🎸 2018 தமிழ்த் திரையிசை அலசல் 🥁 பாகம் நான்கு 🎷 ஏ.ஆர்.ரஹ்மானின் பங்களிப்பு 🎹

🎸 2018 தமிழ்த் திரையிசை அலசல் 🥁

பாகம் நான்கு

🎷 ஏ.ஆர்.ரஹ்மானின் பங்களிப்பு 🎹

இந்த 2018 இல் தமிழ்த் திரைப்படங்களிலேயே ரஹ்மானின் பங்களிப்பு அதிகம் குவிந்திருந்தது. இதில் இன்னொரு முக்கிய விடயம் இன்றைய தமிழ் சினிமாவின் போக்கைத் தீர்மானிக்கும் முக்கியமான மூவரின் படங்களாக அவை அமைந்திருந்தது தான்.

நடிகர் விஜய் உடன் ரஹ்மானின் முதல் கூட்டணி “உதயா” படத்தின் வழியாக நிகழ்ந்தது. தொடர்ந்து “அழகிய தமிழ் மகன்”. இவையிரண்டும் வணிக ரீதியில் பெருத்த தாக்கத்தை ஏற்படுத்தாதவை. இந்த நிலையை மாற்றியது கடந்த ஆண்டு தீபாவளிக்கு வெளியான “மெர்சல்”.

மெர்சல் படத்தின் இலாப நட்ட ஊகங்கள் வெவ்வேறாக இருப்பினும் படத்தினை ஒரு பரவலான வட்டத்துக்கு எடுத்துச் சென்றதில் ரஹ்மானின் பாடல்களுக்கு முக்கிய பங்குண்டு. “ஆளப் போறான் தமிழன்” இன்று உசுப்பேத்தும் மொழிப் பற்றுப் பாடலாக இளையோரால் கொண்டாடும் அளவுக்கு இருக்கிறது. “மெர்சல்” கொடுத்த வெற்றியோடு மீண்டும் சன் நிறுவனம் படத் தயாரிப்பில் கால் பதித்த சர்காரும் இந்த ஆண்டில் சேர்ந்து கொண்டது. ஆனால் பாடல்களைப் பொறுத்தவரை உதயா, அழகிய தமிழ் மகன், மெர்சல், சர்கார் என்ற இறங்கு வரிசையிலேயே நோக்க முடியும். வசூலில் அதிக கவனத்தை ஈர்க்காத முந்திய இரண்டு படங்களின் பாடல்களில் உள்ள அழகு பிந்தியவற்றில் கொஞ்சம் குன்றியே இருக்கிறது. “சர்கார்” படத்தை விஜய் ரசிகர்கள் சுதி ஏற்றி ரசித்தாலும் “ஒரு விரல் புரட்சி” மற்றும் “சிம்டான்காரன்” பாடல்கள் தான் பரவலான கவனத்தை ஈர்த்தன. அதிலும் சிம்டான்காரன் சொல்லுக்கு அரும் பத விளக்கக் தேடிச் சமூக வலைத்தளங்களில் முட்டி மோதிக் கொண்டார்கள்.

இருப்பினும் ரஹ்மான் பாடல்கள் என்பதால் டாப்பு டக்கர் போன்ற மற்றைய பாடல்களும் எஃப் எம் வானொலிகளுக்கு நல்ல தீனி.

சர்கார் பாடல்கள்

“எந்திரன்” திரைப்படம் என்னதான் அறிவியலையும், விஞ்ஞானத்தையும் தொட்டிருந்தாலும் அந்தப் படம் ஒரு பக்கா பொழுதுபோக்கு மசாலா. இனிய பாடல்கள், நகைச்சுவை என்று எல்லாமே கலந்து கட்டியிருந்தன. எட்டு வருடங்களுக்குப் பின் அதன் மறு பாகம் “2.0” ஆக இந்த ஆண்டு வந்த போது இந்தப் பொழுது போக்கு, மசாலா வகையறாவுக்குள்ளும் அடக்க முடியாமல் சமூக சீர்திருத்தப் போதனைக்குள்ளும் திணிக்க முடியாமல் அல்லாடியது. படத்தின் பின்னணி இசையும் வெகு சுமார். இதற்குள் அல்லாடியது ரஹ்மான் போட்டுக் கொடுத்த “எந்திரலோகத்துச் சுந்தரியே”, “ராஜாளி”, “புள்ளினங்காள்” என்ற மூன்று பாடல்கள்.

பெரும் எடுப்பில் 2.0 பாடல்கள் வெளியிட்ட போது உடனடியாக ஈர்க்கா விட்டாலும் ரஹ்மான் பாடல்களுக்குண்டான பாங்கில் மெல்ல மெல்ல இசை ரசிகர்களுக்குப் பிடித்தமானவை ஆகி விட்டன.

இருப்பினும் படத்தில் கடித்துக் குதறப்பட்ட பாடல் காட்சியால் மீண்டும் ரசிகர்களுக்கு ஏமாற்றத்தைப் பரிசாகக் கொடுத்தது. இப்போது மீண்டும் எந்திரன் படப் பாடல்களைக் கேட்டால் அவை எவ்வளவு தூரம் வெகு சிரத்தையோடு பல்வேறு பரிமாணங்களில் கொடுத்த பாங்கு புரியும். புதிய மனிதா பூமிக்கு வா பாடலைக் கேட்டாலேயே இயந்திர மனிதனின் வருகைக்கான அதிர்வலைகளை ஏற்படுத்தும் இசை 2.0 இல் மங்கிப் போனது.

2.0 பாடல்கள்

ரஹ்மான் – மணிரத்னம் மந்திரக் கூட்டணியாவது வேலைக்கானதா என்றால் “செக்கச் சிவந்த வானம்” படமும் கொடுத்த பாடல்கள் ஒன்றையுமே முழுமையாகத் திரையில் பயன்படுத்தாது பாதி தின்றது. ஆனால் பாடல்கள் என்ற கணக்கில் மணிரத்னம் – ஏ.ஆர்.ரஹ்மான் – வைரமுத்து கூட்டணி சோடை போகாது என்று மீள நிரூபித்தது “செக்கச் சிவந்த வானம்”.

நீல மலைச்சாரல் என்ற மழைக்குருவி பாட்டு, மதுர மரிக்கொழுந்தே , பூமி பூமி, நீ வந்து சென்றனை என்று பாடல்கள் இனித்தன. பாடல்களைக் கேட்டு வாங்கியதில் மணிரத்னம் வெற்றி கண்டார் என்றே சொல்ல வேண்டும். குறிப்பாக மதுர மரிக்கொழுந்தே பாடலில் அப்படியே தொண்ணூறுகளின் ரஹ்மான்.

செக்கச் சிவந்த வானம் பாடல்கள்

ஏ.ஆர்.ரஹ்மான் ரசிகர்களுக்கு மட்டுமன்றிப் பொதுவான இசைப் பிரியர்களுக்கும் கொண்டாட்டமாக அமைந்தது “சர்வம் தாள மயம்” படத்தின் முன்னோட்டம் வந்த போது. அதை ஈடுகட்டுமாற் போல மதன் கார்க்கியின் வரிகளில் “சர்வம் தாள மயம்” https://youtu.be/d3OZVsHG9TM தலைப்பிசைப் பாடல் வந்த போது “மின்சாரக் கனவு” யுகத்தில் நுழைந்து விட்டது போலக் கொண்டாட்டத்தைக் கூட்டியது அந்தப் பாட்டு. “சர்வம் தாள மயம்” படப் பாடல்கள் கொஞ்சம் கொஞ்சமாகச் சுதி ஏத்துகின்றன. இதில் ஒரு புதுமை “வரலாமா” என்ற பாடலை இசையமைத்திருக்கிறார் இயக்குநர் ராஜீவ் மேனன்.

2018 இல் ஏ.ஆர்.ரஹ்மான் செய்த இன்னொரு பங்களிப்பு பாம்பா பாக்யா என்ற பாடகரைக் கை தூக்கி விட்டது. இது நாள் வரை சேர்ந்திசைக் குரலாக ஒலித்த பாடகர் பாக்யராஜ் ஐ பிரபல சூபி பாடகர் பாம்பா போலப் பாடச் செய்து அதன் தாக்கத்தில் பாம்பா பாக்யா என்று பெயரையும் சூட்டி விட்டார் ரஹ்மான்.

புள்ளினங்காள் (2.0), சிம்டான்காரன் (சர்கார்), டிங்கு டொங்கு ( சர்வம் தாள மயம்) என்று மூன்று முத்தான பாடல்கள் பாம்பா பாக்யாவுக்குக் கிட்டியிருக்கின்றன. “நெருப்புடா” புகழ் அருண்ராஜ் காமராஜ் முதன் முதலாகச் சர்வம் தாள மயம் வழி ரஹ்மானுக்குப் பாடல் எழுதியிருக்கிறார்.

2.0 இல் “புள்ளினங்காள்”, சர்வம் தாள மயம் படத்தில் “மாயா மாயா” https://youtu.be/4BueIUDPriY என்று இரு பாடல்களோடு நா.முத்துகுமார் பங்களிப்பு ரஹ்மான் இசையில்.

வைரமுத்து, மதன் கார்க்கி, விவேக், அருண்ராஜ் காமராஜ் இவர்களோடு பாடல் இழப்புக்குப் பேரிழப்பாக அமைந்த நா.முத்துக்குமாருடன் இணைந்து ஏ.ஆர்.ரஹ்மான் கொடுத்த இறுதித் திரைப்படம் என்ற வரலாற்ற்றையுக் இந்த 2018 விட்டுச் சென்றிருக்கிறது.

தொடர்ர்ர்ரும்

கானா பிரபா

14.12.2018

❤️ 2018 தமிழ்த் திரை இசை அலசல் ❤️

பாகம் மூன்று

🎸💚 96 💚 🥁

கரை வந்த பிறகே…..

பிடிக்குது கடலை……

நரை வந்த பிறகே

புரியுது உலகை

நேற்றின் இன்பங்கள்

யாவும் கூடியே

இன்றை இப்போதே

அர்த்தம் ஆக்குதே

இன்றின் இப்போதின்

இன்பம் யாவுமே

நாளை ஓர் அர்த்தம் காட்டுமே

இப்போதெல்லாம் ஏதோவொரு பண்பலை வானொலி வழியே இந்தப் பாடல் வரும் போதெல்லாம் சிலிர்த்து விடுகிறது. இப்பேர்ப்பட்ட மன நிலையோடு வாழ்ந்து கழித்தவர்கள் இந்தப் பாடலை இதேயளவு நெருக்கமாக உணர்வர். அது விரக்தியோ, சந்தோஷமோ அன்றிக் கவலையோ இல்லாத மோன நிலை. இந்த நிலையிலேயே, இந்த உலகிலேலேயே அப்படியே தங்கி விடுபவர்கள் தான் மேதைகளாக இருக்கிறார்கள். கலைத்துறையில் உச்சம் கண்டோரை உதாரணம் காட்டலாம்.

நம் போன்ற சாதாரணர்கள் ஒரு சைக்கிளை எடுத்துக் கொண்டு வெட்டவெளி காணப் பறந்து திரிந்து இலக்கற்றுப் பயணிப்போம். 96 திரைப்படம் என்னை இன்றளவும் ஆக்கிரமித்து வைத்திருக்கிறதென்றால் அதற்கு முக்கிய காரணம் இந்தப் பாடல் தான். இது வெறும் Life of Ram https://youtu.be/psi5C9WM3i0 உடன் மட்டுமே அடக்க முடியாத ஒன்று.

2018 ஆம் ஆண்டிலே ஒரு திரைப்படத்தின் பாடல்களும் வெற்றி கண்டு, படமும் உச்ச பட்ச வெற்றி கண்டதென்றால் அதற்கான ஒரே தகுதி 96 திரைப்படத்துக்கே சாரும்.

ஒரு தமிழ்த் திரைப்படத்தை எப்படி வேண்டுமானாலும் எடுத்து விடலாம். ஆனால் ஒரு காதல் சார்ந்த படைப்பைப் பாடல்கள் இன்றி எடுக்கவே முடியாது.

ஆனால் பாருங்கள் இதுவும் காதல் திரைப்படம் தான் ஆனால் கொண்டாடிக் களிக்கும் ஒரு ஜோடிப் பாடல் உண்டா? அழுது வடியும் பாடல் காட்சி தானும் உண்டா? இந்தப் படத்தில் தான் எட்டுப் பாடல்கள் இருக்கின்றன. அவற்றைத் தனியே பாடல்களாக வகைப்படுத்தலாமே ஒழிய இவை எல்லாமே படத்தோடு இழைக்கப்பட்டிருக்கின்றன. ராம் இற்கும் ஜானுவுக்கும் இடையில் எழும் மெளனங்களை மட்டும் பாடல் என்ற உணர்வோட்டத்தால் நிரப்புகின்றன.

இவற்றை வெறுமனே பாடல்கள் என்றும் சொல்ல முடியாது. எல்லாவற்றிலும் இசையைப் பிரித்து விட்டு வரிகளை மட்டும் படித்தால் அது வாழ்வியலைக் கவிதையாய்க் காட்டும்.

பால்ய சினேகிதம் குறித்துப் பேசிய அழகி, ஆட்டோகிராஃபில் கூடப் பாடல்களில் சமரசம் உண்டு. கல்லூரிக் காதலைப் பேசிய இதயம் படத்திலும் கூட நாயகனைத் தாண்டி விடலைகளுக்கான கொண்டாட்டப் பாடல்கள் இருக்கும். ஆனால் பரமாத்மா மேல் ஜீவாத்மா கொள்ளும் பற்றைக் காதல் வடிவமாக்கிய “குணா” வில் ஓரளவு தான் சமரசம் இருக்கும். இங்கே காதலன், காதலி உரையாடலே “கண்மணி அன்போடு காதலன் நான் எழுதும் கடிதமே” என்று பாடும்.

