து வரிகளில், இசைஞானி இளையராஜா இசையில் எஸ்.பி.பாலசுப்ரமணியம் அவர்கள் பாடியிருந்தார். எண்பதுகளின் முற்பகுதியில் வெளிவந்த இந்தப் படத்தின் பாடலை அப்போது என் அண்ணன் இயக்கிக் கேட்ட எல்.பி ரெக்கார்ட்  வழியாக என் காதுகளுக்குக் கடத்தியது.  அப்போதெல்லாம் எஸ்.பி.பாலசுப்ரமணியம் அவர்களின் பாடல்களை இனம் காணும் அளவுக்கு அறிவிருந்தாலும் இந்தப் பாடலை ஏனோ  பாடகர் பாலமுரளிகிருஷ்ணா அவர்களின் குரலோடு பொருத்தியே மனம் ஒப்புவித்தது.
எப்படி “உறவுகள் தொடர்கதை உணர்வுகள் சிறுகதை” என்ற பாடலை கே.ஜே.ஜேசுதாஸ் குரலுக்குப் பதிலாக ஜெயச்சந்திரன் குரலாகப் பலரால் நினைக்க முடிகின்றதோ அது போல
“ஒரு நாள் போதுமான நான் பாட” என்ற திருவிளையாடல் படப் பாடலை டாக்டர் பாலமுரளி கிருஷ்ணா அவர்கள் பாடும் போது மனம் எஸ்.பி.பியாகவே நினைத்து வைத்திருக்கும். அதற்கு எதிர்மாறாக அமைந்திருக்கிறது இந்த “விழிகள் மீனோ மொழிகள் தேனோ” பாடல்.  ஆனால் எஸ்.பி.பாலசுப்ரமணியம் தான் பாடினார் என்பதற்கு முத்திரையாக ஒரு சங்கதி வந்து விழும் “அடடா கால்கள் அழகிய வாழை” என்று பாடுமிடத்தில் ஒரு வெட்கப் புன்னகை அதுதான் அக்மார்க் எஸ்.பி.பொ

இந்தப் பாடலின் ஆரம்பமே எஸ்.பி.பாலசுப்ரமணியம் அவர்கள் ஆலாபனையோடு தான் வாத்தியக் கருவிகளுக்குக் கடத்தும். ஒரு சாஸ்திரீய சங்கீதத்துக்குண்டான வாத்தியக் கோஷ்டியாக புல்லாங்குழல், மிருதங்கம் எல்லாம் அணி செய்தாலும் மிக முக்கியமாக வயலின் வாத்தியப் பயன்பாடு வெகு உச்சமானது இந்தப் பாடலில். குறிப்பாக 1.14 நிமிடத்தில் வயலின் தனித்து நின்று சிறப்புச் சேர்க்க விட்டேனா பார் என்பது போல புல்லாங்குழலும், மிருதங்கமும் சங்கமிக்கும் போது ஒரு மினி இசை வேள்வியே நடந்து முடிந்திருக்கும்.

இம்மாதியான  எண்பதுகளின் ஆரம்பத்தில் கொஞ்சம் சாஸ்திரீய சங்கீதப் பின்னணி கொண்ட பாடல்கள் பலவற்றுக்கு வார்த்தைகளால் அணி செய்திருக்கிறார் புலவர் புலமைப்பித்தன்.
இந்தப் பாடல் கவிஞர் வைரமுத்து அவர்களால் எழுதப்பட்டிருக்கிறது. எனக்குத் தெரிந்து இந்த அழகிய பாடலை தன்னுடைய மற்றைய பாடல்கள் போல அதிகம் சிலாகித்துப் பேசவில்லை ஆனால் இந்தப் பாடலின் மகத்துவம் இன்னும் சிறப்பானது. “சலங்கை ஒலி”க்கு நிகரானது.
 பாடல் வரிகளுக்குப் பின்னான ஜதிகளை மேலதிகமாகச் சேர்த்த கைங்கர்யம் ராஜாவுடையதாக இருக்கலாம்.
இந்த மாதிரியான பாடல்கள் தலைமுறைகளைத் தாண்டி வாழும் என்பதற்கு 31 வருடங்கள் கழித்து ஸ்பூர்த்தி மெய்ப்பித்திருக்கிறாள்.

விழிகள் மீனோ மொழிகள் தேனோ மூலப்பாடல்

சூப்பர் சிங்கரில்  ஸ்பூர்த்தி பாடியது

முகப்புப் படம் நன்றி: http://www.tamilnow.com

மாண்டலின் ஶ்ரீநிவாஸ் நினைவில்

போன ஜூன் மாசம் தான் சிட்னி இசை விழாவுக்கு வந்து சிறப்பித்து போனவர் இப்படித் தன் 45 வது வயதில் திடீரென்று நம்மைவிட்டு மறைவார் என்று யார்தான் நினைத்திருப்பார்கள். சிட்னி இசை விழாவுக்கு வந்து சிறப்பித்த கலைஞர்களை வானொலிப் பேட்டி காணும் சந்தர்ப்பம் வாய்த்த போது மாண்டலின் ஶ்ரீநிவாஸ் ஐ வானொலிப் பேட்டியெடுக்கவே பெரிதும் முனைந்தேன். ஆனால் அவரின் வருகை விழாவுக்கு முந்திய நாள் என்பதாலும் வேறு சில தனிப்பட்ட காரணங்களாலும் பேட்டி தவிர்க்கப்படவே, அடுத்தமுறை வருவார் தானே என்று காத்திருந்தேன்.

மிக இளவயதிலேயே சாதித்துக் காட்டியதாலோ என்னமோ சீக்கிரமே நம்மிடமிருந்து பிடுங்கப்பட்டுவிட்டார் என்ற பேரதிர்ச்சியை ஜீரணிக்க முடியவில்லை.
மாண்டலின் ஶ்ரீநிவாஸ் என்ற ஆளுமை 90 களின் ஆரம்பத்தில் பரபரப்பாகப் பேசப்பட்ட போது அப்போது சினிமா இசையைத் தவிர வேறெதையும் தொடாத என்னைக் கேட்க வைத்தது அவரின் வாத்திய இசைத் தொகுப்பு ஒன்று. கொழும்பின் பம்பலப்பிட்டி கிறீன்லாண்ட்ஸ் ஹோட்டலில் தூசு படிந்த ஒலி நாடாவை வாங்கி வந்து போட்டுக் கேட்ட நினைவுகள் இன்னும் என் மனக்கிணற்றில் தேங்கியிருக்கின்றன.
இளையராஜாவோடு சேர்ந்து  இவர் பணியாற்றிய அந்தச் சிறப்பு அனுபவங்களையும் பேட்டி வழியாகத் தேக்கி வைக்க நினைத்திருந்தேன்.
மாண்டலின் இசையை நம் வானொலி நிகழ்ச்சிகளில் மன அமைதியைத் தரும் பகிர்வுகளுக்குப் பின்னணி இசையாய் ஒலிக்கவிட்டுக் கொடுப்போம். இனிமேல் அது ஒலிக்கும் போதெல்லாம் உங்கள் ஞாபகமே வெளிக்கிளம்பிச் சஞ்சலப்படுத்தும். 