96 படத்தின் வெற்றியில் பங்கு போட்டதில் பாடல்களின் பங்கு உச்சமானது. அதற்குக் காரணம் முன் சொன்னது போல பாடல்கள் வெறும் பாடல்களாய் ஒட்டி இராதது தான்.

எப்படி சுபாஷிணி என்ற பாத்திரம் முதிர் கன்னியாகவும் தேவதர்ஷினி ஆகவும், சின்ன வயதில் அதுவே நியாதி ஆகவும் ஒற்றுமை கண்டதோ அது போல ஜானுவின் பின்னணிக் குரலாகவும், அதுவே பாடலாக உருப் பெறும் போது பாடகியாக சின்மயியும் தோற்றம் கண்டது போலச் சின்ன வயசு ஜானுவுக்கு கெளரியின் பின்னணிக் குரலும், பாட்டுக் குரலுமாக எவ்வளவு அழகாக யோசித்து உண்டு பண்ணியிருக்கிறார்கள்.

அதுவும் “ஏன் எதும் கூறாமல் போனானோ” https://youtu.be/SYv_jRJoWiE வரும் போது ஜானுவின் அசரீரி போலல்லவா இந்தப் பாட்டு அச்சொட்டாக ஒலிக்கிறது.

தாபங்களே மற்றும் இரவிங்கு ஆகிய பாடல்களை உமா தேவி எழுத மீதி எல்லாம் கார்த்திக் நேத்தா கவி வரிகள். ஆனால் எல்லாவற்றையும் கேட்கும் போது ஒரு பொதுத் தன்மையோடே ரசிக்க முடிகிறது.

இசையமைப்பாளர் கோவிந்த் வசந்தா அடிப்படையில் தைக்குடம் பிரிட்ஜ் இசைக் கூட்டணியின் இசைக் கலைஞராக இருந்து சினிமாவுக்கு வந்தவர். ஆனாலும் ரஹ்மான் போலவே இவருக்கும் சம்பரதாய பூர்வமான சினிமாப் பாணி இசையில் விருப்பமில்லை என்று பேட்டியில் குறிப்பிட்டிருக்கின்றார். அதன் பிரதிபலிப்பாக 96 படத்தின் பாடல்களைக் குறிப்பிடலாம். இனி வரப் போகும் சீதக்காதி படத்தின் பாடல்கள் இதிலிருந்து முற்றிலும் மறுபட்ட பாங்கில் இருப்பதை அவதானிக்கலாம்.

கோவிந்த வசந்தாக் சின்மயி, கெளரி இவர்களோடு ராம் இன் குரலாய் ஒலிக்கும் பிரதீப்பின் புத்துணர்வான, பழகாத பாடகக் குரல் மேலும் இனிமை சேர்க்கிறது. கரை வந்த பிறகே பாடலில் தனி ஆவர்த்தனம் காட்டும் போதும், சின்மயியோடு சேர்ந்து பாடும் போது கரைந்தும் கலக்குகிறார்.

ஒரு படைப்பின் வர்ணத்தைத் தீர்மானிப்பது வெறும் ஒளிப்பதிவாளன் அல்ல அதன் இசையமைப்பாளனும் தான் என்பதை 96 மீள நிரூபித்திருக்கிறது மிக அழுத்தமாக. இந்தப் படத்தின் காட்சிகளற்ற ஒலி வடிவைக் கேட்டாலேயே படத்தில் சொல்லப்பட்ட உணர்வுகளின் பரிபாஷையை ஊய்த்துணரலாம்.

படத்தை இயக்கிய பிரேம்குமார் கூட எதிர்பார்த்திருப்பாரோ இவ்வளவு நெருக்கமாக இசை வந்து ஒட்டிக் கொள்ளுமென்று.

காதலே காதலே

தனிப்பெரும் துணையே

கூட வா கூட வா

போதும் போதும்

காதலே காதலே

வாழ்வின் நீளம்

போகலாம் போகவா நீ …

ஆஆஆஆஆ

திகம்பரி ….

வலம்புரி….

சுயம்பு நீ….

‪பிரகாரம் நீ‬…..

‪பிரபாவகம் நீ‬…..

பிரவாகம் நீ…..

‪ஸ்ருங்காரம் நீ‬….

‪ஆங்காரம் நீ‬…….

‪ஓங்காரம் நீ‬……..

‪நீ……‬

‪அந்தாதி நீ‬….

கானா பிரபா

13.12.2018

2018 தமிழ்த் திரை இசை அலசல் 🎧 பாகம் 2 🎸A.R.ரஹ்மான் குடும்பத்தில் இருந்து

2018 தமிழ்த் திரை இசை அலசல் 🎧

பாகம் 2

🎸A.R.ரஹ்மான் குடும்பத்தில் இருந்து

இன்னொரு இசையமைப்பாளர் 🥁

அரும்பே அரும்பே…..

என்னைக் கடத்தி போ கரும்பே….

அழும்பே தழும்பே…..

உள்ள கெடத்திப் போ குறும்பே…..

இந்தப் பாடலை எல்லாம் 2018 ஆம் ஆண்டின் திரையிசை அலசலில் குறிப்பிட மறந்தேனானால் ஏகப்பட்டோரின் சாபத்துக்கு ஆளாக வேண்டியிருக்கும். தான் இசையமைத்து நடக்கும் படம் ஹிட் அடிக்கிறதோ இல்லையோ ஒரு பாடலையாவது அந்தந்த ஆண்டுகளின் உச்சப் பாடல்களில் ஒன்றாக வைத்து விடுவார் விஜய் ஆன்டனி. பிச்சைக்காரன் படத்துக்குப் பின் தொடர்ந்து வெற்றிகரமான மூன்றாவது ஆண்டாக இந்த ஆண்டும் அவர் நடித்து வெளிவந்த படங்கள் காளி மற்றும் திமிரு புடிச்சவன் இரண்டும் சுமார் ரகத்தில் சேர்ந்து விட்டன.

இருப்பினும் காளி படத்துக்கு மிகப் பெரிய எதிர்பார்ப்பை உண்டு பண்ணியதில் “அரும்பே கரும்பே” பாடலுக்கு முக்கிய பங்குண்டு.

காளி படப் பாடல்களில் “அரும்பே” https://youtu.be/xz5j7PyhYLw பாடல் தவிர “நூறாய் யுகம் நூறாய்” https://youtu.be/UqIIpc1jIjg பாடலும் குறிப்பிட்டுச் சொல்ல வேண்டியது. இந்தப் பாடல் தொண்ணூறுகளின் ஹிட் பாடல்களை நினைவுபடுத்தும்.

விஜய் ஆன்டனியின் “திமிரு புடிச்சவன்” படம் போலவே பாடல்களும் திருஷ்டி பட்டது போல மாயமாகக் கடந்து விட்டன.

காளி படத்தில் இருந்து அடுத்து நிமிர் படத்துக்குத் தாவுவோம். அதாவது இயக்குநர் கிருத்திகா உதயநிதியிடமிருந்து நடிகர் உதயநிதி ஸ்டாலினுக்கு.

நெஞ்சில் மாமழை.. நெஞ்சில் மாமழை..

தந்து வானம் கூத்தாட..

கொஞ்சும் தாமரை, கொஞ்சும் தாமரை..

வந்து எங்கும் பூத்தாட…

2018 இல் அனேகர் மீளவும் தம் குரலில் பாடி YouTube, Dubsmash போன்ற தளங்களில் வலையேற்றிய பாட்டு. சொல்லப் போனால் 2018 இன் ஆகச் சிறந்த மெலடிப் பாடல் என்று ஒரு விருதுப் போட்டி வந்தால் இந்தப் பாடலும் https://youtu.be/k5xRIKbW2t4 கண்டிப்பாக இடம் பெற வேண்டும். “நிமிர்” படத்தில் இந்தப் பாடலோடு மேலுமொரு பாடலான “எப்போதும் உன் மேல் ஞாபகம்” https://youtu.be/btgjtnhHWoE அஜனீஸ் லோக்நாத் இசையில் வெகு அருமையாக வந்திருக்கிறது. மீதி நான்கு பாடல்கள் தர்புகா இசையில் வந்திருக்கிறது. இந்தப் படம் மலையாளத்தில் “மகேசிண்ட பிரதிகாரம்” என்று வந்த போது அதில் பிரபலமான “இடுக்கி” பாடல் தமிழ்நாடு வரை பாய்ந்தது. “பூவுக்குத் தாழ்ப்பா எதுக்கு” https://youtu.be/Bk-4AQIaQpw பாடல் இடுக்கி பாடலுக்கான காட்சியமைப்பில் வந்தாலும் மலையாளம் அளவுக்கு எடுபடவில்லை. இயக்குநர் பிரியதர்ஷன் படங்கள் என்றால் பாடல்களுக்குச் சொல்லவா வேண்டும்? “நிமிர்” படம் வணிக ரீதியில் நிமிரா விட்டாலும் பாடல்கள் நிமிர்ந்து கேட்கும் அளவுக்கு நியாயம் செய்திருக்கின்றன.

இசையமைப்பாளர் ரஹ்மான் குடும்பத்தில் அவரின் தந்தை சேகரைத் தொடர்ந்து ஏ.ஆர்.ரஹ்மான், ரஹ்மானின் சகோதரி ரெஹானா, ரெஹானாவின் மகன் ஜி.வி.பிரகாஷ்குமார் என்று இசையமைப்பாளர்களாக வரிசை கட்ட 2018 இல் இந்தக் குடும்பத்திலிருந்து புது வரவு இசையமைப்பாளர் ஏ.ஆர்.ரஹ்மானின் தங்கை ஃபாத்திமாவின் மகன் A.H.காஷிஃப் “காற்றின் மொழி” திரைப்படத்தின் மூலம் இசைமைப்பாளர் ஆனார்.

இருப்பினும் ரஹ்மானுக்கு ரோஜாவோ, ஜி.வி.பிரகாஷ்குமாருக்கு வெயிலோ கொடுத்த அளவு இசைத் தாக்கத்தை இவர் வரவு உண்டு பண்ணவில்லை. “போ உறவே” https://youtu.be/tmTsCVM9Wj0 பாடல் மட்டும் ஏ.ஆர்.ரஹ்மான் குடும்ப வரவை ஓரளவு நியாயம் செய்தது.

ஹிந்தியில் வந்த Tumhari Sulu படத்தைக் “காற்றின் மொழி” ஆக்கியும், கன்னடத்தில் இருந்து Godhi Banna Sadharana Mykattu படத்தை “60 வயது மாநிறம்” என்று தமிழில் எடுத்து இரண்டு படங்களை இந்த 2018 இல் வெளியிட்ட ராதா மோகன் இரண்டிலும் மூல இசையமைப்பாளர்களைப் பயன்படுத்தவில்லை.

“60 வயது மாநிறம்” படத்தின் இசை இளையராஜா. இந்தப் பாடல்கள் ராஜா ரசிகர் வட்டத்தோடு நின்று விட்டன.

விக்ரம் பிரபு நடித்து வெளிவரப் போகும் “துப்பாக்கி முனை” படத்தில் இடம் பெற்ற “பூவென்று சொன்னாலும் நீ” https://youtu.be/H8KkvR7XFYQ இனிக்கிறது. L.V.முத்து கணேஷ் இசை வழங்கியிருக்கிறார்.

2018 பொங்கலுக்கு வந்த ஸ்கெட்ச் திரைப்படம் தோல்வியைக் கண்டிருந்தாலும் தமன் இசையில் “தென்றல்” https://youtu.be/xa8tHL8PmyY பாடல் இனித்தது. குலேபகாவலி படத்தில் “குலேபா” https://youtu.be/QVgSyvzmbxw விவேக் மெர்வின் இசையில் இந்த ஆண்டுக்கான குத்தாட்டம் கொடுத்தது. சந்தோஷ் தயாநிதி “மதுர வீரன்” படத்துக்காக இசைத்த “உன் நெஞ்சுக்குள்ள் வாழணும்” https://youtu.be/06CgWrY5T7I ரசிக்கலாம்.

வானொலிகளிலும் வலைத்தளங்களிலும் இந்த ஆண்டு அதிகம் உச்சரிக்கப்பட்ட கலாய்ப்பு மொழி “ஒரு குச்சி ஒரு குல்பி” https://youtu.be/ldAcREbctWQ இதைப் பிரபலமாக்கிச் சொந்தம் கொண்டாடியது கலகலப்பு 2. இதே படத்தில் “காரைக்குடி இளவரசி” https://youtu.be/aCDKULGwsps பாடலும் வானொலிகளின் நரம்பைச் சுண்டி இழுத்த பாட்டு. இயக்குநர் சுந்தர் C இன் சமீபத்திய ஆஸ்தான இசையமைப்பாளர் Hiphop தமிழா அரைத்த மாவை அரைத்து புதுசா தோசை ஆக்கியிருக்கிறார்.

பண்ணையாரும் பத்மினியும் படத்தின் வழியாக அறிமுகமாகி, 2016 ஆம் ஆண்டில் ஒரு நாள் கூத்து, ராஜா மந்திரி தொடர்ந்து உள்குத்து, காலக்கூத்து என்று அருமையான இசைப் பகிர்வுகளைக் கொடுத்தவர் ஜஸ்டின் பிரபாகரன். யார் கண் பட்டதோ இந்த ஆண்டு வெளியான “ஒரு நல்ல நாள் பாத்து சொல்றேன்” படத்தின் தலைப்புப் போலவே 2019 இல் ஒரு நல்ல நாளுக்காகக் காத்திருக்கிறார்.

படை வீரன் பாடல்களிலும் பழைய கார்த்திக் ராஜா இல்லை.

தொடர்ர்ர்ரும்

கானா பிரபா

12.12.2018

🎧 2018 தமிழ்த் திரை இசை அலசல் 🎧 🎸 இசையமைப்பாளர் சாம் C.S 🥁

🎧 2018 தமிழ்த் திரை இசை அலசல் 🎧

🎸 இசையமைப்பாளர் சாம் C.S 🥁

2017 ஆம் ஆண்டில் ஹிட்டடித்த படங்களில் “விக்ரம் வேதா”வுக்கு ஒரு தனிச்சிறப்புண்டு. அந்தப் படத்தின் பாடல்களோடு தக தக தக தா….தக தக தக தா என்று பின்னணி இசையையும் முணு முணுத்து ரசித்தனர் இசை ரசிகர்கள். இப்பேர்ப்பட்டதொரு வித்தியாசமான வரவேற்பைப் பெற்ற சாம் C.S இன் அடுத்த ஆண்டு எப்படி அமையப் போகிறது, இனிமேல் உச்ச நட்சத்திர நடிகர்களுக்குப் பிடித்தமானதொரு இசையமைப்பாளராக மாறி விடப் போகிறார் போன்ற பல்வேறு கணிப்புகளுடன் கூடிய எதிர்பார்பார்ப்பை உண்டு பண்ணியிருந்தார். அந்த வகையில் அவரின் திரையிசைப் பயணம் 2018 இல் எப்படி அமைந்தது என்று பார்ப்போம்.

இசையமைப்பாளர் ஜி.வி.பிரகாஷ்குமாருக்கான தொடர் கூட்டணி அமைத்து அழகான நல்ல பாடல்களை வாங்கியதில் இயக்குநர் ஏ.எல்.விஜய் இன் பங்கு சிறப்பானது. கிரீடம், மதராசப் பட்டணம், தெய்வத் திருமகள், தாண்டவம் என்று இந்த இசை வெற்றிக் கூட்டணியின் படைப்புகள் நீளும்.

இந்தக் கட்டை உடைத்துக் கொண்டு 2016 இலிருந்து பல்வேறு இசையமைப்பாளர்களுடன் இயங்கிய ஏ.எல்.விஜய் 2018 இல் தான் இயக்கிய இரண்டு படங்களிலுமே சாம் C.S உடன் இணைந்திருக்கிறார். இரண்டுமே வெவ்வேறு தளங்களை அடிப்படையாகக் கொண்டவை.

“கரு” என்ற பெயரில் எடுக்கப்பட்டு பாடல்களும் அதே படப் பெயரில் வெளியான பின் திரைக்கு வர முன்னர் “தியா” என்று பெயர் மாற்றம் கண்டது. இந்தப் படத்தில் இரண்டு பின்னணி இசைக் கீற்றுகள் மூன்று பாடல்கள் என அமைந்திருந்தது.

“ஆலாலிலோ” https://youtu.be/kHvw9J9eQwI என்றொரு அருமையானதொரு தாலாட்டுப் பாடல் இருக்கிறது. தன் சேய்க்கு நோகாமல் காதருகே பாடித் தாலாட்டும் பாங்கில் அமைந்த பாட்டை ஸ்வாகதா எஸ்.கிருஷ்ணன் பாடியிருக்கிறார். இந்தப் படம் இன்னும் பெரிய் அளவில் எடுபட்டிருந்தால் இந்தப் பாட்டு இன்னும் பரவலான ஈர்ப்பைப் பெற்றிருக்குமே என்றதொரு ஆதங்கம் எழுகிறது.

“எழுதுகிறேன் ஒரு கடிதம்

வானத்து மலரே வையத்து நிலவே” என்று கல்கி படத்தில் பாடினாற் போலத் தன் கருவோடு பேசும் பாட்டாக சித்ரா இங்கேயும் ஒரு பாடல் “கருவே….”https://youtu.be/v4QsNAeA2GU என்று பாடியிருக்கிறார்.

“கொஞ்சாளி” https://youtu.be/gGBQUO_FBBI என்ற மணப் பாடல் கூட அதிக ஆர்ப்பட்டமில்லாத அடக்கமான துள்ளிசை கலந்து அமைந்திருக்கிறது. அனைத்துப் பாடல்களும் மதன் கார்க்கியின் கை வண்ணம்.

தியா படத்தின் பாடல்களுக்கு நேர்மாறு லஷ்மி படத்தின் பாடல்கள். ஜோடி நம்பர் 1 ஐ திரையில் காண்பது போல நடனப் பின்னணியுடன் மாமூல் உணர்ச்சி வசப்படும் காட்சிகள் கொண்ட இதில் மொத்தம் ஏழு பாடல்கள் சாம் இசையில். பிரபு தேவா நடித்த படமாச்சே. அனைத்தையும் எழுதியவர் மதன் கார்க்கி.

இந்தப் பாடல்களைக் கேட்கும் போது அமித் திரிவேதியின் ஏதோ ஹிந்திப் படப் பாடல்களைக் கேட்குமாற் போலொரு உணர்வு. உத்ரா உன்னிகிருஷ்ணனின் “மொட்றாக்கா மட்றாக்கா” https://youtu.be/ielNlsacdk8 பாடல் ஹிட் ரகம்.

சாம் C.S இன் இசையில் சந்தடியில்லாமல் வந்து போன படம் “வஞ்சகர் உலகம்”. இந்தப் படப் பாடல்களில் புதுமை என்னவென்றால் மொத்தம் மூன்று பாடல்களில் இரண்டு ஆண் குரல்களுக்கானவை. இரண்டும் இசையமைப்பாளர் சந்தோஷ் நாராயணன், மற்றும் யுவன் சங்கர் ராஜா பாடியது. முக்கியமாகச் சொல்ல வேண்டிய பாட்டென்றால் “குழலூதும் கண்ணன் எழில் காணவே” https://youtu.be/zmrQBukJea8 பாட்டு. ஒரு சாஸ்திரிய இசையோடு மேற்கத்தேய முரட்டு வாத்தியங்கள் சேர்ந்த பாட்டு. ஆனால் வாத்திய ஆதிக்கம் அதிகமாக மேலெழுந்து பாடலை அமுக்கி விடுகிறது.

வஞ்சகர் உலகம் போன்றே “கடிகார மனிதர்கள்” படப் பாடல்களும் சாம் C.S இசையில் சந்தடியில்லாமல் வந்து போன பாடல்கள்.

தியா, லஷ்மி போன்று இரண்டு மொழிகளில் அதாவது தமிழ், தெலுங்கு என இரட்டைச் சவாரி செய்த படம் நோட்டா. தெலுங்கின் இளம் முன்னணி நாயகன் விஜய் தேவரக்கொண்டா நடித்த இப் படம் கனதியான அரசியல் பின்புலத்தோடு பயணிப்பதால் பாடல்களுக்கு அதிக வேலை இல்லை. 2018 இல்

பெரும் எதிர்பார்ப்பைக் கிளப்பிய படங்களில் இதுவுமொன்று என்றாலும் சாம் தான் இசையமைப்பாளர் என்று பரவலான அடையாளத்தைப் பதிக்கத் தவறி விட்டது. இந்தப் படத்தை இயக்கிய ஆனந்த் சங்கரின் இரு முகன் படப் பாடல்கள் குறித்த படம் தோல்வி கண்டாலும் இன்னும் இனிப்பது சொல்லி வைக்க வேண்டியது.

உயிர் உருவாத

உருகுலைக்காத

என்னில் வந்து சேர

நீ யோசிக்காத

திசை அறியாத

பறவையை போல

பறக்கவும் ஆச

உன்னோடு தூர

இன்று பண்பலை வானொலிகளில் ஹிட்டடிக்கும்

இந்தப் பாடலுக்குச் சொந்தம் “இரவுக்கு ஆயிரம் கண்கள்” படம். சாம் இன் இசையில் 2018 இல் வெளிவந்த படங்களில் அவரின் முத்திரையை முழுமையாகப் பதித்த படம் என்றால் இது தான் என்பேன். “உயிர் உருவாத” https://youtu.be/2bhPfpBumZM பாடலுக்கான பாடகர் தேர்வு (சத்ய பிரகாஷ் & சின்மயி) கூடக் கச்சிதம். இந்தப் படத்துக்கான மைய இசைப் பாட்டு (theme song) “யேப்பா யெப்பா” பாடலிலும் உழைப்பு தெரிகிறது.

“ஏன் பெண்ணே நீயும் நெஞ்சில் ஆசை சேர்க்கிறாய்” https://youtu.be/c8Vh5Frko9Q இதே படத்தில் இன்னொரு ரம்யமான காதல் பாட்டு.

இரவுக்கு ஆயிரம் கண்கள் போன்றே சாமுக்கு இன்னொரு படப் பாடல் அதிக புகழைக் கொடுத்தது இந்த ஆண்டு. அந்தப் பாட்டு “ஏதேதோ ஆனேனே” https://youtu.be/IXCejoy1M9Y

Mr.சந்திரமெளலி படத்திற்காக சின்மயியுடன் இணைந்து சாம்.C.S பாடிய பாட்டு இன்னொரு எஃப் எம் ஹிட் ரகம். என் கல்லூளியே என்ற பாடலும் இதே படத்தில் இடம்பெற்றிருக்கும் இனிய பாடல்.

கார்த்திக்கின் அக்னி நட்சத்திர காலத்தை நினைவுபடுத்த ராஜாதிராஜா பாடல் கடந்து போகிறது.

வெளி வரப் போகும் “அடங்க மறு” படத்துக்காகக் கொடுத்த “ஓ சாயாளி ஓ சாயாளி” https://youtu.be/7KJscr5TdKc பாடல் இப்படத்தின் மற்றைய பாடல்களோடு ஒப்பிடும் போது சாம் C.S ஐ நம்பிக்கையோடு 2019 இற்கு எதிர்பார்க்க வைக்கிறது. கூடவே கொரில்லா படமும் வரிசையில் நிற்கிறது.

2018 ஆம் ஆண்டைப் பொறுத்தவரை “இரவுக்கு ஆயிரம் கண்கள்” படப் பாடல்கள் தான் சாம் C.S இன் பேர் சொல்லும் இசை.

தனிப்பட்ட ரீதியில் எனக்குப் பிடித்த பாடல் “ஏதேதோ ஆனேனே” (Mr சந்திரமெளலி).

புதுமையாக மெட்டுக் கட்டிய விதமும் பாடலின் ஏற்ற இறக்கங்களில் காட்டும் நளின இசையுமாக இந்தப் பாடல் மீது ஈர்ப்பை ஏற்படுத்தி விடுகிறது.

இந்த ஆண்டின் இறுதியில் வெளியாகும் மோகன்லாலின் “ஒடியன்” மலையாளத் திரைப்படம் சாம் C.S இற்கு மிகப் பெரிய படைப்பாக அமைந்திருக்கிறது. இந்தப் படத்தின் பின்னணி இசைப் பங்களிப்பை வழங்கியிருக்கிறார்.

பெரும் எதிர்பார்ப்போடு இந்த வாரம் உலகமெங்கும் திரையிடப்படுகிறது இப்படம்.

2018 இன் திரை இசை அலசல் தொடரும்

கானா பிரபா

11.12.2018

‪#2018TamilHits‬

‪ஒளிப்பதிவாளர் & இயக்குநர் ‬ ராபர்ட் விடைபெற்றார்

பாலைவனச் சோலை

கல்யாணக் காலம்

சின்னப்பூவே மெல்லப் பேசு

மனசுக்குள் மத்தாப்பு

பறவைகள் பலவிதம்

போன்ற படங்களை இயக்கிய இரட்டை இயக்குநர்களில் ஒருவரான ராபர்ட் மறைந்தார். இவரின் சகா ராஜசேகரன் நிழல்கள் பட நாயகன் “இது ஒரு பொன்மாலைப் பொழுது” பாடலில் தோன்றி நடித்தவர். இருவரும் படம் இயக்க ஆரம்பித்த பின் பிரபு, ராம்கி (அறிமுகம்) போன்றோருக்கு திருப்புமுனைப் படங்களை அளித்தவர்கள். அடிப்படையில் இவர்கள் ஒளிப்பதிவாளர்கள். ஒருதலை ராகம் இவர்களின் ஒளிப்பதிவில் புகழ் பூத்த படம்.

பாலைவனச் சோலை அதிரி புதிரி வெற்றி. மலையாளத்தில் இது நிஜங்களோட கதா என்று மொழி மாற்றும் அளவுக்குப் பெயர் கொடுத்தது.

நான்கு நாயகர்கள் யுகத்துக்கு இந்தப் படம் முன்னோடி. யாழ்ப்பாணம் வின்சர் தியேட்டரில் ஹவுஸ் புல்லாக ஓடிய போது அண்ணன் படம் பார்த்து விட்டு வந்து சிலாகித்தது இன்னும் பசுமரத்தாணி போல.

சின்னப்பூவே மெல்லப் பேசு படம் பதினாறடி பாய்ந்தது.. எஸ்.ஏ.ராஜ்குமார் இசையமைப்பாளராகவும் வித்யாசாகர் பின்னணி இசையிலும் அறிமுகமானார்கள். பாடல்கள் பட்டி தொட்டி எங்கும் முழங்கின.