இசைஞானி இளையராஜா இசையில் பாடலாசிரியர் மு.மேத்தா

இன்று கவிஞர் மு.மேத்தா அவர்களின் பிறந்த நாள். தமிழில் புதுக்கவிதை படைத்த முன்னோடிகளில் சிறப்பான தனியிடம் பெற்றவர் என்ற தகமையைத் தாண்டி, ஈழப்பிரச்சனை குறித்து அன்று தொட்டு இன்றுவரை “தெளிவான” சிந்தனையோடு இயங்கும் மிகச்சில படைப்பாளிகளில் இவரும் ஒருவர் என்ற மேலதிக காரணத்தால் மு.மேத்தா அவர்களின் மீது எனக்கு இன்னும் ஒருபடி அதிகப்படியான நேசத்தை என்னுள் விதைத்து வைத்திருக்கிறேன். ஒருமுறை ஆனந்த விகடனில் இவர் எழுதிய சிறுகதை ஒன்றில் ஈழத்தமிழர் தரப்பின் நியாத்தை மறைபொருளாகச் சுட்டி எழுதியிருந்தார். அதற்கு முன்னரே ஈழத்தின் எண்பத்து மூன்றுகளின் அவலங்களை

“எல்லார்க்கும் விருந்தளித்து 
ஏற்றம் பெற்ற எங்கள் இனம்
மரணதேவதையின் கோரப்பசிக்கு 
விருந்து கொடுத்த பின்
அங்கே இப்போது அகதியானது”
போன்ற புதுக்கவிதைகள் தாங்கிய “திருவிழாவில் ஒரு தெருப்பாடகன்” என்ற தொகுதியில் கொடுத்திருப்பார்.
மு.மேத்தாவின் கவிதைகளை அவரின் “ஊர்வலம்” என்ற கவிதைத் தொகுதியே எனக்கு அறிமுகப்படுத்தியது. பின்னர் அவளுக்கு ஒரு கடிதம், நடந்த நாடகங்கள், முகத்துக்கு முகம், அவர்கள் வருகிறார்கள், கண்ணீர்ப்பூக்கள், வெளிச்சம் வெளியே இல்லை, நந்தவன நாட்கள், மு.மேத்தா முன்னுரைகள், மு.மேத்தா திரையிசைப்பாடல்கள் என்று வாங்கிக் குவித்தேன். பத்து வருடங்களுக்கு முன்னர் “காதலர் கீதங்கள்” என்ற வானொலித் தொகுப்பைத் தயாரித்து வழங்கியபோது வெறுமனே காதல் பாடல்களை மட்டும் சேர்த்து இட்டு நிரப்பாமல், பின்னணி இசையோடு அவரின் கவிதைத் தொகுதிகளில் இருந்து இரண்டடி வரிகளை எடுத்துக் கொடுத்துவிட்டு அதற்கேற்ற சூழலுக்குப் பொருந்துமாற்போலப் பாடல்களை இணைத்துக் கொடுத்தேன். அந்தப் படைப்பு நேயர்களைக் கவரவே பின்னர் தாங்களும் ஈரடிக் கவிதையோடு பாடல்களை இணைத்து வானொலிப் பிரதியாக அனுப்பி நிகழ்ச்சி தயாரிக்க வைத்தார்கள். கிட்டத்தட்ட நான்கு வருடங்கள் இந்த நிகழ்ச்சியைச் செய்தேன்.

மு.மேத்தாவின் புதுக்கவிதைகளை நடிகர் முரளியின் ஏக்கம் கலந்த தொனியில் அந்தக் காதலன் உள்ளக்கிடக்கையாகக் கொடுத்த இதயம் படம் சிறப்பானது.அந்த ஒலிப்பகிர்வுகளை இங்கே கொடுத்திருக்கிறேன்.
http://www.radiospathy.com/2011/02/www-www.html
கண்ணதாசன், வாலி, வைரமுத்து, முத்துலிங்கம் உள்ளிட்ட வெற்றிகரமான திரையிசைப்பாடலாசிரியர்கள் தம் திரையிசை அனுபவங்கள், பாடல் பிறந்த கதைகளை நூலுருவில் கொடுத்தது போன்றே மு.மேத்தா அவர்களும் தனது திரையிசைப்பாடல்கள் நூலில் தன் ஆரம்பகாலப் படங்களின் பாடல்கள் உருவான சுவையான பின்னணி மற்றும் காட்சிக்குப் பொருந்திய பாடல் வரிகளின் நியாயத்தை எல்லாம் நிறுவியிருப்பார். அத்தோடு பிரபல வானொலி, தொலைக்காட்சிப் படைப்பாளர் பி.ஹெச்.அப்துல்ஹமீத் அவர்கள், கலைஞர் தொலைக்காட்சியில் படைத்த இன்னிசை மழை என்ற நிகழ்ச்சியிலும் மு.மேத்தாவின் பாடல் அனுபவங்கள் சிறப்பாகப் பதிவாகியிருக்கின்றன.
“அனிச்ச மலர்” என்ற படத்தில் சங்கர்-கணேஷ் இசையில் அறிமுகமான மு.மேத்தாவுக்கு “ஆகாய கங்கை” என்ற இசைஞானி இளையராஜாவின் இசையில் மலர்ந்த படத்தின் “தேனருவியில் நனைந்திடும்” http://www.youtube.com/watch?v=lrCmn2WdRSE&sns=em என்ற பாடலே அதிக புகழைக் கொடுத்தது. அந்தப் பாடல் வாய்ப்பை மு.மேத்தாவின் நண்பர் கமல்ஹாசனே பெற்றுக் கொடுக்கக் காரணமாக அமைந்தாராம்.
தொடர்ந்து இதய கோவில் படத்தில் இடம்பெற்ற “யார் வீட்டில் ரோஜா பூப்பூத்ததோ”   http://www.youtube.com/watch?v=jRCh-b-a334&sns=em 
நான் சிகப்பு மனிதன் திரைப்படத்தில் இடம்பிடித்த “பெண்மானே சங்கீதம் பாடிவா”  http://www.youtube.com/watch?v=Dj-cimDzqoY&sns=em 
சொல்ல துடிக்குது மனசு படத்தில் வந்த “வாயக்கட்டி வயித்தக் கட்டி” 
http://www.youtube.com/watch?v=JVOdYtytRNk&sns=em
என் புருஷன் எனக்கு மட்டும் தான் படத்தில் வந்த “மனதில் ஒரே ஒரு பூப்பூத்தது” 
http://www.youtube.com/watch?v=Q2VC0QoqHoc&sns=em
கோடை மழை படத்தில் இடம்பெற்ற “பல பல பல பல குருவி” http://www.youtube.com/watch?v=qWyuY1UQyjU&sns=em
போன்ற இனிமையான பாடல்களுக்குச் சொந்தக்காரர் மு.மேத்தா. 
உதய கீதம் படத்தில் வந்த “பாடு நிலாவே தேன் கவிதை” http://www.youtube.com/watch?v=nrTKUhNQaWg&sns=em பாடலை நாயகி பாடுவது போல் ஆரம்பித்து நாயகனும் இணையும் வேளை நாயகனும் பாடு நிலாவே என்று பாடுவது பொருந்தாது ஏனென்றால் அவன் மூடிய சிறைக்குள் இருந்து அவளின் குரல்கேட்டுப் பாடுகிறானே எனவே “பாடும் நிலாவே” என்று மாற்றி பாடல் வரிகளில் நுணுக்கம் இருக்க வேண்டிய தேவையைச் சுட்டினாராம் இளையராஜா.
“ராஜராஜ சோழன் நான்” http://www.youtube.com/watch?v=7f1kEtA-xRM&sns=em என்ற ரெட்டைவால் குருவி படப்பாடலே மு.மேத்தாவைப் பரவலாகக் கொண்டு சேர்த்த இனிய பாடல். அந்தப் பாடல் ஒன்றே போதும் மு.மேத்தாவின் கவிச்சிறப்பைத் திரையில் காட்ட. 
வேலைக்காரன் படத்தின் படக்குழு இயக்குனர் எஸ்.பி.முத்துராமனுடன் வட நாட்டுக்குச் சென்றுவிட, அந்தப் படத்தின் தயாரிப்பு நிறுவனமான கவிதாலயா சார்பில் இயக்குனர் கே.பாலசந்தரே ஒவ்வொரு பாடலுக்குமான கதைக்களனைச் சொல்லி மு.மேத்தாவை அனைத்துப் பாடல்களையும் எழுத வைத்து, இசைஞானி இளையராஜா இசையில் கொண்டுவந்தது ஒரு புதுமை. “தாஜ்மஹாலின் காதிலே ராம காதை கூறலாம்” என்று சமூக சிந்தனையை “வா வா வா கண்ணா வா” காதல் பாடலில் புகுத்தியிருப்பார் மு.மேத்தா.
தன் திரைப்படப் பாடல்கள் தொகுப்பில் கவிஞர் மு.மேத்தா இப்படிக் கூறுகின்றார்.
“தென்றல் வரும் தெரு” http://www.youtube.com/watch?v=oeN1fVS-Psg&sns=em என்று சிறையில் சில ராகங்கள் படத்துக்குப் பாடல் எழுதினேன்.
இப்பாடலின் தொடக்க வார்த்தைகளே பின்னர் நான் நண்பர்களுடன் சேர்ந்து தயாரித்த திரைப்படத்தின் பெயரானது. வேறு பெயர் வைக்கலாம் என்று நான் விரும்பினேன். பெயரை மாற்றக்கூடாது என்று மொத்த யுனிட்டே பிடிவாதம் பிடித்தது.
நான் தயாரித்த “தென்றல் வரும் தெரு” திரைப்படத்திலும் இதே பாடல் வரிகளை முதல் அடிகளாகக் கொண்டே பாடல் ஒன்று இருக்கின்றது. அப்பாடலின் வரிகளை மாற்றலாமே என்று இளையராஜா கேட்டார். கதைச் சூழலுக்காக இந்த வரி கட்டாயம் வேண்டும் என்று வேண்டினோம்.
இரண்டு பாடல்களுக்கும் முதல் வரிகள் இரண்டும் ஒன்றே. இசை வேறு, இரண்டுக்கும் ஒரே இசையமைப்பாளர் இளையராஜா. “தென்றல் வரும் தெரு அது நீ தானே” என்ற பாடல் வரிகளை முதல் அடியாகக் கொண்டு “சிறையில் சில ராகங்கள்” திரைப்படம் 1990 இல் வெளியானது. அது நடிகர் முரளி, பல்லவி நடிப்பில் வெளியானது.அடிகள் பயன்பட்ட மு.மேத்தாவின் தயாரிப்பில் வந்த “தென்றல் வரும் தெரு” ரமேஷ் அரவிந்த், கஸ்தூரி நடிப்பில் வெளியானது. நான்கு ஆண்டுகள் கழித்து 1994 இல் தான் படம் வந்தது.
இந்தப் படத்திலும் தென்றல் வரும் தெரு http://www.youtube.com/watch?v=ZvtCLpjMnvw&sns=em என்று இன்னொரு பாடலை எழுதியிருப்பார் மு.மேத்தா.
மு.மேத்தாவின் திரையிசைப் பயணத்தில் இப்படிக் கிட்டிய எண்ணற்ற முத்துகள் ஏராளம்.
இசைஞானி இளையராஜாவுடன் இணைந்து பணிபுரியும் பாடலாசிரியர்களில் வாலிக்குப் பின்னர் இன்னமும் தொடர்ந்து சேர்ந்திசையாகப் பயணிக்க்கும் கவிஞர் மு.மேத்தாவுக்கு இனிய பிறந்த நாள் வாழ்த்துகள்.

பாடல் தந்த சுகம் : நந்தவனம் பூத்திருக்கு அடி அம்மாடி

ஒரு மலையாளப்படம் மூன்று மலையாளத்திரையுலக இயக்குனர்களால் மூன்று வெவ்வேறு மொழிகளில் எடுக்கப்பட்டது என்ற பெருமையைப் பெற்ற படம் “சன்மனசுள்ளவர்க்கு சமாதானம்”.