பறவைகள் பலவிதம் கல்லூரித் தோழர் கதையை வித்தியாசமாகக் காட்டிய படம். அந்தப் படத்தில் ராம்கி, நிரோஷாவோடு நாச்ற், ஜனகராஜ், தாராவுக்கும் முக்கிய வேடம். சோகம் பொதிந்த

அந்தப் படம் ரசிகர்களால் ஒதுக்கப்பட்டுத்

தோல்வி கண்டது. அத்தோடு ராபர்ட் – ராஜசேகரன் கூட்டணி உடைந்தது.

தொடர்ந்து ராஜசேகரன் “பூமனம்” படத்தில் வித்யாசாகர் இசையில் நடித்து அமுங்கி இப்போது சின்னத்திரையில் ஒதுங்கி விட்டார்.

தொண்ணூறுகளில் நடிகர் பிரபு மீண்டும் ராபர்ட் – ராஜசேகரன் கூட்டணியில் ஒரு படத்தைக் கொண்டு வர முயன்றும் முடியாமல் போனது அந்த முயற்சி.

கானா பிரபா

30.11.2018

இசையரசி P.சுசீலாவின் 83 வது பிறந்த நாளில் இசைஞானியோடு நூறு பாடல்கள் 🎁🎸💚

பி.சுசீலாவின் குரல் தாலாட்டுப் பாடியும், காதல் மொழி பேசியும், தெய்வீகத்தில் திளைத்தும், தத்துவத்தை உரைத்தும் பலவாறு திரையிசையை ஆட்கொண்டது.

நான்கு தசாப்தங்களாக தென்னிந்தியத் திசையில் இசையரசியாக விளங்கிய அவரின் பாடல்களில் மெல்லிசை மன்னர் காலத்தைத் தொட்டால் அது கடல், கே.வி.மகாதேவன் தொட்டு இன்னும் தொடர்ந்த இசையமைப்பாளர்களையும் சேர்த்தால் அது பேராறு. இங்கே நான் தொட்டிருப்பது இசைஞானியின் பாடல்களில் பி.சுசீலாவின் குரல் சங்கமமாயிருக்கும் நதியளவு கொள்ளலாய் நூறு பாட்டு. இதை விட இன்னும் இருக்கிறது ஆனால் ஒரு எல்லை வேண்டும் என்று நூறோடு நிறுத்தினேன்.

“கற்பூர பொம்மை ஒன்று கை வீசும் தென்றல் ஒன்று” என்று எழுதும் போதே காதுக்குக்குள் பி.சுசீலாவின் அரவணைக்கும் குரல் வந்து அழுகை மூட்டும் எப்போது கேட்டாலும். இவ்வளவு அடக்க ஒடுக்கமான குரலில் இருந்தா “டார்லிங் டார்லிங் டார்லிங் ஐ லவ் யூ லவ் யூ” பிறந்தது என்ற ஆச்சரியம் எழும் எனக்கு. “ஆடும் நேரம் இதுதான் இதுதான்” என்று பாடும் குரலைக் கேட்டால் போதை ஊசி செருகியது போல ஒரு கிறக்கம் எழும். இப்படிச் சொல்லிக் கொண்டே போகலாம் சிலாகித்துக் கொண்டே இருக்கலாம் இசையரசியின் பாடல்களை வைத்து.

“சொந்தமில்லை பந்தமில்லை” என்றொரு அவல ஓசையாய் அன்னக்கிளியில் இருந்து “நட்டு வச்ச ரோசாச்செடி” என்று உயிர்ப்பூவாய் அரண்மனைக் கிளி வரை 16 ஆண்டுகள் தொடர்ந்த பயணத்தின் திரட்டுத்தான் இந்த நூறும்.

இசையரசி P.சுசீலா புகழோடும் சிறப்போடும் நோய் நொடியற்ற வாழ்வோடும் நூறாண்டைக் கடக்க இனிய பிறந்த நாள் வாழ்த்துகள்.

1. சொந்தமில்லை பந்தமில்லை – அன்னக்கிளி

2. கேட்டேளா அங்கே – பத்ரகாளி

3. கண்ணன் ஒரு கைக்குழந்தை – பத்ரகாளி

4. தேனில் ஆடும் ரோஜா – அவர் எனக்கே சொந்தம்

5. நான் அழைக்கிறேன் – அச்சாணி

6. தாலாட்டு – அச்சாணி

7. என் கண்மணி – சிட்டுக்குருவி

8. ஒரே இடம் – சட்டம் என் கையில்

9. மேகமே தூதாக வா – அவள் ஒரு பச்சைக்குழந்தை

10. டார்லிம்க் டார்லிங் – ப்ரியா

11. அப்பனே அப்பனே – அன்னை ஓர் ஆலயம்

12. நதியோரம் – அன்னை ஓர் ஆலயம்

13. எந்தன் பொன் வண்ணமே – நான் வாழ வைப்பேன்

14. சிந்து நதிக்கரையோரம் – நல்லதொரு குடும்பம்

15. ராஜா சின்ன ராஜா – பூந்தளிர்

16. நான் ஒரு பொன்னோவியம் – கண்ணில் தெரியும் கதைகள்

17. தேர் கொண்டு சென்றவன் – எனக்குள் ஒருவன்

18. வராத காலங்கள்‬ – நதியைத் தேடி வந்த கடல்

19. எங்கேயோ ஏதோ – நதியைத் தேடி வந்த கடல்

20. நேரமிது – ரிஷி மூலம்

21. ஆடு நனையுதுன்னு – அன்புக்கு நான் அடிமை

22. காத்தோடு பூவுரச – அன்புக்கு நான் அடிமை

23. ஒன்றோடு ஒன்றானோம் – அன்புக்கு நான் அடிமை

24. வயலோடு மயிலாட்டம் – அன்புக்கு நான் அடிமை

25. சந்தனமிட்டு – ருசி கண்ட பூனை

26. அழகழகா பூத்திருக்கு – காளி

27. ஓ தென்றலே – நெஞ்சத்தைக் கிள்ளாதே

28. பல நாள் ஆசை – இன்று போய் நாளை வா

29. கலை மானே – கடல் மீன்கள்

30. மதினி மதினி – கடல் மீன்கள்

31. ஏரு புடிச்சவரே – கரையெல்லாம் செண்பகப் பூ

32. மாப்பிள்ளைக்கு மாமன் மனசு – நெற்றிக்கண்

33. விழியில் உன் விழியில் – ‪ராம் லட்சுமண்‬

34. அமுதே தமிழே – கோயில் புறா

35. இசையரசி – தாய் மூகாம்பிகை

36. கோலப்புரசே – தாய் மூகாம்பிகை

37. அழகே உன்னை – வாலிபமே வா வா

38. வாலைப் பருவத்திலே – கண்ணே ராதா

39. நினைத்து நினைத்து வரைந்த ஓவியம் – கேள்வியும் நானே பதிலும் நானே

40. பூந்தென்றல் காற்றே வா – மஞ்சள் நிலா

41. பெண் மயிலே – மஞ்சள் நிலா

42. என்ன சொல்லி நான் எழுத – ராணித்தேனி

43. கன்னிப் பொண்ணு – நினைவெல்லாம் நித்யா

44. ஆப்பக் கடை – பாயும் புலி

45. பொத்துக்கிட்டு – பாயும் புலி

46. கங்கை ஆற்றில் – ஆயிரம் நிலவே வா

47. பேசக்கூடாது – அடுத்த வாரிசு

48. காளிதாசன் – சூரக்கோட்டை சிங்கக்குட்டி

49. பாட வந்ததோ – இளமைக் காலங்கள்

50. ராகவனே – இளமைக் காலங்கள்

51. சோலைப் புஷ்பங்களே – இங்கேயும் ஒரு கங்கை

52. கண்ணுக்குள்ளே யாரோ – கை கொடுக்கும் கை

53. தென்னங்கீற்றும் தென்றல் காற்றும் – முடிவல்ல ஆரம்பம்

54. மெல்ல மெல்ல – வாழ்க்கை

55. பூவிலே மேடை – பகல் நிலவு

56. காலைத் தென்றல் – உயர்ந்த உள்ளம்

57. இளமைக் காலம் எங்கே – தாய்க்கு ஒரு தாலாட்டு

58. அலையில பிறந்தவ – தாய்க்கு ஒரு தாலாட்டு

59. சுமங்கலி பூஜை – தர்ம பத்தினி

60. ஏஞ்சல் – நானும் ஒரு தொழிலாளி

61. உன்னைக் காணா – நட்பு

62. ஆசை வச்சேன் – நட்பு

63. வரம் தந்த சாமிக்கு – சிப்பிக்குள் முத்து

64. ஆடும் நேரம் – சூரசம்ஹாரம்

65. ராசாத்தி மனசுல (சந்தோஷம்) – ராசாவே உன்ன நம்பி

66. ராசாத்தி மனசுல (சோகம்) – ராசாவே உன்ன நம்பி

67. சிந்திய வெண்மணி – பூந்தோட்டக் காவல்காரன்

68. ஆசையில பாத்தி கட்டி – எங்க ஊரு காவக்காரன்

69. அரும்பாகி – எங்க ஊரு காவக்காரன்

70. ஜிவ்வுன்னு – எங்க ஊரு காவக்காரன்

71. மாலைக் கருக்கலிலே – எங்க ஊரு காவக்காரன்

72. ஆசையிலே (தனித்து) – எங்க ஊரு காவக்காரன்

73. தோப்போரம் – எங்க ஊரு காவக்காரன்

74. தென்மதுரை வைகை நதி (சோகம்) – தர்மத்தின் தலைவன்

75. தென்மதுரை வைகை நதி – தர்மத்தின் தலைவன்

76. உன் நெஞ்சத் தொட்டு சொல்லு – ராஜாதி ராஜா

77. மல்லிகைப் பூ – என்னப் பெத்த ராசா

78. பூப்பூக்கும் மாசம் – வருஷம் 16

79. ஏலே இளங்கிளியே – நினைவுச் சின்னம்

80. மன்னவர் பாடும் – பொங்கி வரும் காவேரி

81. தூரி தூரி – தென்றல் சுடும்

82. மனதில் ஒரேயொரு – என் புருஷன் தான் எனக்கு மட்டும் தான்

83. தத்தெடுத்த முத்துப்பிள்ளை – ரெட்டை வால் குருவி

84. காத்திருந்த மல்லி மொட்டு – மல்லு வேட்டி மைனர்

85. கற்பூர பொம்மை ஒன்று – கேளடி கண்மணி

86. ஆராரோ பாட வந்தேனே – பொறுத்தது போதும்

87. ரெட்டக் குருவி – இரும்புப் பூக்கள்

88. இங்கே இறைவன் – சார் ஐ லவ் யூ

89. சாரங்க தாரா – பொண்ணுக்கேத்த புருஷன்

90. துளித் துளி மழையாய் – கண்ணுக்கொரு வண்ணக் கிளி

91. பூங்காவியம் – கற்பூர முல்லை

92. அண்ணே அண்ணே – கிருஷ்ணன் வந்தான்

93. ஒரு உறவு அழைக்குது – கிருஷ்ணன் வந்தான்

94. அன்னை தாலாட்டுப் பாட – அம்பிகை நேரில் வந்தாள்

95. உன்னை நம்பி நெத்தியிலே – சிட்டுக்குருவி

96. பார்த்தா பச்சை பாப்பா – அர்ச்சனைப் பூக்கள்

97. சொன்ன பேச்சை – தாலாட்டு கேட்குதம்மா

98. கானலுக்குள் மீன் பிடித்தேன் – காதல் பரிசு

99. மனதிலே ஒரு பாட்டு – தாயம் ஒண்ணு

100. நட்டு வச்ச ரோசாச்செடி – அரண்மனைக் கிளி

‪போனஸ்‬

நண்பர் நாடோடி இலக்கியன் பரிந்துரையில்

‪முத்துமணி மாலை (சின்னக் கவுண்டர்),

பட்டுக்கன்னம் (காக்கிச்சட்டை)‬

‪தெற்குத் தெரு மச்சானே (இங்கேயும் ஒரு கங்கை)‬

நண்பர் ஹரியார் பரிந்துரையில்

தென்னமரத்துல தென்றல் அடிக்குது (லட்சுமி)

‪நண்பர் ப்ரீத்தம் கிருஷ்ணா பரிந்துரையில் ‬

‪மயங்கினேன் சொல்ல – நானே ராஜா நானே மந்திரி‬

‪அந்தி மழை மேகம் – நாயகன்‬

நண்பர் ஹரி பரிந்துரையில்

‪ராசாவே ஒன்ன – வைதேகி காத்திருந்தாள்‬

கானா பிரபா

13.11.2018

இன்னொரு ஸ்வர்ணலதா இருக்கிறார் தெரியுமா?

“மாலைச் செவ்வானம் உன் கோலம் தானோ?

https://youtu.be/02qQ7xYsISY இந்தப் பாடல் இளையராஜா வெறியர்களின் பெரு விருப்பப் பாடல்களில் ஒன்று. படத்தின் தலைப்பும் அப்படியே. “இளையராஜாவின் ரசிகை” என்ற பெயரில் வெளிவர இருந்து இதுவரை வெளிவராத படம் 40 வருடங்கள் கழித்தா இனிமேல் வெளிவரப் போகிறது? அன்னக்கிளி புகழ் தேவராஜ் – மோகன் இரட்டை இயக்குநர்கள் இயக்கவிருந்த படமது.

இந்த மாலைச் செவ்வானம் உன் கோலம் தானோ பாடலை இளையராஜாவுடன் இணைந்து பாடியவர் ஸ்வர்ணலதா. என்னடா இது அப்படியென்றால் ஐந்து வயசிலேயே அவர் பாடியிருக்கிறாரா என்றால் இல்லை. இவர் இன்னொரு ஸ்வர்ணலதா. கூடவே R.S.ஸ்வர்ணலதா என்று போட்டிருந்தால் குழப்பம் வந்திருக்காது ஆனால் மூல இசைத் தட்டில் கூட ஸ்வர்ணலதா என்றே போடப்பட்டிருக்கும்.

R.S.ஸ்வர்ணலதாவின் குரல் கிட்டத்தட்ட ஜென்ஸி அலைவரிசை தான். இவர் மேடைப் பாடகியாகவே அதிகம் அறியப்படுகிறார். “வாய் மணக்க நிஜாம் பாக்கு” விளம்பரக் குரல் மன்னன் எஸ்.வி.ரமணன், அதான் அனிருத் தாத்தா அவர் தான் ஆர்.எஸ்.ஸ்வர்ணலதாவின் குரு. ஸ்வர்ணலதா பாடகியாக மட்டுமன்றி விளம்பரக் குரலிலும் அறியப்படுவர். திலீப் என்றிருந்த காலத்தில் ரஹ்மானின் விளம்பர இசைக் கோவையிலும் பங்களித்துள்ளார்.

தொண்ணூறுகளில் தமிழீழ விடுதலைப் புலிகள் ஒரு அரசியல் இயக்கமாக விடுதலைப்புலிகளின் மக்கள் முன்னணி என்ற அமைப்பைத் தொடங்கிய நேரம் யாழ்ப்பாணத்தில் தேனிசை செல்லப்பாவுடன் இசை நிகழ்ச்சி படைக்க யாழ்ப்பாணம் முற்றவெளிக்கு வந்து கச்சேரி படைத்த போது யாழ்ப்பாணமே திரண்டு வந்து அந்த நிகழ்ச்சியைப் பார்த்தது. நானும் அங்கு சென்று அதுவரை காணாத கூட்டத்தைப் பார்த்து மிரண்டிருக்கிறேன். இந்த ஸ்வர்ணலதா ஆரம்ப கால ஈழ எழுச்சிப் பாடல்களையும் பாடியிருக்கிறார்.

கானா பிரபா

23.09.2018

நீல மலைச்சாரல் தென்றல் நெசவு நடத்துமிடம் ❤️❤️❤️

ரஹ்மான் இசை மெது மெதுவாகத் தான் கொல்லும் என்பார்கள். ஆனால் அதை நான் மறுதலிக்கிறேன், நேற்று “மழைக்குருவி” பாட்டைக் கேட்ட உடனேயே அந்த மாற்றம் என்னுள் சயனைட் ஆக இறங்கி விட்டது.

சிட்டுக் குருவியின் பின்னால் தான் மனம் ஓடிக் கொண்டிருக்கிறது மழைக் குருவி பாட்டைக் கேட்டுக் கொண்டே.

ஏ.ஆர்.ரஹ்மான் தன் பாடல்களில் ஜாலம் தரும் இசைக் கோவைக்குக் கொடுக்கும் முக்கியத்துவம் அளவுக்கு மெட்டுகளில் பொதிந்த வரிகளுக்குக் கொடுப்பதில்லை என்பது என் அனுமானம். அதாவது பாடல் ஒன்றின் ஆரம்பத்திலோ அல்லது இடை வரிகளிலோ காணும் கவியாழம் மிகுந்த சொற்களை நளினப்படுத்துவது அரிது. அந்த மாதிரியான காரியத்தை குறித்த பாடகரின் பொறுப்பிலேயே விட்டு விடுவார்.

ஹரிஹரனோ, நித்யஶ்ரீயோ அல்லது வழக்கம் போல் எஸ்.பி.பியோ தமக்கான பாணியில் அவற்றை அழகுபடுத்துவதைக் காணலாம். ரஹ்மானின் தனித்துவம் என்பதே அதுதான் ஒரு குறித்த இசைக்கலைஞரோ அல்லது பாடகரோ அவரவளவில் எந்த அளவுக்குச் சிறப்பாகக் கொடுப்பாரோ அதை வாங்கி வைத்து அழகானதொரு பிரமாண்டமான கேக் ஒன்றை அமைத்து விடுவார். அதுதான் ரஹ்மான். விக்கு விநாயக் ராம் இல் இருந்து பாடகி ஹரிணி உள்ளிட்ட பல்வேறு இசைக் கலைஞர்கள் இதை முன் மொழிந்து பேட்டியில் சொல்லியிருக்கிறார்கள். ஆனால் இந்தக் கட்டுடைப்பை ரஹ்மான் தானே பாடிய ஒரு பாடலில் நிகழ்த்திக் காட்டியிருக்கிறார். அதுதான் “மழைக் குருவி” என்ற “செக்கச் சிவந்த வானம்” என்ற பாடல்.

நீல மலைச் சாரல்……

இந்த ஆரம்ப வரிகளைக் கவனியுங்கள் இதில் “நீல” என்ற அந்தத் தொடக்கத்தை எவ்வளவு நளினமாகக் கீழிறக்குவார். ஒவ்வொரு சொற்களையும் பேசும் போதும் பாடும் போதும் வித்தியாசப்படுகிறது. எப்படியென்றால் இங்கே ரஹ்மான் பாடுவதைப் போலத் தான்

நீல…..

மலைச்

சாரல்

என்று கீழிறக்குவாரே அங்கே தான் ஒரு பாடகன் தன் குரலுணர்ச்சி வழியாகக் கேட்பவனுக்கு அந்த உலகத்தைக் காட்டுவது.

வீதிக்குப் பழக்கப்பட்ட காரோட்டி ஒருவன் தன் ஒரு கையை சன்னல் கரையோரம் கிடத்தி விட்டு கையால் காரின் வழி திருப்பும் சக்கரத்தை நகர்த்தி ஓடுமாற் போல வானில் எட்டப் போய்த் தன் சிறகிரண்டையும் தள்ளி விட்டுக் காற்றில் அலைந்தும், மிதந்தும், இறங்கியும், ஏறுமாற் போல இருக்கிறது

நீல மலைச்சாரல் தென்றல் நெசவு நடத்துமிடம்

என்ற ஆரம்ப வரிகள் மலைச் சாரலை அளவெடுத்துப் பாடும் பாங்கில் இருக்கும்.

வழக்கத்துக்கு மாறாக ரஹ்மான் குரலில் வரிகளை நோக்கி ஒரு அந்நியோன்யம் மிகுந்த தொனி இருப்பதைப் பார்க்கிறேன்.

ந ந ந ந நனனன…

என்று ராஜாத்தனம் காட்டுகிறார்.

“தெரியவில்லை…..”

என்னும் போது ஒரு ஏக்கம் கவ்விக் கொள்கிறது.

“விட்டுப் பிரிந்தேன்….”எனும் போது குரல் கம்மிக் கொள்கிறது. இப்பேர்ப்பட்ட வித்தியாசமான ரஹ்மானை நான் கேட்டதில்லை.

காட்டில் அந்நேரம்

கதையே வேறு கதை

கூட்டை மறந்துவிட்டுக்

குருவி கும்மியடித்ததுகாண்

என்று ஆரம்பிக்கும் வரிகளில் இருந்து இன்னொரு குரலைச் சேர்த்திருக்கலாம் என்பது என் உணர்வு.

ஒரு சிட்டுக் குருவிக்கும் மனிதனுக்குமான இயற்கையின் பந்தம் காதலோடு பொருத்திப் பார்க்கப்படுகிறது.

வைரமுத்து அவர்கள் ஏற்கனவே எழுதிய “மழைக்குருவி” என்ற கவிதை சில மாற்றங்களோடு கவிதையின் சில பகுதிகள் மட்டும் எடுத்துக் கையாளப்பட்டிருக்கின்றன.

இந்தப் பாடல் என்னை ஆக்கிரத்ததும் பாடல் வரிகளை மூலப் பாடலோடு ஒப்பிட்டுப் பாடலைக் கேட்டபடியே எழுதினேன். இதோ

நீல மலைச்சாரல்

தென்றல் நெசவு நடத்துமிடம்

நீல மலைச்சாரல்……

வானம் குனிவதிலும்

மண்ணைத் தொடுவதிலும்

காதல் அறிந்திருந்தேன்

கானம் உறைந்து படும்

ஞானப் பெருவெளியில் ஒரு

ஞானம் வளர்த்திருந்தேன்

இதயம் விரித்திருந்தேன் நான்

இயற்கையில் திளைத்திருந்தேன்

சிட்டுக் குருவியன்று

சிநேகப் பார்வை கொண்டு

வட்டப் பாறையின்மேல்

என்னை வா வா என்றது

கிச்சுக் கீச் என்றது

கிட்ட வா என்றது

பேச்சு எதுவுமின்றிப்

பிரியமா என்றது

கிச்சுக் கீச் என்றது

கிட்ட வா என்றது

பேச்சு எதுவுமின்றிப்

பிரியமா என்றது

ஒற்றைச் சிறுகுருவி நடத்தும்

ஓரங்க நாடகத்தில்

சற்றே திளைத்திருந்தேன்

கிச்சுக் கீச் என்றது

கிட்ட வா என்றது

பேச்சு எதுவுமின்றிப்

பிரியமா என்றது

ஒரு நாள் கனவு

இது பேரற்ற பேருறவோ….

யார் வரவோ…….

நீ கண் தொட்டுக்

கடந்தேகும் காற்றோ

இல்லைக் கனவினில் நான்

கேட்கும் பாட்டோ

இது உறவோ…..

இல்லைப் பரிவோ…

நீல மலைச்சாரல்

தென்றல் நெசவு நடத்துமிடம்

ந ந ந ந நனனன…

அலகை அசைத்தபடி பறந்து

ஆகாயம் கொத்தியதே

உலகை உதறிவிட்டுச் சற்றே

உயரப் பறந்ததுவே…

கிச்சுக் கீச் என்றது

கிட்ட வா என்றது

பேச்சு எதுவுமின்றிப்

பிரியமா என்றது

முகிலினம்

சர சர சரவென்று கூட

இடி வந்து

பட பட படவென்று வீழ

மழை வந்து

சட சட சடவென்று சேர

அடை மழைக் காற்றுக்குக்

குடையில்லை மூட

வான வெளி…

மண்ணில் நழுவி

விழுந்ததென்ன

திசையெல்லாம்

மழையில் கரைந்து

தொலைந்ததென்ன

சிட்டுக் குருவி பறந்த

திசையும் தெரியவில்லை

விட்டுப் பிரிந்து விட்டேன்

பிரிந்த வேதனை

சுமந்திருந்தேன்…..

விட்டுப் பிரிந்தேன் பிரிந்தேன்

உயிர் நனைந்தேன்

அந்தச் சிறுகுருவி

இப்போது அலைந்து

துயர் படுமோ…துயர் படுமோ

இந்த மழை சுமந்து

அதன் றெக்கை

வலித்திடுமோ….வலித்திடுமோ

காட்டில் அந்நேரம்

கதையே வேறு கதை

கூட்டை மறந்துவிட்டுக்

குருவி கும்மியடித்ததுகாண்

சொட்டும் மழை சிந்தும்

அந்தச் சுகத்தில் நனையாமல்

என்னை எட்டிப் போனவனை

எண்ணி எண்ணி அழுதது காண்

எனக்கு ஏ.ஆர்.ரஹ்மான் – மணி ரத்னம் – வைரமுத்து கூட்டணி வந்தால் உள்ளூர எழும் ஆனந்தத்துக்கு முக்கிய காரணம் “தமிழ்”.

தமிழ்ப் படமென்றாலும் தமிழுக்கு அந்நியமான காட்சிக் களத்தையும், சடங்குகளையும் போட்டுக் குழப்பி இந்திய வர்த்தகச் சந்தையை இலக்கு வைத்தாலும் தன்னுடைய படங்களில் “தமிழ்” தான் தலைப்பாக இருக்கும் கறார் பேர்வழி மணிரத்னம். அது போலவே ரஹ்மான் மற்றைய படங்களில் யாருடனாவது கூட்டுச் சேரட்டும் ஆனால் என் படம் என்றால் வைரமுத்து தான் என்று விடாக்கண்டனாக இருப்பார்.

இங்கே இந்த இடத்தில் வைத்து வைரமுத்துவின் தேவை ஏன் முக்கியமாகப்படுகிறது என்று நோக்குவதற்கு இந்த மூவர் கூட்டணியில் ஏராளம் பாடல்களைக் காட்டினாலும் இந்த “மழைக்குருவி” பாடல் இன்னும் வெகு நெருக்கமான உதாரணமாக அமையும். இன்று யாரும் பாட்டெழுதலாம், எதையும் போட்டு எழுதலாம் என்ற சூழலில் வைரமுத்துவின் பங்களிப்பு முக்கியமாகப்படுகிறது.

பாடல் வழியே அந்தக் காட்சியின் பின் புலத்தைத் தொடுவதோடு அழகிய தமிழ்ச் சொற்களையும் ரம்மியமான வரிகளோடு பொருத்தி விட்டு அழகு பார்ப்பார் வைரமுத்து.

இன்றைய சூழலில் ஒரு ரஹ்மானையோ, வைரமுத்துவையோ அவர்களின் திறமையைப் பறை சாற்ற, காமராஜர் அரங்கத்தைக் கூட்டிக் கொள்ளை கொள்ளாக் கூட்டத்தோடு ஒரு விழா எடுக்கும் பாங்கில் மணிரத்னத்தின் ஒற்றைப் பாடலே செய்து முடித்து விடுகிறது.

எப்படித் தாய்த் தயாரிப்பாளர் தன் பஞ்சு அருணாசலம் படங்களில் இசைஞானி இளையராஜா கொடுத்ததெல்லாம் தனியானதொரு விசேஷம் பெறுமோ அப்படியே இந்த ரஹ்மான் மணிரத்னத்தோடு சேரும் போதெல்லாம் உணர்கிறேன்.