மலையாளத் திரையுலகின் ஜனரஞ்சக இயக்குனராக இருக்கும் சத்யன் அந்திக்காட் இன் படங்களை விலாவரியாகப் பதிவுகள் போடுமளவுக்கு இவரின் படங்கள் மீது எனக்குக் கொள்ளைப் பிரியம். இந்த “சன்மனசுள்ளவர்க்கு சமாதானம்” படம் அவரின் இயக்கத்தில் மோகன்லால், காத்திகா, சிறீனிவாசன் உள்ளிட்டோர் நடிப்பில் வந்த படம். 
பின்னர் தமிழுக்கு இந்தப் படத்தின் கதையோடு மலையாளத்தின் இன்னொரு பெரும் இயக்குனர் ஐ.வி.சசி மூலமாக “இல்லம்” என்ற பெயரில் எடுக்கப்பட்டது. 
ஹிந்திக்கு மலையாளப் படங்களைச் சுட்டும் சுடாமலும் தூக்கிக் கொண்டு போய் டிங்கரிங் செய்து படமெடுக்கும் மலையாள நட்சத்திர இயக்குனர் பிரியதர்ஷன் கையகப்படுத்தி சுனில் ஷெட்டியை வைத்து இயக்கினர். ஆக மொத்தத்தில் மூன்று பிரபல மலையாள இயக்குனர்கள் வெவ்வேறு மொழிகளில் இயக்கிய சன்மானத்தைப் பெற்ற படம் இது.
ஐ.வி.சசி தமிழில் பகலில் ஓர் இரவு, குரு, காளி போன்ற படங்களை இயக்கியிருக்கிறார். கமல் நடித்த குரு படம் யாழ்ப்பாணம் வெலிங்டன் தியேட்டரில் 200 நாட்களைக் கடந்து ஓடிய படம். அப்போது சின்னப்பிள்ளையாக இருக்கும் போது வீரகேசரி பேப்பரில் குரு படம் நாட்கணக்கில் ஓடும் விளம்பரங்களைப் புதினமாகப் பார்த்ததுண்டு. அப்பேர்ப்பட்ட புகழ் கொடுத்த குரு படத்தை ஐ.வி.சசிக்கு “இல்லம்” இடம் கொடுக்கவில்லை. சிவக்குமார், அமலா, சந்திரசேகர் போன்றோர் முக்கிய பாத்திரத்தில் நடித்த படம் அது.
சிவக்குமாரை அமலாவோடு சேர்த்து படம் இயக்கும் போதே பாதி சறுக்கல் தெரிந்திருக்கணும். இல்லத்தை இல்லாமல் செய்துவிட்டார்கள் ரசிகர்கள். 
ஆனால் வழக்கம் போல இந்தப் படத்தையும் தூக்கி நிறுத்தி இன்றளவும் பேச வைத்தது இசைஞானி இளையராஜாவின் இசை. படத்தின் அனைத்துப் பாடல்களையும் கங்கை அமரன் எழுதியிருந்தார். அதிலும் குறிப்பாக “நந்தவனம் பூத்திருக்கு அடி அம்மாடி வண்டு வந்து ஆடிப்பாடத்தான்” என்ற பாடல் அந்த நாளில் வானொலிப் பிரியர்களுக்கு பெரு விருந்தாக அமைந்தது. இந்தப்பாடலின் சிறப்பு என்னவென்றால், 
“அழகென்ற விருந்து வைத்தாள் இயற்கை அன்னை
அதைப்பாடப் படைத்து விட்டாள் கவிஞன் என்னை
இளகாத இளமனதை இளக வைத்து 
இன்பத்தை என்னோடு தவழ வைத்து” 
என்று ஒரு தொகையறாவைக் கொடுத்து விட்டு ” நந்தவனம் பூத்திருக்கு அடி அம்மாடி வண்டு வந்து ஆடிப்பாடத்தான்” என்று ஆரம்பித்துக் குதூகலமாகப் பாடியளிப்பார் எஸ்.பி.பாலசுப்ரணியம். இளஞ்சோலை பூத்ததா போன்ற பாடல்கள் எல்லாம் இந்தப் பாடலுக்கு அண்ணன், தம்பி உறவு அவ்வளவுக்கு நெருக்கமான சங்கதிகளோடு அமைந்த பாடல்கள் இவை. இந்தப் பாடல் இசையின்றி ஆரம்பித்து பின் மேற்கத்தேய வாத்தியப் பின்னணிக்கு மாறிப் பின்னர் சரணத்தில் தாள வாத்தியக் கட்டுக்குத் தாவும் ஆனால் கேட்கும் போது எந்த நெருடலும் தெரியாத இசைப்பந்தம் இருக்கும். 

யுவன் ஷங்கர் ராஜா கொடுத்ததில் பிடித்த ஐம்பது

வீட்டில் ஒரு பிள்ளையை பெரிதும் நம்பிக் கொண்டிருக்க, இன்னொரு பிள்ளை சத்தமில்லாமல் ஜெயித்துக் காட்டுவது தமிழ் சினிமாவின் மாமூல் கதைகளன் மட்டுமல்ல ராஜா வீட்டிலும் இதுதான் கதை. 