ஊருக்கு எவ்வளவு தான் ஆக்கிப் போட்டாலும் தன் தாய்க்குச் செய்து காட்டிப் பெருமை வாங்கும் சிட்டுக் குருவியாய் இந்தப் பாட்டு.

கானா பிரபா

09.09.2018

நா.முத்துக்குமார் 💕இளையோரின் இதய ஓசை

பாடலாசிரியர் நா.முத்துக்குமார் வெறும் பன்னிரண்டு ஆண்டுகள் தான் திரையிசை உலகத்தில் இயங்கிவர். அதிலும் அவரின் ஆரம்ப கால முயற்சிகளைக் கழித்து விட்டுப் பார்த்தால் ஒரு தசாப்தமே தேறக் கூடியவர் ஆனால் அவரின் திடீர் இழப்பில் மனம் துவண்ட கூட்டத்தைக் கண்டு உள்ளூரப் பிரமிப்பும் எழுந்தது.

ஒரு கண்ணதாசனையோ, ஒரு வாலியையோ. ஒரு வைரமுத்துவையோ கொண்டாடக் கூடிய எல்லை வரை முத்துக்குமாரைக் கொண்டாடினார்கள் இந்த இளையோர். அதன் பின்னணியில் ஒரு உண்மை இருக்கிறது.

ஒவ்வொரு காலகட்டத்திலும் கோலோச்சிக் கொண்டிருக்கும் படைப்பாளிகளைப் பார்த்தால் அவர்கள் அந்தந்தக் காலப் பகுதியில் மையம் கொண்டிருக்கும் இளையோரின் நாடித்துடிப்பைச் சரியாக அறிந்து வைத்தவர்களாகத் தான் அடையாளப்படுவார்கள்.

“வசந்தங்கள் வாழ்த்தும் பொழுது

உனது கிளையில் பூவாவேன்

இலையுதிர்காலம் முழுதும்

மகிழ்ந்து உனக்கு வேராவேன்”

என்று வைரமுத்துவின் வரிகள் எப்படி அந்தக் காலத்து இளையோரை ஈர்த்ததோ அது போலவே முத்துக்குமாரின் பாடல்களில் அந்நியோன்யம் இருக்கும். எப்படி எண்பதுகளில் வைரத்துவை மீறிய படைப்பிலக்கிய கர்த்தாக்கள் இருந்தார்களோ அது போலவே முத்துக்குமாரை வெல்லும் எழுத்தாளுமைகளும் இருக்கிறார்கள்.

ஆனால் இவர்களின் வெற்றிக்குப் பின்னால் தம்காலத்து ரசிகனின் உணர்வை மொழி பெயர்க்கும் வித்தை அவர்களுக்குக் கிட்டியது. எந்த இசையமைப்பாளர் என்றாலும் முத்துக்குமார் தன் வரிகளுக்காகவே பாடல் கேட்கும் ஒரு சமுதாயத்தை உருவாக்கினார்.

காலா காலமாகப் பெண்ணை வர்ணித்தே பழகிப் போன கவிஞர்களில் இருந்து விலகி, முதல் அடிகளிலேயே

“அவள் அப்படி ஒன்றும் அழகில்லை” என்று கொடுத்தவர் முத்துக்குமார். பாடல் முழுக்க இல்லை இல்லை என்று எதிர்மறையோடு பயணிக்கும்.

ஆனால் அந்த “இல்லை” ஐத்தான் இருப்பின் அடையாளமாக நிறுவுவார் முத்துக்குமார்.

பொதுவாக எல்லோருமே பெற்ற தாயைக் கொண்டாடும் போது இங்கேயும் விலகி நின்று தன் தந்தை புராணத்தை முத்துக்குமார் “அணிலாடும் முன்றல்” இல் எழுதும் போது என்னைப் போலவே பலரும் இருந்திருப்பர், இதயத்தின் ஒரு கரையில் நம் தந்தையை நினைவுபடுத்திக் கொண்டே அந்தத் தொடரைப் படித்த போது.

“வேப்பங்கொட்டை அடிச்சு வந்த ரத்தம் ரசிச்சோம்

வத்திக்குச்சி அடுக்கி கணக்கு பாடம் படிச்சோம்

தண்ணியில்லா ஆத்தில் கிட்டிப்புள்ளு அடிச்சோம்

தண்டவாளம் மேல காசை வச்சு தொலைச்சோம்

அஞ்சு பைசா ஃபிலிமை வாங்கி அப்பாவோட வேட்டியிலே

கண்ணாடி லென்சை வச்சு சினிமா காமிச்சோம்”

இதெல்லாம் நாம் வாழ்ந்து கழித்த வாழ்க்கை, இதையெல்லாம் அப்படியே ஒளிக்கருவியில் படம் பிடித்ததைப் போலக் கொடுத்திருப்பார் முத்துக்குமார்

“வெயிலோடு விளையாடி வெயிலோடு உறவாடி

வெயிலோடு மல்லுக்கட்டி ஆட்டம் போட்டோமே”

பாடலில்.

“அன்று பார்த்தது…..

அந்த பார்வை வேறடி…

இந்த பார்வை வேறடி….”

சமந்தா வயதில் பள்ளிச்சீருடையில் பள்ளிக்காதலி நினைவுக்கு வந்து போவாள்,

“வானம் மெல்ல கீழிறங்கி

மண்ணில் வந்து ஆடுதே….

தூறல் தந்த வாசம் இங்கு வீசுதிங்கே….”

கேட்கும் போதெல்லாம்.

“பறவையே எங்கு இருக்கிறாய்

பறக்கவே என்னை அழைக்கிறாய்

தடயங்கள் தேடி வருகிறேன் அன்பே”

இந்த வரிகளைக் கேட்கத் தேவையில்லை நினைத்தாலேயே அடி மனதைக் கவ்வும் ஒரு சோகம் பீடிக்கும், அங்கும் முத்துக்குமார் நிற்பார்.

நா.முத்துக்குமாரின் எழுத்து “காதல் கொண்டேன்” படத்தில் வந்த “தேவதையைக் கண்டேன்” பாடல் மூலமாகத் தான் வெகுஜன அந்தஸ்தை எட்டிப் பிடிக்க மூல காரணியாக் இருந்தது. இந்தப் பாடலுக்கான வரிகளை நா.முத்துக்குமார் எழுதித் தன் நண்பர் அஜயன் பாலாவுக்குப் பகிர்ந்த போது “இதென்ன வார்த்தை ஜாலமில்லாத வெகு இயல்பான வரிகளாக இருக்கிறதே” என்று சங்கோஜப்பட்டாராம் அஜயன் பாலா. ஆனால் இந்த வரிகள் தான் குறித்த பாத்திரப் படைப்புக்கு, அந்த எளிமை நிறைந்த வாலிபனுக்குப் பயன்படும் என்று சொன்ன முத்துக்குமாரின் வாக்குத்தான் பலித்தது. இன்றைய இளைஞரின் நாடித் துடிப்பை உணர்ந்த அந்தப் படைப்பாளி அந்தப் பாதையிலேயே வெற்றிகரமாக நடைபோட்டார்.

எழுத்தாளர் சுஜாதாவின் கவனத்தை ஈர்த்து அடையாளப்படுத்தப்பட்ட நா.முத்துக்குமார்,

இயக்குநர் சீமானின் “வீர நடை” படத்திற்காக முதன் முதலில் பாடலை எழுதியவர். திரையிசைப் பாடலாசிரியராகக் கிட்டிய அறிமுகத்தை நிரூபிக்கக் “காதல் கொண்டேன்” படத்தின் வெற்றி உறுதுணை புரிந்தது. தொடர்ந்து அதே வெற்றிக் கூட்டணி இயக்குநர் செல்வராகவன், இசையமைப்பாளர் யுவன் ஷங்கர் ராஜா, பாடலாசிரியர் நா.முத்துக்குமார்கொடுத்த “7G ரெயின்போ காலனி” பாடல்கள் மேலும் அவரின் புகழுக்கு மகுடம் வைத்தது.

ஒரு வருடத்தில் அதிக பாடல்களை எழுதும் பாடலாசிரியர், ஒரே படத்தில் எல்லாப் பாடல்களையும் அதிகம் எழுதிய பாடலாசிரியர் போன்ற சிறப்பு கண்ணதாசன், வாலி, வைரமுத்து காலத்துக்குப் பின் இவருக்கே கிட்டியது.

இயக்குநர் பாலு மகேந்திராவிடம் உதவியாளராகப் போய்ச் சேர்ந்த பாடலாசிரியர் நா.முத்துக்குமார்பின்னர் பாடலாசிரியராகத் தன்னை நிலை நிறுத்திய பின்னர் அதிலேயே மிகுந்த கவனமெடுத்தார். பொது வாழ்வில் தூய இலக்கியத்தை நேசிக்கும் படைப்பாளியாகப் புத்தக விழாக்களிலும், வெகுஜனப் பத்திரிகைகளில் தன் சுய வரலாறோடு இலக்கியம் சமைத்தார்.

புதிய தலைமுறை இசையமைப்பாளர்கள் பலரின் முக்கியமான பாடல்களில் நா.முத்துக்குமார்இருக்கிறார். “உனக்கென இருப்பேன்” என்று காதல் படத்தில் ஜோஷ்வா ஶ்ரீதர் இசையிலும், “சுட்டும் விழிச் சுடரே” என்று கஜினியில் ஹாரிஸ் ஜெயராஜ்ஜின் இசையிலும் என்று சில சோறு பதம், இன்னும் யுவன் ஷங்கர் ராஜா, ஜி.வி.பிரகாஷ்குமார் போன்றோரின் எண்ணற்ற படங்களின் வெற்றிப்பாடல்களில் இவரின் பங்கைக் காணலாம். கடந்த தசாப்தத்தின் தலை சிறந்த திரையிசைப் பாடல்களைப் பட்டியலிட்டால் கை கொள்ளாத அளவுக்கு நிரம்பவும் பாடல்களைக் கொடுத்த சிறப்பைப் பெற்ற நா.முத்துக்குமார் வெறுமனே இளைய சமுதாயத்தின் காதலுணர்வின் வெளிப்பாடுகளை மட்டும் கொடுத்தாரில்லை. “கற்றது தமிழ்”, “தங்க மீன்கள்” போன்ற கருத்தாழம் மிக்க படைப்புகளையும் தன் பாடல் வரிகளால் சுமந்தார்.

“ஆனந்த யாழை மீட்டுகிறாய்” என்ற “தங்க மீன்கள்” படப் பாடலுக்கும், “அழகே அழகே” என்ற “சைவம்” படப் பாடலுக்கும் தேசிய விருதைப் பெற்றிருக்கிறார்.

பாடலாசிரியர் நா.முத்துக்குமார் பிரிவுத் துயரை “ஆனந்த யாழை மீட்டுகிறாய்” (தங்க மீன்கள்), “நினைத்து நினைத்துப் பார்த்தால் (7ஜி ரெயின்போ காலனி) என்றும் அவர் எழுதிய பாடல்களை நண்பர்கள் நினைத்து துயருறும் போது எனக்கோ மனதின் ஓரத்தில் இருந்து “பேசுகிறேன் பேசுகிறேன் உன் இதயம் பேசுகிறேன்” என்ற பாடலே ஒலித்து அவர் நினைப்பையெழுப்பிக் கொண்டிருந்தது.

அது “சத்தம் போடாதே” படத்துக்காக யுவன் ஷங்கர் ராஜாவின் இசையமைத்து நேகா பேசின் பாடிய பாட்டு. நா.முத்துக்குமாரின் மரணச் சடங்கில் கலந்து கொண்ட இயக்குநர் வஸந்த்

“அண்ணா! இந்தப் பாட்டைக் கேட்ட ஒரு பெண் தன் தற்கொலை எண்ணத்தைக் கை விட்டுவிட்டாள்” என்று நா.முத்துக்குமார் மகிழ்ச்சியோடு சொன்னதைச் சொல்லி நெகிழ்ந்தார்.

யுவன் ஷங்கர் ராஜா இசைத்த மெல்லிசை கொண்ட பாடல்களைக் கேட்கும் போதெல்லாம் அவை சோகப் பாடல் மட்டுமன்றி சந்தோஷப் பரிமாறலாக இருந்தாலும் கூட மெல்லிய சோகம் இழையோடுவது போல உணர்வேன். இன்னும் சொல்லப் போனால் இளைய தலைமுறை இசையமைப்பாளர்களில் இந்த மாதிரி மென் சோகம் கலந்த பாடல்களைக் கொடுப்பதில் யுவனைத் தாண்டி யாரையும் நான் சிந்தித்ததில்லை. அவருக்குக் கூடத் தனிப்பட்ட ரீதியில் இம்மாதிரிப் பாடல்கள் துள்ளிசையை விட ஆத்ம லாபம் பொருந்தியதாக உணரக் கூடும்.

ஒரு இசையமைப்பாளரின் இசைத்துடிப்பறிந்து அதற்கு ஆத்மார்த்தமான வார்த்தை அர்த்தம் கற்பிக்கும் பாடலாசிரியர் வரம். இப்படியாக யுவன் ஷங்கர் ராஜாவுக்கு நா.முத்துக்குமாரும் வாய்த்தார்

“பேசுகிறேன் பேசுகிறேன் உன் இதயம் பேசுகிறேன்” இந்தப் பாடலைக் குறித்த காட்சிக்கான களப்பாடலாக மட்டுமன்றி இதையே தனித்து நம் உணர்வின் பரிமாறலாகத் திரை தாண்டி உணர முடிகின்ற வரிகள். அந்த வரிகளை நோகாமல் அணைத்து வருடும் இசை ஆறுதல் மொழி சொல்கிறது. இந்த மாதிரிப் பாட்டெல்லாம் வெறும் வணிகச் சரக்கிற்கான கூட்டணி அல்ல உணர்வுகளின் சங்கமம்.