அம்மா கிரியேஷன்ஸ் சிவாவே இசையமைப்பாளராக யுவன் ஷங்கர் ராஜாவின் வருகையை அரவிந்தன் படம் மூலமாக வழியேற்படுத்திக் கொடுத்தார்.
ஆனால் யுவன் ஷங்கர் ராஜா ரசிகர்களின் பரவலான அறிமுகத்தைப் பெற வசந்த் இயக்கத்தில் பூவெல்லாம் கேட்டுப் பார் படம் வரை காத்திருக்க வேண்டியிருந்தது. தொடர்ந்து செல்வராகவனும் சினிமாவுக்கு வந்து சேர துள்ளுவதோ இளமை, காதல் கொண்டேன், 7ஜி ரெயின்போ காலனி என்று தொடர்ந்த இசை வெற்றிகளையும் கொடுத்தார் யுவன்.
யுவன் ஷங்கர் ராஜாவின் பாடல்களில் ஒட்டுமொத்தமாக எல்லாப்பாடலும் சிறந்து விளங்கிய மிகச் சிறந்த இசைப்படைப்பு எது என்று கேட்டால் ஒவ்வொருவரும் ஒவ்வொன்றைச் சொல்வார்கள். அதில் 7ஜி ரெயின்போ காலனி பெருவாரியான வாக்குகளைப் பெறும். ஆனால் எனக்குத் தனிப்பட்ட ரீதியில் தீனா படத்தின் பாடல்கள் மீது தான் கொள்ளை ஆசை. யுவனோடு ஜோடி கட்டிய ஏ.ஆர்.முருகதாஸ் இற்கு இன்று வரை அதற்குப் பின்னால் ஒட்டுமொத்தப் பாடல்களும் சிறந்து விளங்கிய படம் வரவில்லை என்பேன்.
யுவனின் இசையுலக வெற்றிக்கு வஸந்த், செல்வராகவன் போன்ற இயக்குனர்களின் கையைப் பிடித்து இழுப்பார்கள். ஆனால் முன்னர் நான் ட்விட்டரில் சொன்னது போன்று யுவன் ஷங்கர் ராஜா பிரபலமாகப் பேசப்படும் படங்களை விட அதிக கவனத்தை ஈர்க்காத படங்களிலேயே அதிகம் சாதித்திருக்கிறார். ஆனால் அந்தப் பாடல்களைத் தேடிக் கேட்கும் பொறுமை அநேகருக்கு இல்லை. 
இளையராஜா காலத்துக்குப் பின்னர்  கூட்டணி ஆட்சி தான் இசைத்துறையில். அதிலும் தனித்து நின்று ஜெயிப்பதும், ( தகப்பனின் நிழல் படாமல் ) அவ்வளவு சுலபமில்லை. யுவனுக்கு அரவிந்தன் படம் எவ்வளவு முதல் சரிவைக் கொடுத்ததோ அது போலவே அவரின் இசைப்பயணத்தில் வெற்றியும் சறுக்கலும் மாறி வருகிறது. ஆனால் தகுந்த சந்தர்ப்பம் கிடைக்கும் போது அடித்து ஆடுவார். இன்றைய சூழலில் யுவனுக்கு மட்டுமல்ல ஒட்டுமொத்த இசையமைப்பாளருக்குமே சீரான சகாசங்கள் கிடைப்பதில்லை.
யுவன் இசையமைத்த சில பாடல்களைக் கேட்கும் போது நம்பவே முடியாத அளவுக்கு மெட்டமைப்பும், இசைக்கோர்ப்பும் இருக்கும். இசை சம்பந்தமாக யுவனிடம் கேட்கும் கேள்விகளுக்கு அவரின் பதில்களைப் படித்துப் பாருங்கள் நிறையவே தெளிவிருக்கும். 
யுவன் ஷங்கர் ராஜாவின் பாடல்களில் என்னைக் கவர்ந்த ஐம்பது பாடல்களை இன்று அவரின் பிறந்த நாளில் கொடுக்கும் வாய்ப்புக்கிட்டியிருக்கிறது. இந்தப் பதிவே அஜித் மாதிரி எழுதினேன். ஹிஹி அதாவது நடந்து கொண்டே.
இந்தப் பட்டியல் எந்தத் தரவரிசையும் கொண்டிராது என் ஞாபக அடுக்குகளின் வெளிப்பாடு மட்டுமே.
1. நினைத்து நினைத்துப் பார்த்தேன் – 7G ரெயின்போ காலணி
2. சொல்லாமல் தொட்டுச் செல்லும் தென்றல் – தீனா
3. யாரோ யாருக்கு – சென்னை 28
4. சின்னஞ்சிறுசுக மனசு – குங்குமப் பூவும் கொஞ்சும் புறாவும்
5. ஆனந்த யாழை மீட்டுகிறாள் – தங்க மீன்கள்
6. இரவா பகலா – பூவெல்லாம் கேட்டுப்பார்
7. வயது வா வா என்கிறது – துள்ளுவதோ இளமை
8. தொட்டு தொட்டு – காதல் கொண்டேன்
9. இதயம் இதயம் – பில்லா 2
10. தீப்பிடிக்க தீப்பிடிக்க – அறிந்தும் அறியாமலும்
11. மேற்கே மேற்கே – கண்ட நாள் முதல்
12. தாவணி போட்ட தீபாவளி – சண்டக்கோழி
13. காதல் வைத்து – தீபாவளி 
14. இதுவரை இல்லாத – கோவா
15. ஐய்யய்யோ – பருத்தி வீரன்
16. என் ஃபியூசும் போச்சு – ஆரம்பம்
17.  துளி துளி மழையாய் – பையா
18. என் அன்பே – மெளனம் பேசியதே
19. என் ஜன்னல் வந்த காற்று – தீராத விளையாட்டுப் பிள்ளை
20. இறகைப் போல – நான் மகான் அல்ல
21. பேசுகிறேன் – சத்தம் போடாதே
22. அடடா என் மீது – பதினாறு
23. என்ன என்ன ஆகிறேன் – காதல் சொல்ல வந்தேன்
24. சொல் பேச்சு – தில்லாலங்கடி
25. ஏதோ செய்கிறாய் – வாமனன்
26. மஞ்சக்காட்டு மைனா – மனதை திருடி விட்டாய்
27. முன்பனியா – நந்தா
28. ஈர நிலா – அரவிந்தன்
29. கொங்கு நாட்டு – வானவராயனும் வல்லவராயனும்
30. வானம் தூவும் – புன்னகை பூவே
31. ஏ நெஞ்சே – ஏப்ரல் மாதத்தில்
32. தீண்டி தீண்டி – பாலா
33. காதல் வளர்த்தேன் – மன்மதன்
34. தாஜ்மஹால் – கள்வனின் காதலி
35. எங்க ஏரியா – புதுப்பேட்டை
36. அரபி நாடே – தொட்டால் பூ மலரும்
37. ஆத்தாடி மனசு தான் – கழுகு
38. மெர்க்குரி பூவே – புதிய கீதை
39. காதல் என்பது – ஒரு கல்லூரியின் கதை
40. ஒரு கல் ஒரு கண்ணாடி – சிவா மனசுல சக்தி
41. கோடானு கோடி – சரோஜா
42. அலைபாயும் நெஞ்சிலே – ஆதலால் காதல் செய்வீர்
43. ராசாத்தி போல – அவன் இவன்
44. நீ நான் – மங்காத்தா
45. வெண்மேகம் – யாரடி நீ மோகினி
46. மச்சான் மச்சான் – சிலம்பாட்டம்
47. இரு கண்கள் சொல்லும்  – காதல் சாம்ராஜ்யம்
48. வானத்தையும் மேகத்தையும் – மச்சக்காரன்
49. பறவையே பறவையே – கற்றது தமிழ்
50. நட்பின் கதைகளை – காதல் 2 கல்யாணம்

பாடல் தந்த சுகம் : நிக்கட்டுமா போகட்டுமா நீலக்கருங்குயிலே

“ஒரு பாட்டுக்கு மெட்டமைத்து விட்டு, வார்த்தைகளால் அந்த டியூன் மேல நடந்து பார்த்து சரி பார்ப்பது இசைஞானி இளையராஜாவின் வழக்கம்” இந்தப் பாடலை எழுதிய கவிஞர் மு.மேத்தா இப்படிச் சொல்லியிருந்தார். கூடவே “இந்தப் பாடலின் ஆரம்ப வரிகளான “நிக்கட்டுமா போகட்டுமா நீலக்கருங்குயிலே” ஐயும் கொடுத்தது இளையராஜா தான். அவரின் இசையில் வெளிவந்த பல பாடல்களின் ஆரம்ப வரிகளின் சொந்தக்காரரும் அவர் தான் என்று சொல்லி வைத்தார் மேத்தா.

“நிக்கட்டுமா போகட்டுமா” பாடல் சென்னை வானொலி எனக்கு அறிமுகப்படுத்திய இன்னொரு பாடல். விமானக் குண்டு வீச்சுகள் உச்சம் பெற்ற போர்க்காலங்களில் சைக்கிளின் டைனமோவைச் சுழற்றி மின் பிறப்பாக்கி, அதை வானொலிப்பெட்டிக்குள் செருகிப் பாட்டுக் கேட்ட சிரம காலத்தில் கிட்டிய சிகரப் பாட்டுகளில் ஒன்று என்பதாலோ என்னமோ இன்றும் என் பிரிய நாய்க்குட்டி போல எனக்கு நெருக்கமான பாடல்களில் இதுவுமொன்று.

நாடக நடிகராக வேஷம் கட்டிய காலத்தில் இருந்தே ராஜாவுடன் ஒட்டுறவாக இருந்த சங்கிலி முருகன் தயாரித்த மீனாட்சி ஆட்ஸ் நிறுவனத்தின் படங்களின் பாடல்களுக்கு ஒரு தனிக்கவனம் இருக்குமாற் போல இருக்கும். அப்படிப்பட்ட படங்களில் ஒன்று தான் “பெரிய வீட்டுப் பண்ணக்காரன்”.
கார்த்திக், கனகா  நடித்த இந்தப் படத்தில் ” மல்லிகையே மல்லிகையே தூதாகப் போ” பட்சமுள்ள பாட்டை மறக்க முடியுமா?

மு.மேத்தா “நிக்கட்டுமா போகட்டுமா  நீலக்கருங்குயிலே” என்று தொடங்கும் இந்தப் பாடலின் வரிகளை அவ்வளவு உன்னிப்பாகக் கவனித்ததில்லை அப்போதெல்லாம். ஆனால் பாடலை நேசிக்க ஆரம்பிக்கக் காரணமான இசையில் மூழ்கித் திளைத்த பிறகு அடுத்தது என்ன என்று வரும் போது வரிகளையும் அரவணைக்க வைத்து விடும். அப்படி ஒன்றுதான் இது.

ஓடையில் நான் அமர்ந்தேன் 
அதில் என் முகம் பார்த்திருந்தேன்
ஓடையில் பார்த்த முகம் 
அது உன் முகம் ஆனதென்ன
வாடையில் வாடிடும் பூவினைப் போல்
என் நெஞ்சமும் ஆனதென்ன

என்று காதலி கேட்க

தேரடி வீதியிலே ஒரு தோரணம் நான் தொடுத்தேன்
தோரண வாசலிலே ஒரு தோழியைக் கைப்பிடித்தேன்
பிடித்த கரம் இணைந்திடுமா இணைந்திடும் நாள் வருமா

என்று காதலன் தொடர்வான். பாடலின் முதல் சரணம் காதலர்களுக்கிடையிலான கேள்விக்கணைகளில் அவர்களின் நேசம் தான் தொக்கு நிற்கும்.
இப்படியான எளிமையான வரிகளால் நடை பழகிய மு.மேத்தாவைத் தன் பிரிய வட்டத்தில் ராஜா வைத்திருப்பதில் சந்தேகமே எழாது. அந்தச் சூழலுக்கேற்பத் தன்னை இறக்கிக் காட்சிக் களத்தில் எளிமையை வரிகளாக்கி, மெட்டுப் பாதையில் நிதான நடை போட்டால் அந்தப் பாதை போட்டவருக்கு வேறென்ன திருப்தி வேண்டும்.

இந்தப் பாடலுக்கும் சரி, மல்லிகையே மல்லிகையே தூதாகப் போ என்ற சக பாடலிலும் சரி நுரை தள்ளும் பிரவாகத்தோடு கோரஸ் குரல்களின் ஆர்ப்பரிப்பைக் கேட்கும் சுகானுபவம் சொல்லில் அடங்காது.

“நிக்கட்டுமா போகட்டுமா” என்ற இந்தப் பாடலை நான் இசைஞானியின் கோரஸ் குரல்கள் போட்டியில் http://radiospathy.wordpress.com/2014/04/12/rajachorusquiz47_48/ கொடுத்த போது போட்டியாளராக வந்து சிறப்பித்த உமா கிருஷ் இந்தப் பாடல் குறித்த சிலாகிப்பை

இந்தப் பாட்டும் மதுரை,தேனி பக்கம் எடுக்கப்பட்ட ஒன்றுதான்.மலை பின்னணியில்தங்கக் கோபுரம் தெரிய ஆடுவது இயற்கை எழில் கொஞ்சும் அழகர் கோவில். இந்தப் படத்தில் வரும் பல்லாக்குக் குதிரையில பாடல் தான் இன்றளவும் மீனாட்சி பவனி வரும் பொழுது சும்மா அதிரும் ஸ்பீகர்ல :)அந்தப் பாடலில் கார்த்திக் அணிந்திருக்கும் கெட் அப் கள்ளழகர் வேடத்தை முன் மாதிரியாகக் கொண்டது .அதுல பெட்டி சுமந்து வருவது போல இன்றளவும் பெட்டியில் அம்மனை வைத்துக் கும்பிடும் கிராமத்திற்கு வருடா வருடம் சிவராத்திரிக்கு நான் செல்வதுண்டு .அப்படியே மண் மணத்தை படம் பிடித்த படங்களும் பாடல்களும் இவை எல்லாம்.அதனால் எனக்கு மிகப் பிடித்தவை.

இப்படிப் பகிர்ந்திருந்தார். இப்படியான இசை ரசனைகளைக் கேட்டு ரசிப்பதற்காகவே எத்தனை ஆயிரம் போட்டியும் வைக்கலாம் போல.

நான் அடிக்கடி நினைப்பதுண்டு,  தமிழகம் இன்னொரு வகையில் புண்ணியம் பெற்றிருக்கின்றது. எத்தனை எத்தனை ஆயிரம் பாடல்கள் உருப்பெற்ற போது அந்தப் பாடல்களின் காட்சி வடிவத்தில் தமிழகத்து நிலமெல்லாம் காட்சிப்படுத்தப்பட்டிருக்கும் பாக்கியம் பெற்றிருக்கின்றது. அதிலும் குறிப்பாகக் கிராமிய மணம் கமழும் இம்மாதிரியான பாடல்களை எத்தனை ஆண்டுகள் கடந்தும் அந்த மண் மணத்தோடு சேமித்து வைத்திருக்கின்றது பாருங்கள்.

துல்லிய இசைவடிவத்தோடு நான் இட்ட யூடியூப் பகிர்வு


https://www.youtube.com/watch?v=R_53xz-z34Y&feature=youtu.be

காட்சிப்பகிர்வோடு இந்தப் பாடல்

https://www.youtube.com/watch?v=kCeOlgAokjw

சங்கீத சாகரம் கே.ஜே.ஜேசுதாஸ் பேசுகிறார்

சிட்னியில் இசை நிகழ்ச்சி படைக்க வருகை தரும் இசையுலக ஜாம்பவான், பாடகர் டாக்டர் கே.ஜே.ஜேசுதாஸ் அவர்களை நமது ஆஸி தமிழ் ஒலிபரப்புக் கூட்டுத்தானம் (ATBC) வானொலி சார்பில் பேட்டி காணும் வாய்ப்பு எனக்குக் கிட்டியது.

இதோ அந்தப் பேட்டியின் ஒலி வடிவம்

Download பண்ணிக் கேட்க

என்னுடைய வானொலி வாழ்வில் இன்னொரு மறக்கமுடியாத தருணம் அது. பேட்டி முடியும் போது “பிரபாங்கிற பேரைக் கேட்கும் போது சந்தோஷமா இருக்கு ஏன்னா என் மனைவி பேரும் பிரபா ஆச்சே” என்றார் சிரித்துக் கொண்டே.