நாற்பதோடு தன் காலக் கணக்கு முடியுமென்றே நினைத்து எழுதிக் குவித்து விட்டானோ இவன் எனுமளவுக்கு கொடுத்து விட்டுப் போய் விட்டார் முத்துக்குமார்.

அமர்ந்து பேசும்

மரங்களின் நிழலும்

உன்னை கேட்கும்

எப்படிச் சொல்வேன்

உதிர்ந்து போன மலரின் மௌனமா…..?

கானா பிரபா

14.08.2018

சிட்னியில் இசைஞானி இளையராஜாவின் இசை விருந்து ❤️ ஒரு கடைக்கோடி ரசிகனின் பார்வை

“ஐயா! ராஜா சார் ஐ வச்சு ஒரு பெரிய இசை நிகழ்ச்சியை சிட்னியில் நடத்தத் திட்டம் போட்டிருக்கிறன். சிட்னி சிம்பொனி ஆர்கெஸ்ட்ரா தான் இசை. எல்லாம் பேசியாச்சு. ராஜா சாரும் ஒத்துக் கொண்டுட்டார். அடுத்த வருஷம் நடக்கப் போகுது”

2008 ஆம் ஆண்டில் ஒரு நாள் நண்பர் கதிரிடமிருந்து எனக்கு வந்த தொலை பேசிச் சம்பாஷணை அது.

ஆனால் 2009 ஆம் ஆண்டு முள்ளிவாய்க்கால் யுத்தத்தோடு இந்த இசை நிகழ்ச்சியும் புதைந்து போனது. தொடர்ந்த இளையராஜாவின் உலக இசைச் சுற்றுலாக்களுக்குப் பிள்ளையார் சுழி போட்டதோடு அப்போது அது ஓய்ந்து விட்டது.

கதிர் வானொலி நேயராகவும், இளையராஜாவின் வெறி பிடித்த ரசிகராகத் தான் எனக்கு அறிமுகமானார்.

2013 ஆம் ஆண்டு மீண்டும் பழைய பல்லவியோடு இளையராஜாவின் இசை நிகழ்ச்சிக்கு மீண்டும் அச்சாரம் போட்டார். அதற்குள் தொலைக்காட்சி ஆதிக்கம் புலம்பெயர் சூழலில் வந்ததால் மக்கள் இசை நிகழ்ச்சி போய்ப் பார்க்கும் எண்ணிக்கை குறைய ஆரம்பிப்பதை எச்சரிக்கையோடு சொல்லி வைத்தேன். ஆனால் இம்முறை ராஜாவின் இசைக்குழுவை அழைப்பதாகவும் மெல்பர்னிலும் நிகழ்ச்சிக்கு ஒழுங்கமைப்பதாகவும் சொன்னார்.

“ராஜா சார் இங்கு வந்ததும் அவரை நீங்கள் தான்

கொண்டு திரியோணும்” என்பார்.

அவரின் நோய் ஒருபக்கம், நிதி நெருக்கடி இன்னொரு பக்கம் என்று ஏகப்பட்ட சவால்கள். நிகழ்ச்சி இன்னொரு தடவை ஒத்தி வைக்கப்பட்டது. ஆனால் இம்முறை மெல்பர்னில் மட்டும் என்ற நிலை வந்தது. MKS நிறுவனம் ஆபத்பாந்தவனாகக் கைகொடுத்ததை மறக்க முடியாது.

நான் தனியாக மெல்பர்ன் பயணித்து ஹோட்டலில் தங்கி ராஜாவின் இசை நிகழ்ச்சி பார்த்து முடித்து விட்டுத் திரும்பினால் நண்பர் ரோனியோடு கதிர். ராஜாவின் இசை நிகழ்ச்சிக்கு என்னவெல்லாம் சவால்கள் வந்தனவோ அவற்றையெல்லாம் முறியடித்தும் சிட்னியில் நிகழ்ச்சி நடத்த முடியாத கவலையே அவரின் முற்றிய நோயைத் தாண்டித் தெரிந்தது. MKS உரிமையாளரின் மகன் கதிரிடம் அன்பாகப் பேசியது மன நிறைவாக இருந்தது அப்போது.

“ஐயா நான் வெளிக்கிடப் போறேன்”

என்று கதிர், ரோனியிடம் விடை பெற்ற போது

“எப்பிடி ஐயா போகப் போறீங்கள்?” – கதிர்

“Taxi ல போறன்”- நான்

“சும்மா விசர்க்கதை கதையாமல் எங்கட காரிலை வாங்கோ”

என்று சொல்லி விட்டுத் தான் தங்கியிருந்த இடத்தில் இருந்து சுமார் ஒரு மணி நேரம் எதிர்த்திசையில் இருந்த என் ஹோட்டலுக்கு அழைத்துப் போனார். கார் ஓடிக் கொண்டிருக்கும் போது வழியில் அவருக்கு மூச்சு முட்டியது. ஓரமாகக் காரை நிறுத்தினார்.

“ஐயா கும்பிட்டுக் கேக்கிறன் நீங்கள் ரெண்டு பேரும் ஹொஸ்பிட்டலுக்கு உடனை போங்கோ”

என்ற எனக்குக் கை காட்டி அமைதியாக இருக்க வைத்து விட்டு கொஞ்ச நேரம் ஆசுவாசப்படுத்திவிட்டு என்னை என் ஹோட்டலில் விட்டுவிட்டுத்தான் தன் இருப்பிடம் போனார். அடுத்த நாள் அவர் வைத்தியசாலையில் தீவிர சிகிச்சையில் இருந்து தான் சிட்னி திரும்பினார். நண்பர் ரோனி உடனிருந்து உதவினார்.

2015 ஜனவரியில் நோயின் பிடியில் இருந்து தன்னைக் காப்பாற்ற முடியாமல் காலமாகிப் போனார் அன்பு நண்பர் கதிர்.

இப்படியாக இரண்டு முறை கலைந்து மூன்றாவது முறையாகத் தான் முதன்முறையாகச் சாத்தியப்பட்டிருக்கிறது இன்று நிகழ்ந்த சிட்னியில் இளையராஜாவின் இசை நிகழ்ச்சி.

“உங்க பாட்டைக் கேட்டு வளர்ந்தவங்க நாங்க,

இன்று கன்பெராவில் இருந்து இந்த நிகழ்ச்சிக்காக

சிட்னிக்குக் காரில் வருமபோது என் மகன்

ராசாத்தி உன்னைக் காணாத நெஞ்சு பாடிக்கிட்டே

வந்தான். அவன் பிறக்கறதுக்கு முன்னாடி வந்த

பாட்டைக் கூட அவனைப் போல குழந்தைகளையும் ரசிக்க வைக்கிற அளவுக்கு நீங்க கொடுத்த இசை அமைஞ்சிருக்கு” என்று நேற்று இளையராஜாவோடு ரசிகர்களின் சந்திப்பில் ஒரு அன்பர் நெகிழ்ந்து பேசிய போது

“உங்க குழந்தை கருவில் இருந்தே என் பாட்டைக் கேட்டிருக்கு” என்று இசைஞானி இளையராஜா முறுவலோடு பேசினார்.

சிட்னியில் இசை நிகழ்ச்சி நடந்தாலும் அவுஸ்திரேலியாவின் மற்றைய பாகங்களில் இருந்தும் இசைஞானியின் ரசிகர்கள் வந்திருந்தார்கள். அடலெய்டில் இருந்து என் சென்னை நண்பர் பிரசன்னாவின் நண்பர் கூட ராஜா சந்திப்பில் என்னிடம் தன்னை அறிமுகப்படுத்திப் பேசினார்.

சிட்னியின் நவீன அரங்கு Hillsong Convention Centre இல் அரங்கம் திரண்ட கூட்டத்தோடு நிகழ்ச்சி தொடங்கியது.

“இசைஞானியின் வேண்டுகோளுக்கிணங்க கலைஞர் கருணாநிதிக்கு இரண்டு நிமிட அஞ்சலி செலுத்துவோம், ஒரு நூற்றாண்டு வாழ்ந்தவர் நம்ம கலைஞர் இன்னும் பல நூற்றாண்டுகள் பேசப்படுவார்” என்ற உரையோடு நடிகர் பிரகாஷ்ராஜ் அறிமுகமானார்.

இந்த நிகழ்ச்சியின் பிரதம விருந்தினர் சக அறிவிப்பாளர் என்று அறிமுகப்படுத்தப்பட்டவர்

“விடுமுறைக்காக மகனுடன் வந்தேன் இன்று இந்தியா கிளம்ப இருந்தது ஆனால்

என்னுடைய வாழ்க்கையில் ஒன்று கலந்த இசைஞானி இளையராஜாவின் இசையை உங்களோடு ஒருவனாக இருந்து பார்க்கப் போகிறேன்” என்று சொன்னவர்

அந்த உரையோடு அப்படியே போய் விட்டார்.

இந்த இசை நிகழ்ச்சிக்காக வர இருந்த கார்த்திக் ராஜா மட்டுமன்றி கடந்த முறை மெல்பர்னில் 70 க்கும் மேற்பட்ட வாத்தியக்காரர்களின் அணிவகுப்போடு நடந்தது இம்முறை கால்வாசிக்கும் குறைவான வாத்தியக்கார்களோடே நிகழ்ச்சி நடந்தேறியது.

நெப்போலியன் (எ) அருண்மொழின் புல்லாங்குழல், பிரபாகரின் வயலின், தபேலா சுந்தர், இவர்களோடு செல்லோவுடன் குன்னக்குடி வைத்திய நாதனின் மகன் என்று ஒரு சில அறியப்பட்ட முகங்கள் தான்.

இசைஞானி இளையராஜா தன் முத்திரைப் பாடலான “ஜனனி ஜனனி” பாடலோடு ஆரம்பித்து வைக்க, ஓம் சிவோஹம் பாடலோடு களத்தில் இறங்கினார் மது பாலகிருஷ்ணன். விஜய் பிரகாஷுக்கு மாற்றுக் குறையாதவராக மதுவும் தன் மதுக்குரலால் கட்டி வைத்தார்.

கடந்த 2013 மெல்பர்ன் இசை நிகழ்ச்சியில் பாடிய பாடல்களைத் தவிர்த்துப் பாட வேண்டும் என்று கங்கணம் கட்டியிருப்பார்கள் போல, ஒரு சில பாடல்களைத் தவிர்த்து மீதி எல்லாம் சிட்னி மேடைக்கு மட்டுமல்ல ஆஸி மேடைக்கும் புதிதாக எடுத்து வந்திருந்தார்கள்.

மனோ, சித்ரா இருவரும் இளையராஜா மேடைகளில் தவறாது இடம்பெறும் நட்சத்திரப் பாடகர்கள். ஆனால் எஸ்.பி.பாலசுப்ரமணியம் அவர்களின் பாடல்களை மனோவுக்கு வாரி வழங்கியதால் மனோவுக்கான தனித்துவமான பாடல்கள் மட்டுமல்ல மனோ & சித்ரா இருவரும் ஜோடி கட்டிய பாடல்களில் ஒன்றிரண்டைக் கொடுத்திருந்தால் கலக்கியிருக்கும். உதாரணத்துக்கு செண்பகமே செண்பகமே, மதுர மரிக்கொழுந்து வாசம், ஒரு மைனா மைனாக் குருவி இதையெல்லாம் எதிர்பார்த்தேன்.

தமிழ் ரசிகர்களோடு தெலுங்கு, மலையாளம், கன்னட ரசிகர்களும் சேர்ந்து கொண்டதால்

தெலுங்கு வேணும் என்று கத்திய கூக்குரலளார்களுக்காக “ஓ ப்ரியா ப்ரியா” பாட்டைப் பாதியாகப் பிரித்துத் தெலுங்கு, தமிழ் என்று மனோ, சித்ரா பாடிய போது கிட்டிய அரங்கில் கெலித்த கரகோஷமே இவ்விருவர் கூட்டணிப் பாடல்களை என்னைப் போலவே பலரும் எதிர்பார்த்தது போல அசரீரியாகக் கொட்டியது.

“ஓகோ மேகம் வந்ததோ” பாடலைக் கூட்டுக் குரல்களுடன் பாடிய சித்ரா ஒரு ஜீவன் அழைத்தது, பூமாலையே தோள் சேரவா போன்ற பாடல்களை ராஜாவோடும்

மனோவோடு ராத்திரியில் பூத்திருக்கும், சுந்தரி கண்ணால் ஒரு சேதி ஆகியவற்றையும் பாடியவர் மது பாலகிருஷ்ணனோடு சேர்ந்து “கல்யாணத் தேனிலா” பாடலையும் கொடுத்திருக்கலாமே என்று வேதாளம் முருங்கை மரத்தில் ஏறி ஏங்கியது😃

“மடை திறந்து தாவும் நதியலை நான்” என்று கூட்டுக் குரல்கள், பக்கவாத்தியத்தோடு

தனித்துப் பாடிய மனோவுக்குக் கிட்டிய இன்னொரு தனிப்பாட்டு வெள்ளிச் சலங்கைகள் கொண்ட கலைமகள். ஏஞ்சோடி மஞ்சக்குருவி பாடல் மனோவுக்கு அச்சொட்டாகப் பொருந்தி அவரின் குரல் ஜாலத்தைக் காட்டியது.