வானொலிப் பேட்டிக்காக நேற்று நான் கே.ஜே.ஜேசுதாஸ் அவர்களை அழைக்க நினைத்த போது கொஞ்சம் தயக்கத்தோடு தான் தொலைபேசியை அழைத்தேன். ஆனால் “ச்சொல்லுங்கோ ப்ரபா எப்பிடி இருக்கீங்க? பேட்டி அஞ்சு மணிக்குத் தானே நான் தயாரா உட்கார்ந்திருப்பேன்” என்ற போது என் மனதில் இன்னொரு படி உயர்ந்து நின்றார். நிறைகுடம் ஆச்சே.
சமீபகாலமாக இளம் பாடகர்கள் ஆஸி மண்ணுக்க் வரும்போது அவர்கள் செய்யும் இசை நிகழ்ச்சிகளுக்காக சிறப்புப் பேட்டிகளைச் செய்யும் போது சிலர் கொடுத்த அலும்பில் அசதியாகியிருந்த என் மனதுக்கு ஒத்தடமாக இருந்தது கே.ஜே.ஜேசுதாஸ் அவர்களுடனான உரையாடல்.

வானொலிப் பேட்டியில் சேர்த்துக் கொண்ட கேள்விகள் சிலவற்றை இங்கே தருகின்றேன். விரைவில் அந்தப் பேட்டியை ஒலி வடிவில் பகிர்கின்றேன்.

இசை உலகில் ஒரு நீண்ட வரலாற்றைச் சுமந்து நமக்கு முன்னால் இருக்கும் உங்களைப் பார்ப்பதே நமக்குப் பெரும் தவம், மீண்டும் ஆஸ்திரேலிய ரசிகர்களை நீங்கள் சந்திக்க வருகின்றீர்கள் என்பது எங்களுக்கெல்லாம் இரட்டிப்பு மகிழ்ச்சியாக இருக்கிறது.

ஜேசுதாஸ் அவர்களின் பாடல்களைக் கேட்கும் போது மனதில் அமைதி பிறக்கின்றது, சோகப்பாடல்களைக் கேட்கும் பொது எம்மை அறியாமல் அழுதுவிடுகின்றோம் இப்படியெல்லாம் ரசிகர்கள் சொல்லக் கேட்டிருக்கிறோம் இந்த மாதிரி அனுபவங்களை எப்படிப் பார்க்கின்றீர்கள்?

நீங்கள் நேசிக்கின்ற சாஸ்திரீய சங்கீதத்தை மகத்துவம் செய்து வந்த படங்களில் மலையாளத்தில் பரதம் உள்ளிட்ட ஏராளம் படங்கள், தமிழில் அபூர்வ ராகங்கள், சிந்து பைரவி தெலுங்கில் மேக சந்தேசம் போன்ற படங்கள் கிட்டிய போது உங்கள் உணர்வு எப்படி இருந்தது?

சினிமாவில் மிக உயர்ந்த இடத்தைப் பெற்ற போதும் சாஸ்திரீய சங்கீதமேடையை நீங்க விட்டுக் கொடுத்ததே இல்லை இசைக்கலைஞராக இந்த இரண்டு தளங்களிலும் இயங்குவதை எப்படி எடுத்துக்கொள்கிறீர்கள்?

ஹரிவராசனம் என்ற பாடலைப் பாடும் போது நீங்க பயபக்தியோடு விரதமிருந்து பாடியதாக அறிகின்றோம். ஐயப்ப பக்தர்கள் என்ற அடையாளம் தாண்டி அந்தப் பாடல் எல்லா இசை ரசிகர்களுக்கும் ஒரு தெய்வீகச் சூழலுக்கு இழுத்துச் செல்லும், அந்தப் பாடல் பாடிய அனுபவம்?

திரையுலகில் ஐம்பது ஆண்டுகளைக் கடந்த இசைப்பயணத்தின் கெளரவ நிகழ்வில் இசைஞானி இளையராஜா வந்து கலந்து சிறப்புச் சேர்த்தார், திரையிசையில் இளையராஜாவின் பங்களிப்பு குறித்து உங்கள் பார்வை?

சாஸ்திரீய சங்கீதம் தழுவிய பாடல்களைத் தவிர நிறைய மேற்கத்தேய பாடல்களை இளையராஜா கொடுத்திருக்கிறார். குறிப்பாக ஆரம்ப காலத்தில் வச்ச பார்வை தீராதடி போன்ற பாடல்களில் ஆரம்பித்தது அந்த மாதிரிப் பாடல்கள் கிடைத்தபோது எப்படி எடுத்துக் கொண்டீர்கள்?

வடக்கும் நாதன் படத்தில் கங்கே என்ற பாடலை நீங்கள் பாடிய அந்தக் கணத்தை திரையில் கண்ட போது கண்கள் கலங்கியது உங்க ஆத்ம நண்பர் ரவீந்திரனை நினைத்துக் கொண்டேன் அப்போது, இசையமைப்பாளராக அவர் இயங்கியபோது உங்க அனுபவம்?

ரவீந்திரன் மாஸ்டர் குறித்து நிறையப் பேசினார் ஆசை தீர. குறிப்பாக கங்கே பாடலின் உருவாக்கம் பற்றியும்.

இன்று காதலிக்க நேரமில்லை படம் வெளிவந்து ஐம்பது ஆண்டுகளைக் கொண்டாடும் நிகழ்வுக்கு திடீர் அழைப்பு வந்ததாக் குறிப்பிட்டு அந்தப் படத்தின் நினைவுகளையும் பகிர்ந்து “என்ன பார்வை உந்தன் பார்வை” போன்ற பாடல்களையும் பாடி நிறைவு செய்துகொண்டார் பெருமதிப்புக்குரிய கே.ஜே.ஜேசுதாஸ் அவர்கள்.

பாடகர் விஜய் ஜேசுதாஸ் வழங்கிய வானொலிப் பேட்டி

சிட்னியில் இசை நிகழ்ச்சி படைக்க வருகை தரும் பாடகர் விஜய் ஜேசுதாஸ் அவர்களை நமது ஆஸி தமிழ் ஒலிபரப்புக் கூட்டுத்தானம் (ATBC) வானொலி சார்பில் கண்ட ஒலிப்பேட்டியினை இங்கே பகிர்கின்றேன்.

இதோ அந்தப் பேட்டியின் ஒலி வடிவம்

Download பண்ணிக் கேட்க

பேட்டியில் இடம்பெற்ற சில கேள்விகள்

சினிமாவில் வாரிசுகள் ஜெயிப்பது சவாலான காரியம் ஆனால் உங்களுக்கு என்று தனி இடம் கிடைச்சிருக்கு இதை எப்படிப் பார்க்கிறீங்க?

உங்க அப்பா மிகப்பெரும் பாடகர் என்பதோடு பாடும்போது எந்த சமரசமும் செய்யக்கூடாதுன்னு பேட்டிகளிலேயே சொல்லுமளவுக்கு கண்டிப்பானவர் பாடகரா நீஙக் சினிமாவுக்கு வந்ததை எப்படி ஆரம்பத்தில் எடுத்துக் கொண்டார் இப்போ உங்க வளர்ச்சியை எப்படிப் பார்க்கிறார்?

சமீபத்தில் மெமரிஸ் படத்தில் திரையும் பாடலுக்கு பெரும் வரவேற்பு கிட்டியிருக்கிறது அந்தப் பாடல் பாடிய அனுபவம் பற்றிச் சொல்லுங்களேன்

நீங்க பாட ஆரம்பிச்சு குறுகிய காலத்தில் இசைஞானி இளையராஜாவிடம் பாடியிருக்கீங்க ராஜா சார் உடன் பணியாற்றிய அனுபவத்தை அறிய ஆவல்

சிவாஜி திரைப்படம் வழியாக ரஹ்மான் உங்களுக்கு ஒரு அறிமுகத்தைக் கொடுத்திருந்தார் அதன்பின்னான வாய்ப்புகள் பற்றி சொல்லுங்களேன்?

தாவணி போட்ட தீபாவளின்னு மெலடி பாடல்களையும் பாடுறீங்க, திடீர்னு மாமா மாமான்னு டப்பாங்குத்துப் பாட்டிலும் கலக்குறீங்க உங்களுக்கு எந்த மாதிரிப்பாடல்கள் பாடுவது மன நிறைவைக் கொடுக்குது?

மலையாளத்தில் உங்க அப்பா ஜேசுதாஸ் ஐ ஆண்டவனின் இசைத்தூதுவரா போற்றிப் பாராட்டும் சூழலில் உங்களுக்கு ஆரம்பத்தில் இருந்தே நல்ல பல பாடல்கள் கிட்டியிருக்கு குறிப்பாக அங்கே பெரும் இசையமைப்பாளர் ஜெயச்சந்திரன் இசையில் உங்களோடு சிட்னி வரும் ஸ்வேதாவோடு பாடிய கோலக்குழல் கேட்டோ அந்தப் பாடலுக்கு அப்போது விருது எல்லாம் கிடைச்சிருக்கு ஜெயச்சந்திரன் எப்படி வேலை வாங்குவார்?

உங்க அப்பா கே.ஜே.ஜேசுதாஸ் அவர்கள் சாஸ்திரீய சங்கீத மேடைக்கும் சரி சமமா பங்கு வச்சிருக்கிறார் அந்தத் துறையிலும் மேடை ஏறணும்கிற ஆவல் இருக்கா?

இசைஞானி இளையராஜாவின் சேர்ந்திசைக் குரல்கள் 150 வது நாள் சிறப்பு இசைப் பொதி

இசைஞானி இளையராஜாவின் சேர்ந்திசைக் குரல்கள் போட்டியைத் தினமும் http://radiospathy.wordpress.com/ என்ற இணையப்பக்கத்தினூடாக நடத்திவருவதைப் பற்றி முன்னர் உங்களிடம் சொல்லியிருந்தேன்.இதோ இந்தத் தொடர் போட்டி 150 நாட்களைக் கடந்து போய்க் கொண்டிருக்கின்றது.

இந்தப் போட்டியில் சேர்ந்திசைக் குரல்கள் (Chorus) இடம்பெற்ற 101 வது நாளில் இருந்து 150 வது நாள் வரையிலான இசைப்பொதியை இங்கே பகிர்வதில் மகிழ்வடைகின்றேன்.

ஒவ்வொரு நாளும் இந்தப் புதிர்ப்போட்டி வழியாகப் பகிரும் பாடல்கள் ஏற்கனவே அறிமுகமாகிப் பல நாள் கேட்டிராதவை அல்லது முன்பே கேட்காத பாடல்கள் என்று கலவையாக வந்தமர்கின்றன உங்கள் நெஞ்சங்களில். தொடர்ந்து இந்தப் போட்டிகளில் நீங்கள் கலந்து கொண்டு ஆதரவை வழங்க வேண்டும்.

முதல் நூறு நாட்கள் இடம்பெற்ற போட்டிகளில் வெற்றிபெற்ற அன்பர்களின் விபரங்களையும் அறிவிப்பதில் பெருமகிழ்வு அடைகின்றேன். போட்டியில் முதல் மூன்று இடங்களைப் பிடித்தவர்களுக்குப் புத்தகப் பரிசு என்று முதலில் சொல்லியிருந்தேன், இப்போது மேலதிகமாக இருவருக்கும் சேர்த்து மொத்தம் ஆறு பேருக்குப் பரிசுகளை வழங்குவதில் மகிழ்வடைகின்றேன்.

முதலாவது இடத்தைப் பிடித்துக் கொண்ட விஜய் (@maestrosworld) 100 போட்டிகளில் 100 இலும் வெற்றி கண்டிருக்கிறார்.
இவருக்கு இசைஞானி இளையராஜா எழுதிய புத்தகம் ஒன்றும், மூன்று புத்தகங்கள் கொண்ட நாலு வரி நோட்டு என்ற நூல் தொகுதியும் என மொத்தம் நான்கு புத்தகங்கள் பரிசாக அனுப்பி வைக்கப்படும். ஒவ்வொரு நாளும் தவறாது போட்டியில் கலந்து கொள்வது மட்டுமல்ல, போட்டியில் கொடுத்த பெரும்பாலான பாடல்களுக்கு இவர் கொடுத்த விரிவான வர்ணனை வெகு சிறப்பாக அமைந்தது. அதற்காக ஒரு ஸ்பெஷல் பாராட்டும், நன்றிகளும் விஜய்.

இரண்டாவது இடத்தைப் பிடித்துக் கொண்ட ரிஷி (@i_vr) நூறு போட்டிகளில் 99 போட்டிகளில் வெற்றி பெற்றிருக்கிறார்.
இவருக்கு மூன்று புத்தகங்கள் கொண்ட நாலு வரி நோட்டு என்ற நூல் தொகுதி பரிசாக அனுப்பி வைக்கப்படும்

மூன்றாவது இடத்தைப் பிடித்த என்.சொக்கன் @nchokkan 100 போட்டிகளில் 92 போட்டிகளிலும்

நான்காவது இடத்தைப் பிடித்துக் கொண்ட சரவணன் @vrsaran 100 போட்டிகளில் 90 போட்டிகளிலும்

ஐந்தாவது இடத்தைப் பிடித்துக் கொண்ட ராஜா @rajabalanm 100 போட்டிகளில் 81 போட்டிகளிலும்

ஆறாவது இடத்தைப் பிடித்துக் கொண்ட கார்த்திக் அருள் @kaarthikarul 100 போட்டிகளில் 80 போட்டிகளிலும் வெற்றி பெற்றிருக்கின்றார்கள்>

இவர்களுக்கு இசைஞானி இளையராஜா எழுதிய புத்தகம் ஒன்று பரிசாக வழங்கப்படும்.

இதற்கான ஏற்பாடுகளைப் பரிசில் வென்றோருக்குத் தனிமடலில் அறியத்தருகின்றேன். இந்தப் பரிசுகளின் விநியோகத்தில் முன்னேர் பதிப்பகம் வழியாக உதவிய நண்பர் என்.சொக்கனுக்கும் இவ்வேளை நன்றிகள் உரித்தாகுக.

இந்த ஆறு பேருக்கும் எனது வாழ்த்துகளோடு தொடர்ந்து பங்களித்து வரும் உங்களுக்கும் எனது நன்றி கலந்த வணக்கங்கள்.