மனோவுக்கு எஸ்.பி.பாலசுப்ரமணியம் பாடல் என்றால் மது பாலகிருஷ்ணனுக்கு ஜேசுதாஸ் என்று கணக்குப் போட்டு ஒலித்தது “பூவே செம்பூவே” பாட்டு. இந்தப் பாட்டை நேரே மேடையில் பார்க்கும் போது அந்த வயலின்களின் ஜாலத்தையும், அருண்மொழி அவர்கள் மாறி மாறி வெவ்வேறு ஒலியெழுப்பும் புல்லாங்குழல்களையும் பயன்படுத்துவதைப் பார்ப்பதே உன்னதமானதொரு அனுபவம்.

இதோ எஸ்.பி.பி, ஜேசுதாஸ் கணக்கில் மலேசியா வாசுதேவனுக்காகப் பாடகர் முகேஷ் ஐயும் சேர்த்தாச்சு. “நீயும் சிட்னியை விடுறதாயில்ல சிட்னியும் உன்னை விடுறதா இல்லை” என்று ராஜாவின் கிண்டலுக்கு ஆளானார் அடிக்கடி சிட்னி வந்து இசை நிகழ்வில் பங்கேற்கும் பாடகர் முகேஷ். “பூவே இளைய பூவே” உடன் தொடங்கினார். கட்டவண்டி கட்டவண்டி பாடலில் மீண்டும் மலேசியா வாசுதேவன் ஆனார் முகேஷ்.

“சுர்முகி என்றால் ஸ்வரத்தை அழகாகப் பிரதிபலிப்பவள்” என்று ராஜாவால் புகழப்பட்ட

பாடகி சுர்முகி “குயில் பாட்டு ஓ வந்ததென்ன இளமானே” பாடிய போது அந்த வேகப்பாட்டு படத்தின் இன்னொரு வடிவமான மெதுவாக நகரும் பாட்டையே நினைவுபடுத்தியது.

தான் பாடிய பாடல்களை இன்னொருவர் நகலெடுத்துக் கூடப் பாட முடியாத அளவுக்குப்

பாடி விட்டுச் சென்றிருக்கிறார் ஸ்வர்ணலதா என்று மனதுக்குள் அந்தக் குயிலை நினைத்து ஏங்க வைத்தது.

குயில் பாட்டில் விட்டதைப் பிடித்து ராஜாவின் ஸ்பெஷல் பாராட்டையும் பெற்றார் “இதயம் ஒரு கோவில்” பாடலின் ஆரம்ப எஸ்.ஜானகி ஆலாபனையிலும், சின்னப்பூ சின்னப்பூ (ஜப்பானில் கல்யாணராமன்) பாட்டிலும் பாடகி சுர்முகி.

“இளம்பனி துளிர் விடும் நேரம்” (ஆராதனை) பாடலை சூப்பர் சிங்கர் ஶ்ரீஷா பாடிய போது இந்தப் பாட்டை முன்னர் கேட்டதில்லையே என்று காதில் கிசுகிசுத்தார் ராஜாவின் தீவிர இசை வெறியர் என் நண்பர். “ஒரு கிளி உருகுது உரிமையில் பழகுது” ஶ்ரீஷா சக சூப்பர் சிங்கர் கூட்டாளி உருக வைத்தார்கள்.

சூப்பர் சிங்கர் கெளசிக், மது ஐயரோடு “ஓ வசந்த ராஜா” பாடினார்.

பாடகர் நாராயணன் கூட்டாக “ராமன் ஆண்டாலும் ராவணன் ஆண்டாலும் எனக்கொரு கவலை இல்லே” என்று தனித்தும், “அட மச்சமுள்ள மச்சான்” பாடலுக்கெல்லாம் சிறப்புக் குரலாகவும் கலந்து கட்டினார்.

“ஆசை அதிகம் வச்சு” பாடலின் இடையிசையில் ஒலிவாங்கி கோளறு பதிகம் பாடவே ராஜாவோ விடாப்பிடியாக மூன்று சுற்றுத் திருத்தி, திருந்திய ஒலியமைப்போடு நெப்போலியனின் வாத்தியப் பகிர்விலிருந்து தொடர வைத்தார். அதுதான் ராஜா.

“பூங்கதவே தாழ் திறவாய்” (சாய் விக்னேஷ் & மது ஐயர்) பாடலில் வரும் நாதஸ்வர ஒலியை இப்போ கீபோர்டில் வாசித்தவர் மேனுவேல் என்று அறிமுகப்படுத்திய ராஜா, இந்தப் பாடலில் வரும் கிட்டார் இசையை கீபோர்ட்டில் இப்ப வாசித்தவர் பரணி என்று இன்னொன்றிலுமாக இருவரையும் அறிமுகப்படுத்தினார். ஆனால் கீபோர்காரர் இருந்த பக்கம் வாஸ்து சரியில்லைப் போல ஒலி வாங்கிகள் அடிக்கடி குழம்பிப் போய் ராஜாவையும், நெப்போலியனையும், பிரபாகரையும் நகம் கடிக்காத குறையாக டென்ஷன் படுத்தியது. இசைஞானியின் பாடல்கள் வாத்தியப் பங்களிப்போடு அதிகமிருப்பதால் சென்னையில் பழக்கப்படுவது போல மற்றைய இடங்களில் இசை நிகழ்ச்சி படைக்கும் போது ஒலி அமைப்பு செய்வது பெரும் சவால். அதைச் சமாளித்து அதிக நெருடல் இல்லாமல் தொடர்ந்தது சிறப்பு.

“எதோ நினைவுகள் கனவுகள் மனதிலே மலருதே” பாடலுக்குப் பின்னால் ஒரு கதை இருக்கு சொல்லவா? என்று ராஜா கேட்க கூட்டமும் ஆமாம் வேண்டும் என்று கொட்டியது.

நான் மூன்றாவது வகுப்பில் படிக்கும் போது அண்ணன் பாஸ்கர் நாலாவது படிச்சிட்டிருந்தான். இருவரும் சேர்ந்து அப்போ “லைலா மஜ்னு” படம் பார்த்துட்டு மறுநாள் பள்ளிக்கூடம் போய்

லைலா, லைலா, லைலா என்று அண்ணன் பாஸ்கர் தன் நோட்டுப் புத்தகத்திலும், நான் என் நோட்டுப் புத்தகத்திலும் எழுதித் தள்ளி வாத்தியார்கிட்ட அடி வாங்கினோம். அப்போ நான் மஜ்னுவை விட லைலாவை அதிகம் காதலித்தேன். அதற்குக் காரணம் அந்தப் படத்துக்கு இசையமைச்ச சி.ஆர்.சுப்புராமன். தொடர்ந்து ராஜா பாடுகிறார்

“எனது உயிர் உருகும் நிலை” என்ற லைலா மஜ்னு படப் பாடலை. லைலா மஜ்னு மாதிரி எனக்கு ஒரு படம் வாய்க்காதா என்ற ஏக்கத்தில் கொடுத்த பாட்டுத்தான் “ஏதோ நினைவுகள்” பாட்டு. அதுக்காக அது காப்பி அல்ல, அந்த ஜீவனைப் பிரதிபலித்தது என் பாட்டு என்றவர் தொடர்ந்து

“ஏதோ நினைவுகள்” பாட்டை அப்போ சின்னப்பையனா இருக்கும் போது இசைமைச்சேன் இப்பவும் நான் சின்னப் பையன் தான் இளையராஜா ஆச்சே என்று குறும்பாகப் பேசியவர் இதே மாதிரி நிறைய அனுபவங்களோடு ஒரு ஆர்மோனியம், ராஜாங்கிற பையன், சிட்னி சிம்பனி, நம்ம குழுவினரோடு சிட்னி ஒபரா ஹவுசில் எதிர்காலத்தில் இன்னொரு நிகழ்ச்சியும் நடத்திட்டாப் போச்சு என்று ஆசையைத் தூண்டி விட

நாராயணன் வந்து “ராஜா கைய அது ராங்கா போனதில்லே” என்று பாட ஆரம்பித்தார்.

இதற்கு முன்னரும் இசைஞானியின் இசை நிகழ்ச்சியைப் பார்த்த எனக்கு நேற்றைய ரசிகர் சந்திப்பிலும் இன்றைய இசை நிகழ்ச்சியிலும் அவர் வழக்கத்துக்கு மாறாகக் கிண்டல், ஜாலி, குதூகலத்தோடு மனம் விட்டுப் பேசியது இன்ப அதிர்ச்சியாக இருந்தது.

நிகழ்ச்சி தொடங்கும் போதே “நீங்க எங்களைப் பார்க்கிறது மாதிரி நாங்களும் ஒருவாட்டியாவது உங்களைப் பார்க்கணுமே லைட்டப் போடுங்க” என்று கட்டளை இட்டு விட்டு அரங்கத்தைப் பார்த்துக் கையசைத்தார்.

“அவதாரம் அவதாரம்” என்று கேட்ட கூக்குரல்களுக்கு

“என்னது நான் அவதாரமா ஆமா அவதாரம் தான்” என்று எள்ளல் வைத்து விட்டு

“தென்றல் வந்து தீண்டும் போது என்ன வண்ணமோ” என்று ஒரு சில வரிகளைப் பாடினார்.

கன்னடா, தெலுங்கு தெலுங்கு என்று கத்திக் கொண்டிருந்தவர்களுக்கு

“நீங்க McDonald’s போன்ற Fast food கடைகளுக்குப் போனா அங்க சமைச்சு வச்சதைத் தானே கொடுப்பாங்க அது மாதிரித் தான். நான் நீங்க கேட்கிறதைக் கொடுக்க மாட்டேன் நான் சமைச்சு வச்சிருக்கிறதைத் தான் கொடுப்பேன்” என்று கிண்டலடிக்க அரங்கம் கொல்லென்று சிரித்தது.

ஒரு மேல் (male) பாட்டை நாங்க பாடப் போறோம் என்று பாடகிகள் சொல்ல

“நான் போட்டதெல்லாம் மேல் தான்” என்று கிடுக்குப் பிடியோடு உரையாடல்,

தொடர்ந்து “பொதுவாக என் மனசு தங்கம்” பெண்கள் குரலில்.

“எத்தனை கேரட்?” மீண்டும் ராஜா 😃

“பூமாலையே தோள் சேரவா” பாடலைப் படித்து விட்டுச் சிரித்தவர்

“சில பாடல்களைப் பாடும் போது சிரிப்பா இருக்கும் என்ன ஒரு அர்த்தமும் இல்லாம எழுதி வச்சிருக்காங்களேன்னு. இதிலும் கூட “கன்னி எழுதும் வண்ணம் முழுதும் வந்து தழுவும் ஜென்மம் முழுதும்” அப்படின்னு வரும். எழுதினது என் தம்பி தான். இதுக்கு என்ன அர்த்தம்னு கேட்டேன், “அது இசையோட பாடிப் பாருங்க அர்த்தம் வரும்” என்று மழுப்பிட்டான்.

டைரக்டர் வந்து பாடல் பதிவுக்கு மூணு நாளைக்கு முன்பே டியூன் வாங்கிடுவாங்க அப்பதான் பாடலாசிரியர் பாட்டு எழுத வசதின்னு. ஆனா இவங்க என்னடான்னா ஜீவானந்தம் பார்க்ல இருந்து ஊர்ல இருக்குற எல்லா பார்க்கும் தேயத் தேய நடந்து நடந்து யோசிச்சு, பிரசாத் ஸ்டூடியோ எல்லாம் நடந்து இப்பிடியாகப்பட்ட வரிகளைக் குடுப்பாங்க என்று சொல்லி விட்டு இதை நான் தப்பாகச் சொல்லல நான் ஓகே பண்றதுக்காக அவங்க எடுத்துக்கிற முயற்சி என்று முத்தாய்ப்பு வைத்தவர், வாலி ஒருத்தர் தான் அரை மணி நேரத்துல தன் வேலையை முடிச்சுக் குடுத்துட்டுக் கிளம்பிடுவார் என்றும் மெச்சினார்.

ஒரு ரஜினி ரசிகனோ கமல் ரசிகனோ அல்லது விஜய், அஜித் என்று தலைமுறை தாண்டி அவரவர்க்கு ஒரு ரசிகர் வட்டமிருக்கும். ஆனால் என் போன்றவர்களுக்கு இவர்கள் எல்லோருமே பொது, ராஜா என்பதே மையம். அதனால் தான் இந்த இசை நிகழ்ச்சியை என்னால் அணு அணுவாக ரசிக்க முடிந்தது.

நேற்றுக்காலை ஒன்பது மணிக்குப் பாடகர்களுக்குப் பயிற்சி கொடுக்க ஆரம்பித்தவர் மாலை ஏழரை தாண்டித் தான் ரசிகர்களைச் சந்தித்தார். அதுவரை ஒத்திகை தான்.

இன்றைய இசை நிகழ்ச்சியிலும் நான்கு மணி நேரங்கள் கடந்து ‪தொடர்ந்து ஒரு சொட்டு நீர் அருந்தாது நின்று கொண்டே தன் ஆர்மோனியத்தருகே கண்டிப்பான வாத்தியாராக, அரங்கத்தில் இருக்கும் ரசிகர்களுக்கு அறுசுவை படைத்தார் இந்த ‪எழுபத்தைந்தைத்‬ தொட்ட முது பெரும் ஆளுமை.

இவருக்குப் பின் இப்படியொரு கடின உழைப்பாளியை நாம் காணப் போவதில்லை என்றே நிகழ்ச்சி முடியும் வரை என் மனது சொல்லிக் கொண்டிருந்தது.

இசைஞானி இளையராஜாவை பிரமிப்போடு ‪இன்னொரு முறை‬ நேரில் கண்டு தரிசித்ததே என் வாழ்நாள் தவம்.

கானா பிரபா

11.08.2018